އެގްރޯ ކޯޕަރޭޝަނާ ގުޅިގެން ތަރުކާރީ އާއި މޭވާގެ ބާވަތްތައް ހައްދާ ބާޒާރަށް ނެރުމުގެ ފުރުސަތު އައްޑޫ ދަނޑުވެރިންނަށް!
ދަނޑުވެރިންނަށް މާލީގޮތުންނާއި ފަންނީގޮތުން ހުރިހާ އެހީތެރިކަމެއް އެގްރޯ ނޭޝާނަލް ކޯޕަރޭޝަނުން ފޯރުކޮށްދޭނެ
އައްޑޫ ދަނޑުވެރިން ހައްދާ ބައެއް ބާވަތްތައް
އެގްރޯ ނޭޝަނަލް ކޯޕަރޭޝަނާ ގުޅިގެން ތަރުކާރީއާއި މޭވާގެ ބާވަތްތައް ހައްދާ ބާޒާރަށް ނެރުމުގެ ފުރުސަތު އައްޑޫ ސިޓީ ކައުންސިލުން ހުޅުވާލައިފިއެވެ.
އައްޑޫ ސިޓީ ކައުންސިލުން ބުނީ އެގްރޯ ނޭޝަނަލް ކޯޕަރޭޝަނުން ދަނޑުވެރިންނަށް އަމާޒު ކޮށްގެން ދިވެހިރާއްޖޭގެ ދަނޑުވެރިކަމުގެ ސިނާއަތް ތަރައްގީކޮށް ކުރިއެރުވުމަށްޓަކައި ރާއްޖޭގައި ޢާއްމުކޮށް ހައްދާ ބާވަތްތައް ރާއްޖޭގެ ބާޒާރަށް ވިއްކުމުގެ މަސައްކަތް ކުރުމަށް އެ ކުންފުނިން ބޭނުންވާ ކަމަށެވެ.
އެގޮތުން ރާއްޖޭގައި ޢާންމުކޮށް ހައްދާ ފަތްކެޔޮ، ފަޅޯ، ކަރާ، ބަޓާނާ، ބަރަބޯ، ބަށި، ތޮޅި، ކެބެޖު، ލެޓިއުސް، މެލަން، ކިއުކަންބާ، ދަނޑި އަލުވި، ކައްޓަލަ، ޒުވާރި، ކެޕްސިކަމް އަދި ދޮނަޅަ އުފެއްދުމަށްޓަކައި އެ ކުންފުންޏާއި ދަނޑުވެރިންނާއި ދެމެދު އެއްބަސްވުން ހެދި އެ އެއްބަސްވުމުގައި ވާގޮތަށް އެ ފަރާތްތަކުން އުފެއްދުމަށް ކަނޑައެޅިފައިވާ ބާވަތް، އެއްބަސްވެފައިވާ ސައިޒްގެ ބިމެއްގައި އުފެއްދުމަށް ދަނޑުވެރިންނަށް މާލީގޮތުންނާއި ފަންނީ ގޮތުން ހުރިހާ އެހީތެރިކަމެއް އެގްރޯ ނޭޝާނަލް ކޯޕަރޭޝަނުން ފޯރުކޮށްދިނުމަށް ހަމަޖެހިފައިވާ ކަމަށެވެ. އަދި އުފެއްދުންތައް ކުންފުނިން ގަތުމަށްފަހު ރާއްޖޭގެ މާރކެޓަށް ވިއްކުމަށް ވެސް ވަނީ އެ ކުންފުނީގެ ފަރާތުން ރާވާފައިކަމަށް އައްޑޫ ސިޓީ ކައުންސިލުން ބުންޏެވެ.
ސިޓީ ކައުންސިލުން ބުނީ އެކަމަށް ޝަޢުޤުވެރިވާ ދަނޑުވެރިކަން ކުރާ ފަރާތްތަކުން އެކަމުގައި ބައިވެރިވުމަށް ނަން ނޯޓު ކުރުމަށްޓަކައި އެ އަވަށެއްގެ އަވަށު އޮފީހަށް06 ސެޕްޓެމްބަރ 2020 ވާ އާދިއްތަ ދުވަހުގެ 14:00ގެ ކުރިން އީމެއިލް ކުރުމަށް ފުރުސަތު ހުޅުވާލެވިފައިވާ ކަމަށެވެ.
ސަރުކާރުން ހިއްސާވާ ދަނޑުވެރިކަމުގެ ހާއްސަ ކުންފުނި އެގްރޯ ނެޝެނަލް ކޯޕަރޭޝަން އަކީ ރާއްޖޭގައި ދަނޑުވެރިކަމުގެ ސިނާއަތު ކުރިއެރުވުމުގައި މަގްސަދުގައި އުފައްދާފައިވާ ކުންފުންޏެކެވެ. ރާއްޖޭގެ ދަނޑުވެރިކަމުގެ އުފެއްދުންތައް ހަމަ އަގުގައި ގަނެ އެތަކެތި މާކެޓްކޮށް ވިއްކުމާއި ސަޕްލައިޗެއިން ތަރައްގީ ކުރަން މަސައްކަތް ކުރުން އެ ކުންފުނީގެ މަގްސަދުތަކުގެ ތެރޭގައި ހިމެނެއެވެ.
