ކުރީގެ ރައީސް އަބްދުﷲ ޔާމީން އަބްދުލްގައްޔޫމްއަށް "ހެޔޮއެދޭ ފަރާތުން" ދިން ކަމަށް ބުނާ 5 މިލިއަން ޑޮލަރު ލިބިލެއްވި ގޮތާއި، ރައީސުލްޖުމްހޫރިއްޔާގެ މަގާމުގައި ހުންނަވައި، އެފަދަ ފައިސާއެއް ގަބޫލުފުޅު ކުރެއްވުމާ ގުޅޭގޮތުން ފަނޑިޔާރު ސުވާލު ކުރެއްވުމުން، އެފަދަ ފައިސާއެއް ގަބޫލުފުޅު ކުރެއްވުމަކީ ގާނޫނުން މަނާ ކަމެއް ނޫން ކަމަށް ރައީސް ޔާމީން ވިދާޅުވެއްޖެއެވެ.

އެމްއެމްޕީއާރުސީގެ ހިޔާނާތުގެ ފައިސާގެ ތެރެއިން 1 މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެ ފައިސާއިން މަނީ ލޯންޑަރ ކުރުމުގެ ކުށް ސާބިތުވެ، 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ފަރާތުން ހައިކޯޓުގައި އިސްތިއުނާފު ކޮށްފައިވާ މި މައްސަލައާ ގުޅިގެން އަންގާރަ ދުވަހު ބޭއްވި އަޑުއެހުމުގައި ކުރިއަށް ގެންދިޔައީ މައްސަލަ އިސްތިނާފު ކުރެއްވި ރައީސް ޔާމީންގެ ފަރާތުންނާއި ދައުލަތުގެ ފަރާތުން ފަހު ބަސް ވިދާޅުވުމުގެ ފުރުސަތެވެ.

ދެފަރާތުގެ ވާހަކަތަކަށްފަހު، މިމައްސަލަ ބައްލަވާ ފަނޑިޔާރުންގެ ބެންޗުގެ ފަނޑިޔާރު މުހައްމަދު ނިޔާޒު ވަނީ، ރައީސުލްޖުމްހޫރިއްޔާ ކަމުގެ މަގާމުގައި ހުންނަވާ ބޭފުޅަކަށް ހެޔޮއެދޭ ފަރާތަކުން ބޮޑެތި އަދަދުތަކުން ފައިސާ ލިބިފައިވާ ކަމަށް ރައީސް ޔާމީން ވިދާޅުވާއިރު، ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކަށް "ހެޔޮއެދޭ ފަރާތްތަކުން" އެގޮތަށް ދެވޭ ފައިސާ ގަބޫލު ކުރެއްވޭނެ ކަމަށް ގަބޫލުފުޅު ކުރައްވަންތޯ ސުވާލު ކުރައްވާފައެވެ.

ޖަވާބުގައި ރައީސް ޔާމީނާއި އެމަނިކުފާނުގެ ގާނޫނީ ޓީމުގެ ބޭފުޅުނަށް އެ ސުވާލަށް ޖަވާބު ދެއްވުމަށް އުނދަގޫ ގޮތެއް ހުރިކަން ވަނީ ފާހަގަ ކުރެވިފައެވެ. އެގޮތުން ކުޑަ ވަގުތު ކޮޅެއް ނެންގުވުމަށްފަހު ދިފާއީ ވަކީލު ޖަމީލު ވިދާޅުވީ، ސިޔާސީ ކަންކަމަށް ހެޔޮއެދޭ ފަރާތްތަކުން ދޭ ފައިސާ ސިޔާސީ ޕާޓީގެ ލީޑަރުގެ ހައިސިއްޔަތުން ގަބޫލުފުޅު ކުރެއްވުމަކީ ގާނޫނުން މަނާކަމެއް ނޫން ކަމަށެވެ. ފަނޑިޔާރުގެ އެ ސުވާލާ ގުޅިގެން ރައީސް ޔާމީން ވިދާޅުވީ، ސިޔާސީ ކަންކަން ހިންގަން ޖެހެނީ ކޮންމެހެން އިންތިހާބެއް ބޯމަތި ވުމުން ނޫންކަ މަށާއި، ސިޔާސީ ހަރަކާތަކީ އަބަދުވެސް ހިންގާ ހަރަކާތެއް ކަމަށްވާތީ، ސިޔާސީ ކަންކަމަށް ހެޔޮއެދޭ ފަރާތްތަކުން ދޭ ފައިސާ ގަބޫލު ކުރެއްވުމަކީ ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކަށް ވިޔަސް، ގާނޫނުން މަނާ ކަމެއް ނޫން ކަމަށެވެ.

ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު ކޮށްގެން ނުވާނޭ ކަންތައްތައް ބަޔާން ކުރާ ގާނޫނު އަސާސީގެ 119 ވަނަ މާއްދާ ބުނަނީ، ވިޔަފާރި ކުރުމާއި އާމްދަނީ ހޯދުމަށް ފަންނީ މަސައްކަތެއްގައި ޝާމިލުވެ، އާމްދަނީއެއް ލިބޭފަދަ އެހެން އެއްވެސް މަސައްކަތެއް ކޮށްގެން ނުވާނެ ކަމަށެވެ. އަދި ދައުލަތާއި އެހެން އެއްވެސް ފަރާތަކާ ދެމެދު ކުރެވޭ މުއާމަލާތެއްގައި މާލީ އެއްވެސް މަސްލަހަތެއް ބާއްވައިގެން ނުވާނެ ކަމަށް ވެސް ގާނޫނުއަސާސީގެ މިމާ އްދާގައި ބުނެފައިވެއެވެ.

ދެވަނަ ކަމަކަށް ފަނޑިޔާރު ނިޔާޒު ފާހަގަ ކުރެއްވީ، ކުރީގެ އޮޑިޓަރ ޖެނެރަލް ނިޔާޒު އިބްރާހީމް 2014 ވަނަ އަހަރު ނެރުއްވާފައިވާ އޮޑިޓްގައި ދައުލަތުގެ ކުންފުނިތަކެއް މެދުވެރިކޮށް މާލީ މަންފާތަކެއް ބަޔަކު ނަގަމުންދާކަމުގެ ތުހުމަތުތަކެއް ކޮށްފައިވާ ކަމާއި އެ ރިޕޯޓުގައި ފާހަގަކޮށްފައިވާ މުހިއްމު ބައެއް ކަންކަމުގެ ވާހަކަތަކެވެ.

އެކަމާ ގުޅިގެން ރައީސް ޔާމީން ވިދާޅުވީ، ކުރީގެ އޮޑިޓަރ ޖެނެރަލް ހަމައެކަނި ފާހަގަކޮށްފައިވަނީ، ސަރުކާރު ކުންފުނިތަކެއް މެދުވެރިކޮށް، ޑޮލަރު މާރުކުރުމުގެ މައްސަލައެއް ކަމަށެވެ. އެމްއެމްޕީއާރުސީގެ ހިޔާނާތުގެ ވާހަކައެއް ހިއްސާ ކުރައްވާފައި ނުވާ ކަމަށް ރައީސް ޔާމީން ވިދާޅުވިއެވެ.

ނަމަވެސް ކުރީގެ އޮޑިޓަރ ޖެނެރަލް ނިޒާމު ވަނީ ޑޮލަރު މާރު ކުރުމުގެ ނަމުގައާއި ފަޅު ރަށްތަކެއް ވިއްކުމާގުޅޭ މުއާމަލާތްތަކުގެ ވާހަކަތަކެއް 2014 ގައި ރައީސް ޔާމީންގެ ސަމާލުކަމަށް ގެނެސްފައެވެ.

އެމްއެމްޕީއާރުސީގެ ހިޔާނާތުގެ މައްސަލަ މިހާ ބޮޑުވެގެން ދިޔައީ ވެސް ރައީސް ޔާމީނާއި ސަރުކާރަށް އެކަންކަން އެނގިވަޑައިގެން، އަޅާނުލައްވާ ހުންނެވުމުން ކަމަށް އެމްއެމްޕީއާރުސީގެ ހިޔާނާތުގައި މައްސަލަ ދިރާސާ ކުރާ، ރައްޔިތުންގެ މަޖިލީހުގެ މާލިއްޔަތު ކޮމެޓީއަށް މައުލޫމާތު ދެއްވަމުން މިހާރު އޮޑިޓް އޮފީހުގެ އިސްވެރިން ވެސް ވިދާޅުވެފައިވެއެވެ.

