ފްރާންސްގައި ދުވާލެއްގެ މައްޗަށް ކޮވިޑް-19 ޖެހޭ މީހުންގެ އަދަދުތައް މައްޗަށް ދާންފެށުމާއެކު ހޮސްޕިޓަލްގެ އައިސީޔޫގައި ފަރުވާދެމުންދާ މީހުންގެ އަދަދު މައްޗަށް ދާން ފަށައިފި އެވެ.

ފާއިތުވި ދެ މަސް ދުވަހު ފްރާންސްގައި ކޮވިޑް-19 ޖެހޭ މީހުންގެ އަދަދު މައްޗަށް ދާން ފަށާފައިވާއިރު ބުދަ ދުވަހު އެގައުމުގައި ވަނީ 7000ށް ވުރެ ގިނަ މީހުންނަށް ވައިރަސް ޖެހިފައެވެ. މިއީ އެގައުމުގައި ވައިރަސް ފެތުރެން ފެށިފަހުން 7000ށް ވުރެ ގިނަ މީހުންނަށް ވައިރަސް ޖެހިގެން ރިޕޯޓްކުރި ތިން ވަނަ ދުވަހުއެވެ. ބުދަ ދުވަހު އެގައުމުން 7017 މީހުންނަށް ކޮވިޑް-19 ޖެހިފައިވެ އެވެ. މާރޗް މަހުގެ 31 ވަނަ ދުވަހު އެންމެ ގިނަ މީހުންނަށް ވައިރަސް ޖެހިގެން ރިޕޯޓްކުރި ދުވަހު 7578 މީހުންނަށް ވަނީ ވައިރަސް ޖެހިފައެވެ.

މެއި މަހުގެ 27 ގައި އެގައުމުގައި ލޮކްޑައުންގައި އަޅާފައިވާ ފިޔަވަޅުތަކަށް ލުއިތައް ދޭންފެށިފަހުން ކޭސްތައް އިތުރުވާން ފަށާފައިވާއިރު ފާއިތުވި 7 ދުވަހު ކޭސްތައް އުޅެނީ އެވްރެޖްކޮށް ދުވާލެއްގެ މައްޗަށް 5000ށް ވުރެ މަތީގައެވެ. މިހާތަނަށް އައިއިރު އެގައުމުގެ 293،024 މީހަކަށް ވަނީ ކޮވިޑް-19 ޖެހިފައެވެ.

ކޭސްތައް އިތުރުވާން ފަށާފައިވާއިރު އެގައުމުގެ ސިއްހީ އިދާރާއިން ނެރެފައިވާ ބަޔާނެއްގައި ބުނެފައިވަނީ ވައިރަސް މުޅި ގައުމަށް ފެތުރެމުންދާ ކަމަށެވެ.

އަލަށް ކޭސްތައް ފެންނަމުންދަނީ ގިނައިން ޒުވާނުންގެ މެދުގައި ކަމަށްވުމުން އަދި އެހާ ސީރިޔަސް ހާލަތަކަށް އެގައުމު ނުދެއެވެ. ރިޕޯޓްތައް ބުނާގޮތުގައި އެގައުމުގައި އަލަށް ފެންނަމުންދާ ކޭސްތަކުގެ ތެރޭގައި އައު ސްޓްރެއިނެއް ނުފެނެއެވެ. އެހެންނަމަވެސް އޭޕްރީލް މަހުގެ މެދު ތެރޭގައި ޕީކުގައި އޮތްއިރު އެގައުމުގެ ހޮސްޕިޓަލްތަކުގައި އެޑްމިޓްކޮށްފައިވާ މީހުންގެ އަދަދު 32،292 ގައި ހުރިއިރު ފާއިތުވި ފަސް ދުވަހުގެ ތެރެއިން ކޮންމެ ދުވަހަކު ހަތަރުހާހަށްވުރެ ގިނަ މީހުން ވަނީ ހޮސްޕިޓަލްތަކުގައި އެޑްމިޓްކޮށްފައެވެ.

އަލަށް މިފެންނަމުންދާ ކޭސްތަކާއި ގުޅިގެން އައިސީޔޫގައި ފަރުވާ ދެމުންދާ މީހުންގެ އަދަދުވެސް ވަނީ މައްޗަށް ދާންފަށާފައެވެ. އެގޮތުން 22ން 446 މީހުންނަށް ފާއިތުވި ދުވަސްތަކުގެ ތެރޭގައި އައިސީޔޫގައި ފަރުވާދޭ މީހުންގެ އަދަދު ވަނީ މަތިވެފައެވެ.

މިހާތަނަށް އައިއިރު ފްރާންސްގައި މިބަލީގައި މަރުވި މީހުންގެ އަދަދަކީ 30،686 މީހުންނެވެ. ބުދަ ދުވަހު 25 މީހުން މަރުވެފައިވާއިރު ފާއިތުވި ހަތް ދުވަހު ދުވާލެއްގެ މައްޗަށް މަރުވެފައިވަނީ އެވްރެޖްކޮށް 20 މީހުންނެވެ.