ލެއިޕްޒީގްގެ ފުރަތަމަ މެޗު ބަލަން 20 އިންސައްތަ ސަޕޯޓަރުން ދަނޑަށް ވައްދަނީ

ޖަރުމަން ލީގުގައި އާރްބީ ލެއިޕްޒީގުން ކުޅޭ ފުރަތަމަ މެޗު ބަލަން 20 އިންސައްތަ ސަޕޯޓަރުން ދަނޑަށް ވެއްދުމުގެ ހުއްދަ ދީފިއެވެ.

އައު ސީޒަނުގެ ޖަރުމަން ލީގު ފެށުމަށް ތާވަލުކޮށްފައިވަނީ މި މަހުގެ 18 ވަނަ ދުވަހުއެވެ. ލީގުގައި ލެއިޕްޒީގުން ކުޅޭ ފުރަތަމަ މެޗު މި މަހުގެ 20 ވަނަ ދުވަހަށް ތާވަލުކޮށްފައިވާއިރު، މެއިންޒްއާ ދެކޮޅަށް ކުޅޭ މެޗު ކުޅުމަށް ތާވަލުކޮށްފައިވަނީ ލެއިޕްޒީގުގެ ދަނޑުގައެވެ.

ލެއިޕްޒީގުގެ ރަސްމީ ދަނޑު ކަމަށްވާ ރެޑްބުލް އެރީނާއަކީ 42،000 މީހުންގެ ޖާގައިގެ ދަނޑެކެވެ. ލީގުގައި ލެއިޕްޒީގުން ކުޅޭ ފުރަތަމަ މެޗު ބަލަން 20 އިންސައްތަ ސަޕޯޓަރުން ދަނޑަށް ވެއްދުމުގެ ހުއްދަ ޖަރުމަންގެ އިދާރާތަކުން ވަނީ ދީފައެވެ. އެހެންކަމުން މި މެޗު ބަލަން 4،800 ސަޕޯޓަރުންނަށް ދަނޑަށް ވަދެވޭނެއެވެ.

ލެއިޕްޒީގްގެ ސްޕޯޓިންގ ޑިރެކްޓަރު އޮލިވާ މިންޒްލާފް ބުނީ ދަނޑަށް ސަޕޯޓަރުން ވައްދާއިރު، އެ ގައުމުގެ އިދާރާތަކުން ކަނޑައަޅާފައިވާ އުސޫލުތަކަށް ފުރިހަމައަށް ބޯލަނބާނެ ކަމަށާއި، އެކަންކަން ވަރަށް ހަރުކަށިކޮށް ގާތުން ބަލަމުންދާނެ ކަމަށެވެ.

ޖަރުމަން ލީގުގައި ލެއިޕްޒީގުން ކުޅޭ ފުރަތަމަ މެޗު ބަލަން ސަޕޯޓަރުން ވައްދާއިރު، އެޓީމުން އެންމެ ފަހުން ސަޕޯޓަރުން ވައްދައިގެން މެޗެއް ކުޅުނީ މާޗު މަހުގެ މެދު ތެރޭގައެވެ. އެއީ ޔުއެފާ ޗެމްޕިއަންސް ލީގުގެ ދެވަނަ ބުރުގައި 3-0 ން ޓޮޓެންހަމް ހޮޓްސްޕާ އަތުން މޮޅުވި މެޗެވެ.

ލެއިޕްޒީގަކީ ޖަރުމަންގެ ކުލަބުތަކުގެ ތެރެއިން ސަޕޯޓަރުން ދަނޑަށް ވެއްދުމުގެ ހުއްދަ ހޯދި ފުރަތަމަ ކުލަބެވެ. އެއާއެކު ހާތާ ބާލިން އާއި، ޔޫނިއަން ބާލިން އާއި، އެއިންޓްރެކްޓް ފްރެކްފަޓްގެ އިތުރުން ވުލްފްސްބާގުންވެސް އަންނަނީ ސަޕޯޓަރުން ދަނޑަށް ވެއްދުމުގެ ހުއްދަ ހޯދުމަށް މަސައްކަތް ކުރަމުންނެވެ.