ގއ. ދާންދޫއިން ދެމައިން ކޮވިޑަށް ޕޮޒިޓިވްވެ، ވިލިނގިލީ ކޮވިޑް ފެސިލިޓީއަށް ބަދަލުކޮށްފި
ދާންދޫއިން ޕޮޒިޓިވްވީ ދެމައިން
ގއ. ވިލިނގިލީ ކޮވިޑް ފެސިލިޓީއަށް ބަލި މީހަކު ގެންދަނީ
ގއ. ދާންދޫއިން ކޮވިޑް-19 އަށް ޕޮޒިޓިވްވި ދެމައިން ވިލިނގިލީ ކޮވިޑް ފެސިލިޓީއަށް ބަދަލުކޮށްފިއެވެ.
ދާންދޫއިން ޕޮޒިޓިވްވި ދެމައިން އަންގާރަ ދުވަހުގެ ރޭ 10 ޖެހިއިރު ވިލިނގިލީ ކޮވިޑް ފެސިލީޓީއަށް ބަދަލުކޮށްފައިވާއިރު، އެ ދެމައިންގެ ހާލުވެސް ރަނގަޅުކަމަށް ގއ. އަތޮޅު ހޮސްޕިޓަލުން މައުލޫމާދެއެވެ.
ގއ. އަތޮޅު ހޮސްޕިޓަލްގެ މެނޭޖަރ ޝަރީފް އަހުމަދު ވިދާޅުވީ ދާންދޫއިން ގެނައި ދެމައިންގެ ތެރެއިން އަންހެން މީހާއަކީ 59 އަހަރުގެ ހައި ރިސްކް ކެޓަގަރީގައި ހިމެނޭ މީހެއް ކަމަށެވެ. އަދި އޭނާއާއެކު ޕޮޒިޓިވް ވެގެން ގެނެސްފައިވަނީ 19 އަހަރުގެ ފިރިހެން ދަރިއެއް ކަމަށެވެ. ދެމައިން އެއްކޮށް ކޮވިޑް ފެސިލިޓީއަށް ބަދަލުކުރިއިރު، އަންހެން މީހާއަކީ ހަކުރު ބަލީގެ އިތުރުން ދާއިމީ އެހެނިހެން ބަލިތަކަށް ފަރުވާ ހޯދަމުންދާ ފަރާތެކެވެ.
ޝަރީފް ވިދާޅުވީ ކޮވިޑް ފެސިލިޓީއަށް ފުރަތަމަ ފަހަރަށް ދެ މީހަކު ގެނެވުނުއިރު އެތަނުގެ އިންތިޒާމުތައް ވަރަށް ފުރިހަމައަށް ހަމަޖައްސާފައިވާނެ ކަމަށެވެ. އެގޮތުން އަތޮޅު ހޮސްޕިޓަލުން އާންމުކޮށް ފަރުވާދޭ ބައި ވަކިކުރެވި ހިދުމަތްތައްވެސް މުޅިން ވަކިން އެހެން އިމާރާތެއްގައި ދެވޭނެ އިންތިޒާމް ހަމަޖައްސާފައިވާނެ ކަމަށެވެ.
ރާއްޖެއެމްވީއަށް މައުލޫމާތުދެއްވަމުން ދާންދޫ ކައުންސިލް ރައީސް އިސްމާއީލް މުހަންމަދު ވިދާޅުވީ، ކޮވިޑަށް ޕޮޒިޓިވްވި ދެމައިންނަކީ އޮގަސްޓު މަހުގެ 15 ގައި މާލެއިން ރަށަށް ބަދަލުވި އާއިލާއެއް ކަމަށެވެ. އަދި އެ އާއިލާގައި 18 އަހަރުންދަށުގެ ތިން ކުދިން ތިބި ނަމަވެސް އެކުދިންގެ ޓެސްޓުތައް ނެގެޓިވްވެފައިވާ ކަމަށެވެ.
އިސްމާއީލް ވިދާޅުވީ، އެކުދިން ބެލުމަށްޓަކައި އާއިލާގެ ފަރާތުން އެހެން މީހަކު އެގޭގައި ދިރިއުޅެމުންދާ ކަމަށާއި އަދި އެ އާއިލާގެ ކަންކަން ކައުންސިލްގެ ފަރާތުން ވަރަށް ގާތުން ބަލަމުންދާ ކަމަށެވެ.
ދާންދޫއިން އެއް އާއިލާއަކުން ދެމައިން ކޮވިޑަށް ޕޮޒިޓިވްވެފައިވީ ނަމަވެސް، އެރަށަށް އަރާ ފޭބުމުގައި އެއްވެސް ހުރަހެއް ނެތްކަމަށް ކައުންސިލުން މައުލޫމާތުދެއެވެ.
ގއ. އަތޮޅުން މިހާތަނަށް ޖުމްލަ 12 މީހުން ކޮވިޑަށް ޕޮޒިޓިވްވެފައިވާއިރު، އެ އަތޮޅުން ރިސޯޓުތައްވެސް ހިމެނޭ ގޮތަށް 1285 ސާމްޕަލް ވަނީ ނަގާފައެވެ.