ރައީސް ޔާމީންގެ ގާނޫނީ ވަކީލުންގެ ޓީމުގެ އިސްގާނޫނީ ވަކީލު ޑރ. މުހައްމަދު ޖަމީލު އަހުމަދު އާއި ރައީސް ޔާމީންގެ ދިފާއުގައި ވާހަކަ ދެއްކެވުމަށް ދެއްވި ފުރުސަތުގައި މައިގަނޑު ގޮތެއްގައި ވާހަކަ ދައްކަވާފައިވަނީ، ރައީސް ޔާމީންގެ އެކައުންޓަށް އެސްއޯއެފުން ޖަމާކުރި، 1 މިލިއަން ޑޮލަރަކީ ގއ. ވޮޑުމުލާގެ އިކުއިޒިޝަން ކޮސްޓްގެ ފައިސާ ނޫންކަން ހާމަ ކުރުމެވެ. އަދި އެ ފައިސާ އަކީ ވޮޑެމުއްލާގެ އިކުއިޒިޝަން ކޮސްޓްގެ ގޮތުގައި އެމްއެމްޕީއާރުސީއަށް ލިބެންޖެހޭ ފައިސާކަން ސާބިތު ކުރެވޭ ހެއްކެއް ވެސް ދައުލަތަށް ދެއްކިފައިނުވާ ކަމަށް ރައީސް ޔާމީންގެ ގާނޫނީ ޓީމުން ވިދާޅުވި އެވެ. ދެވަނަ ކަމެއްގެ ގޮތުގައި މައިގަނޑު ގޮތެއްގައި ރައީސް ޔާމީންގެ ގާނޫނީ ޓީމުން ފާހަގަ ކުރައްވާފައިވަނީ، ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތު އަދި އެންޓި ކޮރަޕްޝަން ކޮމިޝަނުގެ ކުރީގެ ނާއިބު ރައީސް މުއައްވިޒު ރަޝީދުގެ ޝަރީއަތަށް ދެއްވާފައިވާ ހެކި ބަހަކީ ފާސިޤް ހެކިބަސްތަކެއް ކަމާއި، އަދި މުއައްވިޒު ކަނޑައެޅިގެން ޝަރީއަތުގައި ދޮގު ހެކިބަސް ދެއްވާފައިވުން ކަމަށް ދިފާއުގައި ވިދާޅުވެފައި ވެއެވެ. އަދި އެ ތިން ބޭފުޅުންނަކީ ވެސް އެމްއެމްޕީއާރުސީގެ ހިޔާނާތުގެ ތުހުމަތު ކުރެވޭ ބޭފުޅުންނަށް ވެފައި، ސަރުކާރުގެ ނުފޫޒުން، އެއްބަސްވުންތަކެއް ހަދައިގެން ވަކި ގޮތަކަށް ހެކިބަސް ދިނުމަށް އެއްބަސްވެފައިވާ ބޭފުޅުން ކަމަށްވެސް ރައީސް ޔާމީންގެ ދިފާއުގައި ވިދާޅުވެފައި ވެއެވެ.

ދިފާއުގައި ދައްކަވަންހުރި ވާހަކަތައް ނިންމާލައްވަމުން، ޖަމީލު ވަނީ، ރައީސް ޔާމީންގެ މައްޗަށް ކްރިމިނަލް ކޯޓުން ކޮށްފައިވާ އެހުކުމް ހައިކޯޓުން ދަމަހައްޓައިފިނަމަ، މުޅި ޖިނާއި އަދުލްގެ ނިޒާމު ބޮއްސުންލާނެ ކަމަށް ވިދާޅުވެ، ކަންތައްތަކެއް ފާހަގަ ކުރައްވާފަ އެވެ. އެގޮތުން، މައިގަނޑު ގޮތެއްގައި ޖަމީލު ފާހަގަ ކުރައްވާފައިވަނީ، ހިންގާފައިނުވާ ތަހުގީގަކަށް ދައުވާކުރުމުގެ ފުރުސަތު ހުޅުވިގެން ދިއުމާއި، ޝަރީއަތް ހިންގުމުގެ އިޖުރާއަތުތަކާ ހިލާފަށް ޝަރީއަތް ކުރުމުގެ ފުރުސަތު ހުޅުވިގެން ދިއުމާއި، ފާސިޤް އަދި ދޮގު ހެކިބަސް ޝަރީއަތުން ގަބޫލުކުރުމާއި ތަހުގީގު މަރުހަލާގައި ކަނޑައެޅިފައިވާ އިޖުއާއަތުކަކަކީ އެއްވެސް އެއްޗަކަށްނުވެ ބޭކާރު އިޖުރާއަތަކަށްވުން ފަދަ ކަންކަން ދިމާވާނެ ކަމަށް ޖަމީލު ވިދާޅުވި އެވެ.

