ރާއްޖެ ސަފީރާ ބައްދަލު ކުރައްވާ، ނަމާލްގެ ޝުއޫރުތައް ފާޅުކުރެއްވީ ދިވެހި ބަހުން

ސްރީލަންކާގެ ސްޕޯޓްސް އެންޑް ޔޫތް މިނިސްޓަރު، ނަމާލް ރާޖަޕަކްސް ދިވެހިރާއްޖެ އިން ލަންކާ އަށް ކަނޑައަޅުއްވާފައިވާ ސަފީރު އުމަރު އަބްދުއްރައްޒާގުއާ ބައްދަލު ކުރައްވައިފިއެވެ.

ބައްދަލުވުމުގައި ކުރެވުނު މަޝްވަރާތައް ޓްވިޓާގައި ނަމާލް ހިއްސާ ކުރެއްވީ ދިވެހި ބަހުންނެވެ. އޭނާ ވިދާޅުވީ، ސަފީރުއާ އެކު ބޭއްވި ބައްދަލުވުމުގައި ދެ ގައުމުގެ ގުޅުމާއި، ކުޅިވަރާއި ޒުވާނުންގެ ރޮނގުން އިތުރަށް ވަރުގަދަ ކުރުމަށް މަޝްވަރާ ކުރެވުނު ކަމަށެވެ. އަދި އެއީ ލިބިވަޑައިގެންނެވި އުފަލެއް ކަަމަށް ވިދާޅުވިއެވެ. ޓްވީޓް ނިންމަވާލައްވަމުން ލަންކާގެ މިހާރުގެ ރައީސް މަހިންދަ ރާޖަޕަކްސްގެ ދަރިކަލުން ނަމާލް ވިދާޅުވީ، ރާއްޖެއާ ލަންކާ އަކީ ގާތް އެކުވެރި ދެ ގައުމު ކަމަށާއި، އަބަދުވެސް އެ ގުޅުން ދެމި އޮންނާނެ ކަމަށެވެ.

ދެ ގައުމުގެ އެކުވެރިކަ މަށް ނަމާލް އަލިއަޅުއްވާލާފައިވާއިރު، މި ސަރުކާރުން އައި ފަހުން ނަމާލް ވަނީ ރާއްޖެ އަށް ދަތުރުފުޅެއް ކުރައްވާ ސަރުކާރުގެެ އިސްވެރިންނާއި ބައްދަލު ކުރައްވާފައެވެ. އޭނާ އަކީ ރާއްޖޭގެ ޔޫތް މިނިސްޓަރު އަހުމަދު މަހްލޫފްއާ ގާތް ގުޅުމެއް ބާއްވަމުން އަންނަ ބޭފުޅެކެވެ. ވެރިކަމާއި ހަވާލުވެވަޑައިގަތް ފަހުން ރައީސް އިބްރާހިމް މުހައްމަދު ސޯލިހު ވަނީ ލަންކާގެ މިނިވަން ދުވަހުގެ ހަފްލާ ޝަރަފުވެރި ކޮށްދެއްވުމަށް އެ ގައުމަށް ދަތުރުފުޅެއް ކުރައްވާފައެވެ.

ސްރީލަންކާގެ ރައީސް ކަމަށް ގޯޓާބެ ރާޖަޕަކްސް އަދި ބޮޑުވަޒީރު ކަމަށް މަހިންދަ ރާޖަޕަކްސަ ހޮވިވަޑައިގަތުމުން އެންމެ ފުރަތަމަ މަރުހަބާ ކިޔުއްވި ބޭފުޅުންގެ ތެރޭގައި ރައީސް އިބްރާހިމް މުހައްމަދު ސޯލިހުގެ އިތުރުން މަޖިލީހުގެ ރައީސް މުހައްމަދު ނަޝީދު ހިމެނިވަޑައިގަންނަވައެވެ.