ޤަޟާގަދަރަށް އީމާންވާ މީހަކު އޭނާގެ ހަޔާތް ހޭދަ ކުރަމުން ދާނީ ހިތްހަމަ ޖެހުމާއެކު ކަމަށް މިއަދުގެ ހުކުރު ހުތުބާގައި ބުނެފިއެވެ.
"މިންވަރަށް އީމާންވުން" މި މައުޟޫގެ ރާއްޖޭގެ އެކި ކަންކޮޅުތަކަށް އިއްވި ޚުތުބާގައި ބުނީ ޤަޟާގަދަރަށް އީމާންވާ މީހަކު އޭނާގެ ހަޔާތް ހޭދަ ކުރަމުން ދާނީ ހިތްހަމަ ޖެހުމާއެކު ކަމަށާއި ފިތުނައިގެ ސަބަބުން އެފަދަ މީހަކު ގުޑުގުޑު އަޅައިގެން ނުދާނެ ކަމަށެވެ. އަދި ދަތި އުނދަގޫ ކަމެއް ދިމާވުމުން އެފަދަ މީހަކު ބަލިކަށިވެގެން ނުދާނެ ކަމަށް ވެސް ހުތުބާގައިވެއެވެ.
މިންވަރަށް އީމާންވުމުގެ ސަބަބުން އެމީހަކަށް ސުވަރުގެ ވަނުމަށް މަގުފަހިވެގެންދާނެކަން ފާހަގަކޮށް ހުތުބާގައި ބުނީ މާތްﷲ އާއި ރަަސޫލާ އެންގެވި ގޮތަށް، އީމާންވެ އަޤީދާ ވަރުގަދަކޮށްފި މީހެއްގެ ހަށިގަނޑާއި ގުނަވަންތަކުން އެކަން ފާޅުވެގެންދާނެ ކަމަށެވެ. ހުރިހާ ކަމެއް މެދުވެރިގެންދަނީ މާތްﷲ ގެ އިލްމުފުޅާއި އެކަލާނގެ އިއުތިޤާދު ކުރާ ބަޔަކު ބިރުގަނެ، ހިތްނުތަނަވަސްވެ، މާޔޫސްވާން ނުޖެހޭނެ ކަމަށް ވެސް ހުތުބާގައި ބުނެފައިވެއެވެ.
ހުތުބާގައި އިތުރަށް ބުނީ އަޅުތަކުން ކިތަންމެ މޮޅަށް ކިތަންމެ ވަރަކަށް ކަންތައްތައް ރޭވިކަމުގައިވިޔަސް އެކަމެއް މާތްﷲ ގެ އިރާދަފުޅުމަތިން މެނުވީ ނުހިނގާނެ ކަމަށެވެ. ދުނިޔޭގައި ހިނގާ ހުރިހާ ކަމެއް ހިނގަނީ މާތްﷲ ގެ ކުޅަދުންވަންތަކަމާއި އެކަލާނގެ އިރާދަފުޅުންކަން އަޅުގަނޑުމެން އީމާންވާއިރު އެކަލާނގެ ޝަރުއު ކުރައްވާފައިވާ ކަންތައްތަކަށް އެންމެން ކިޔަމަން ގަންނަން ޖެހޭނެ ކަމަށް ހުތުބާގައިވެއެވެ. މާތްﷲ އަޅުގަނޑުމެންނަށް އަމުރުކޮށްފައިވާ ކަންތައްތައް ދޫކޮށްލައިގެން ނުވާނެ ކަމަށާއި ހެޔޮކަންތައްތަކަށް ގޮވާލުމާއި ނުބައި ނޭދެވޭ ކަންތައްތައް ހުއްޓުވުމަށް މަސައްކަތް ކުރުމަށް ވެސް ހުތުބާގައި ވަނީ ގޮވާލާފައެވެ.
ދިމާވާ މުސީބާތްތަކަށް ކެތްތެރިވުމަށް މާތްﷲ އަމުރުކުރައްވާފައިވާކަން ފާހަގަކޮށް ހުތުބާގައި ބުނީ ހިދާޔަތާއި ފާލާހުގެ ސިއްރަކީ ކެތްތެރިކަން ކަމަށެވެ. އަދި މާތްﷲ ވަނީ އެކަލާނގެ އަޅުތަކުން އިމްތިހާނު ކުރައްވާނެކަން އަންގަވާފައި ކަމަށާއި މި އިމްތިހާނުން ކާމިޔާބު ލިބޭނީ ޤަޟާގަދަރަށް ރުހިގެން ތިބޭ ކެތްތެރިންނަށް ކަމަށް މާތްﷲ ބަޔާންކުރައްވާފައިވާ ކަމަށް ހުތުބާގައިވެއެވެ.
މިއަދު ކޮވިޑުގެ މި ހާލަތުގައި އަޅުގަނޑުމެންގެ އެންމެ މުހިންމު އެއް ހަތިޔާރަކަށް ވާންޖެހޭނީ ޤަޟާގަދަރަށް އީމާންވުމާއެކު ކެތްތެރިކަން އިސްކުރުން ކަމަށް ހުތުބާގައިވެއެވެ. އީމާންކަމާއި ކެތްތެރިކަމުން ހިމާޔަތް ލިބިގެންފިނަމަ ދުނިޔެ މަތީގައި ލިބެން އޮތް ހެވެއް އެއްވެސް މީހަކަށް އިހުސާސް ނުކުރެވޭނެ ކަމަށާއި އާހިރަތުގައި ކެތްތެރިންނަށް މާތްﷲ މިންވަރު ކުރައްވާފައިވާ ދަރުމަ އާއި ޘަވާބު އެއްވެސް މީހަަކަށް ވަޒަން ވެސް ނުކުރެވޭނެ ކަމަށް ހުތުބާގައި ވަނީ ބުނެފައެވެ.