ދައުލަތުން ފަހުބަހުގެ ގޮތުގައި މައިގަނޑު ގޮތެއްގައި ވިދާޅުވެފައިވަނީ، ރައީސް ޔާމީންގެ މައްޗަށް ކޮށްފައިވަނީ މަނީ ލޯންޑަރިންގގެ ދައުވާއެއް ކަމާއި ދައުވާގައި ހުންނަޖެހޭ ރުކުންތަކާއި އުންސުރުތައް ފުރިހަމަވާ ކަމަށެވެ. އަދި ރައީސް ޔާމީންގެ މައްޗަށް މިދައުވާ ސާބިތުވާކަމުގެ ގާނޫނީ މާއްދާތަކަށް ރިއާޔަތްކޮށް ހަރުދަނާ ނުކުތާތަކެއް ދައުލަތުން ފާހަގަކޮށްފައި ވެއެވެ. އެގޮތުން ފުރަތަމަ ކަމަކަކީ ރައީސް ޔާމީންގެ އަމިއްލަފުޅު އެކައުންޓަށް އެސްއޯއެފުން 1 މިލިއަން ޑޮލަރު ޖަމާކުރިއިރު، އެމަނިކުފާނަކީ ރައީސުލްޖުމްހޫރިއްޔާގެ މަގާމުގައި ހުންނެވި ފަރާތަށް ވެފައި، އަދި އެމްއެމްޕީއާރުސީގެ ހިޔާނާތުގެ މައްސަލަތައް އޭގެ މާކުރިން ވެސް ފަޅާއަރާފައި އޮވެ، އޮޑިޓް ރިޕޯޓްގައިވެސް، އެސްއޯއެފަށް އެމްއެމްޕީއާރުސީން ދައުލަތަށް ވަންނަންޖެހޭ 70 މިލިއަން ޑޮލަރަށްވުރެ ގިނަ ފައިސާ ވަދެފައިވާ ކަމަށް ބުނެފައިވާއިރު، އެސްއޯއެފުން ރައީސް ޔާމީންގެ އެކައުންޓަށް ޖަމާކުރި 1 މިލިއަން ޑޮލަރަކީ އެމްއެމްޕީއާރުސީގެ ހިޔާނާތުގެ ފައިސާގެ ބައެއްކަން ސަމާލަތް ބުއްދިހުރި އިންސާނަކަށް ގަބޫލު ކުރެވޭނެ ކަމަށެވެ. މީގެއިތުރުން، ރައީސް ޔާމީން ވިދާޅުވާ ގޮތުންނަމަ، ސިޔާސީ ބޭނުމަށް ދިން ފައިސާއެއް، އަމިއްލަފުޅު އެކައުންޓަކަށް ޖަމާކޮށް، އަދި އޭގެފަހުން އެފައިސާ ނުނެގޭ ގޮތަށް ޖެނެރަލް އިންވެސްޓްމަންޓް އެކައުންޓެއްގައި ބަހައްޓައިގެން އިންވެސްޓް ކުރުމަކީ ސިޔާސީ ހަރަކާތް ހިންގުމަށް ދީފައިވާ ފައިސާކަމާމެދު ސަލާމަތް ބުއްދި ހުރި އިންސާނަކު ގަބޫކު ނުކުރާނެ ކަމަށެވެ. އަދި އަމުދުން، ރައީސް ޔާމީންގެ އެކައުންޓަށް ވަދެފައިވަނީ ދައުލަތުގެ ފައިސާކަން އޭސީސީން ބުނެފައިވަނިކޮށް، އެފައިސާ ޖެނަރަލް އިންވެސްޓްމަންޓް އެކައުންޓަކަށް ޖަމާކޮށް، ފައިދާ ނަގަމުންދިއުމަކީ އަދިއެއަށްވުރެ، ހަމަނުޖޭހޭ ވާހަކައެއްކަމަށް ވެސް ދައުލަތުގެ ވަކީލު ވިދާޅުވި އެވެ.

މި އަޑުއެހުމުގައި ދިފާއީ ވާކީލުންނާއި ރައީސް ޔާމީންގެ ފަރާތުން ފަހުބަހެއްގެ ގޮތުގައި ދައްކަންވަން ބޭނުންފުޅުވި ހުރިހާ ވާހަކައެއް ދެއްކެވުމުގެ ފުރުސަތު ޝަރީއަތުން ވަނީ ދެއްވާފަ އެވެ. އަދި ދައުލަތުގެ ގާނޫނީ ވަކީލުންނަށް ވެސް އެފުރުސަތު ދެއްވުމަށްފަހު، އަދި ފަނޑިޔާރުންގެ ބެންޗުގެ ފަނޑިޔާރުން ވެސް އޮޅުން ފިލުވަން ބޭނުންވާ ކަމެއް އޮތްނަމަ އެފުރުސަތު ރިޔާސަތު ބެލެހެއްޓެވި ފަނޑިޔާރު ހުސައިން މަޒީދު ވަނީ ދެއްވާފަ އެވެ. ފަނޑިޔާރު މަޒީދާއި ފަނޑިޔާރު ނިޔާޒުގެ އިތުރުން ދެން ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު ހުސައިން ޝަހީދު އެވެ.

އިތުރުކަމެއް ފަނޑިޔާރުން އޮޅުން ފިލުވަން ނެތްނަމަ، މިމައްސަލާގައި ދެން އޮންނާނީ ހުކުމް ކުރުމަށް ބޭއްވޭ ޝަރީއަތެވެ.