ރާއްޖޭގެ މިނިވަންކަން ދެމެހެއްޓިފައިވަނީ ރާއްޖެ އާއި އިންޑިއާގެ ގުޅުން ވިސްނުންތެރިކަމާއެކު ގެންގުޅެގެން: ނަޝީދު
2 ސެޕްޓެމްބަރު 2020 | ބުދަ 15:54ދިވެހިންގެ ތަނަވަސްކަން ހޯދޭނީވެސް ގުޅުން ވިސްނުންތެރިކަމާއެކު ގެންގުޅެގެން
ރައީސް މުހައްމަދު ނަޝީދު އިންޑިއާގެ ބޮޑުވަޒީރާއެކު
ރާއްޖޭގެ މިނިވަންކަން ދެމެހެއްޓިފައިވަނީ ރާއްޖެ އާއި އިންޑިއާގެ ގުޅުން ވިސްނުންްތެރިކަމާއެކު ގެންގުޅެގެން ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު ކުރެއްވި ޓުވީޓެއްގައި އެމަނިކުފާނު ވިދާޅުވީ ދިވެހިރާއްޖެ އާއި އިންޑިއާގެ ގުޅުމަކީ ޒަމާންވީ ގުޅުމެއް ކަމަށެވެ. އަދި ރާއްޖޭގެ މިނިވަން ދެމެހެއްޓިފައިވަނީ އަދި ދިވެހިންގެ ތަނަވަސްކަން ހޯދޭނީ ވެސް އެ ގުޅުން ވިސްނުންތެރިކަމާއެކު ގެންގުޅެގެން ކަމަށް ކަމަށް ރައީސް ނަޝީދު ވިދާޅުވިއެވެ.
އެމަނިކުފާނު ވިދާޅުވީ، ރައީސް އިބްރާހިމް މުހައްމަދު ސޯލިހާއި، އެމްޑީޕީގެ ވަޒީރުން އެކަން ކުރައްވާނެކަމާމެދު ޝައްކު ނުކުރައްވާ ކަމަށެވެ.
އަވަށްޓެރި އިންޑިއާ އާއި ރާއްޖޭގެ ގުޅުމުގެ އަޑުތައް ގަދަވެފައިވަނީ އިދިކޮޅުގައި ތިބި އަބްދުﷲ ޔާމީންގެ ސަޕޯޓަރުން އިންޑިއާއަށް ބަދުބަސް ރައްދު ކުރަން ފެށި ހިސާބުންނެވެ. އަދި އިންޑިއާ މި ޤައުމުން ފޮނުވާލަންޖެހޭ ކަމަށާއި، އިންޑިއާ އިން މަސައްކަތް ކުރަނީ ރާއްޖެ އަޅުވެތި ކުރުމަށް ކަމަށް ބުނެ ދޮގު ވާހަކަތައް އަންނަނީ ފަތުރަމުންނެވެ.
ކުރީގެ ރައީސް އަބްދުﷲ ޔާމީންގެ ސަޕޯޓަރުން އިންޑިއާ އާއި ދެކޮޅުވެރިކަން ހާމަކޮށް، ކުއްލި ގޮތަކަށް މަސައްކަތް ފެށީ އިންޑިއާ ސަރުކާރުގެ އެހީގައި ދިވެހި ސަރުކާރުން އުމްރާނީ ތަރައްޤީގެ ގިނަ މަސައްކަތްތަކެއް ފަށައިގަތުމަށް ތައްޔާރުވާކަން އިއުލާން ކުރުމާއެކުއެވެ.
