ކޮވިޑް-19 އާ ދެކޮޅަށް ރާއްޖެއިން ކުރާ މަސައްކަތަށް ވިއެޓްނާމުން ފައިސާގެ އެހީތެރިކަން ފޯރުކޮށް ދީފިއެވެ.

ވިއެޓްނާމުން އެހީގެ ގޮތުގައި ދީފައިވަނީ 20،000 އެމެރިކާ ޑޮލަރެވެ. މި ފައިސާ ދިވެހިރާއްޖެ ސަރުކާރާ ހަވާލުކޮށްފައި ވަނީ ވިއެޓްނާމުން ލަންކާ އަށް ކަނޑައަޅާފައިވާ ސަފީރެވެ. ހޯމަ ދުވަހު މި ފައިސާއާ ރާއްޖޭގެ ފަރާތުން ހަވާލުވެވަޑައިގެންނެވީ ރާއްޖެއިން ލަންކާ އަށް ކަނޑައަޅާފައި ހުންނަވާ ސަފީރު އުމަރު އަބްދުއްރައްޒާގުއެވެ.

ސަފީރު ވަނީ މި ދަނޑިވަޅުގައި ވިއެޓްނާމްގެ ފަރާތުން ދިން އެހީތެރިކަން ފާހަގަ ކުރައްވާ ޝުކުރު އަދާކުރައްވާފައެވެ. ކޮވިޑް-19 ގެ ހާލަތާ ގުޅިގެން ބޭރުގެ އެކިއެކި ގައުމުތަކުން ދަނީ ރާއްޖެ އަށް އެހީތެރިކަން ފޯރުކޮށްދެމުންނެވެ. އެގޮތުން ބައެއް ގައުމުތަކުން ދަނީ ސިއްހީ ދާއިރާއަށް ބޭނުންވާ ސާމާނުތައް ވެސް އެކި ފަހަރުމަތިން ހަދިޔާކުރަމުންނެވެ. އޭގެ ތެރޭގައި އިންޑިއާ އަދި ޗައިނާ ހިމެނެއެވެ. އޭގެ އިތުރުން ރާއްޖޭގައި ރިސޯޓްތައް ހިންގަމުން އަންނަ ބޭރުގެ އެކި ފަރާތްތަކުން ވެސް ވަނީ މީގެ ކުރިން ޓެސްޓު ކިޓް ފަދަ ތަކެތި ހަދިޔާކޮށްފައެވެ. ރާއްޖޭގައި ކޮވިޑްގެ ހާލަތު ކުރިޔާ އަޅައި ބަލާއިރު ދަނީ ދުވަހެއް ދުވަހަކަށް ގޯސްވަމުންނެވެ. އަންގާރަ ދުވަހު އެކަނި ވެސް 199 ޕޮޒިޓިވް ކޭސް ރިޕޯޓްކުރެވި ޕޮޒިޓިވްވި ޖުމުލަ އަދަދު ވަނީ 8005 އަށް އަރާފައެވެ. މީގެ ތެރޭގައި ވެސް ގިނައީ ދިވެހިންނެވެ. މި ބަލިން ފަސޭހަވި މީހުންގެ އަދަދު އުޅެނީ 5265 ގައެވެ. ކޮވިޑު ބަލީގައި 29 މީހަކު ވަނީ ދުނިޔޭ ދޫކޮށްފައެވެ.