ހޯމް ކަރަންޓީނާއި ޚިލާފުވެގެން ފުރަތަމަ ފަހަރަށް މީހަކު ޖޫރިމަނާކޮށްފި
އެމީހާ ޖޫރިމަނާކޮށްފައިވަނީ 2500 ރުފިޔާއިން
ކ. ގުރައިދޫ: އެމީހާ ޖޫރިމަނާކޮށްފައިވަނީ 2500 ރުފިޔާއިން
ހޯމް ކަރަންޓީނުގެ އުސޫލުތަކާއި ޚިލާފުވެގެން ފުރަތަމަ ފަހަރަށް މީހަކު ޖޫރިމަނާކޮށްފިއެވެ.
ބުރާސްފަތި ދުވަހު ފުލުހުން ބުނެފައިވަނީ ކ. ގުރައިދޫގައި ހޯމް ކަރަންޓީނާއި ޚިލާފުވި ދިވެހި ފިރިހެނެއް ޖޫރިމަނާކޮށްފައިވާކަމަށެވެ.
އެގޮތުން 39 އަހަރުގެ މީހާ ޖޫރިމަނާކޮށްފައިވަނީ 2500 ރުފިޔާއިންނެވެ.
މިއީ އެކެހެރި ކުރުމުގެ މަރުކަޒުތަކާއި ކަރަންޓީނު ކުރުމުގެ މަރުކަޒުތަކާއިބެހޭ ޤަވައިދަށް ފުރަތަމަ އިސްލާހް ގެނެވި އެޤަވާއިދުގެ ތެރެއަށް އަލަށް އިތުރުކުރި 13 ވަނަ މާއްދާގެ ށ ގެ ދަށުން މިގޮތަށް ޖުރިމަނާކުރި ފުރަތަމަ މީހާ އެވެ.
މި ގަވާއިދުގައި ބުނެފައިވަނީ އެކަހެރިވުމަށް އަންގައިފައިވާ މީހަކު، އެ މީހަކަށް އަންގައިފައިވާ އެންގުމާއި ހިލާފުވެއްޖެނަމަ 5،000 ރުފިޔާއިން ޖޫރިމަނާ ކުރެވޭނެ ކަމަށެވެ.
މީގެ އިތުރުން ގަވާއިދުގައިވާ ގޮތުން މީހަކު ނުވަތަ ބަޔަކު ކަރަންޓީނު ކުރުމަށް އެއްބާރުލުން ނުދިނުމާއި، އެކަހެރި ކޮށްގެން ފަރުވާ ދިނުމަށް ހުރަސް އަޅައިފިނަމަ އެކަން އެގޮތަށް ކުރި ފަރާތެއް، އަމުރާއި ހިލާފުވާ ފުރަތަމަ ފަހަރު 2،500 ރުފިޔާއިން ޖޫރިމަނާ ކުރެވޭނެ ކަމަށެވެ. އަދި އަމުރާއި ދެވަނަ ފަހަރަށް ހިލާފުވެއްޖެނަމަ 3،500 ރުފިޔާއިން ޖޫރިމަނާ ކުރެވޭނެ ކަމަށެވެ. އަދި އޭގެ ފަހުން އަމުރާއި ހިލާފުވާ ކޮންމެ ފަހަރަކު 5،000 ރުފިޔާ އިން ޖޫރިމަނާ ކުރެވޭނެ އެވެ.
ފުލުހުން ވަނީ ކަރަންޓީނު ކުރެވޭ ނުވަތަ އެކަހެރިކުރެވޭ ފަރާތްތަކުން ޤަވާއިދުތަކަށް ހުރުމަތްތެރިކޮށް ހިތުމަށް ނަސޭހަތްތެރިވެފައެވެ.
