ހުޅުމާލެ ޕޮލިސްގެ އައު އިމާރާތް ރަސްމީކޮށް ހުޅުވައިފި
އިމާރާތުގެ މަސައްކަތް ފެށީ 2017 ވަނަ އަހަރުގެ ޖޫން 14 ގައި
ހުޅުމާލެ ޕޮލިސްގެ އައު އިމާރާތް
ހުޅުމާލޭގައި އިމާރާތްކުރި ހުޅުމާލެ ޕޮލިސްގެ އައު އިމާރާތް ރަސްމީކޮށް ހުޅުވައިފިއެވެ.
އަންގާރަ ދުވަހުގެ ހެނދުނު ހުޅުމާލޭގައި ބޭއްވި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ހޯމްއެފެއާޒް އިމްރާން ޢަބްދުﷲ އެވެ. ޕޮލިސް ސްޓޭޝަން ރަސްމީކޮށް ހުޅުއްވައި ދެއްވީ މިނިސްޓަރ ހޯމްއެފެއާޒް އިމްރާން ޢަބްދުﷲ އާއި ކޮމިޝަނަރ އޮފް ޕޮލިސް މުޙައްމަދު ޙަމީދެވެ.
ހުޅުމާލެ ޕޮލިސްގެ އައު އިމާރާތުގެ މަޝްރޫއަކީ 2017 ވަނަ އަހަރުގެ ޖޫން 14 ވަނަ ދުވަހު އިފްތިތާހު ކުރެވިގެންދިޔަ މަޝްރޫއުއެކެވެ. 2019 ނޮވެމްބަރު 12 ވަނަ ދުވަހު ނިމުނު މި އިމާރާތަކީ ތިން ފަންގިފިލައަށް އިމާރާތްކޮށްފައިވާ އިމާރާތެކެވެ. ޖާގައިގެ ގޮތުން ތަނަވަސް އަދި ޒަމާނީ ޕޮލިސް ސްޓޭޝަނަކުން ރައްޔިތުންނަށް ހިދުމަތް ފަސޭހައިން ދެވޭނެފަދަ ބައިތަކާ ވަސީލަތްތަކުގެ މައްޗަށް ބިނާކޮށްފައިވާ މި އިމާރާތަށް 27.5 މިލިއަން ރުފިޔާ ހަރަދުވެފައިވެއެވެ.
ހުޅުމާލެ ޕޮލިސްގެ އައު އިމާރާތް ހުޅުވުމަށް ބޭއްވި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާން ޔޫސުފާއި ފުލުހުންގެ ސީނިއަރ އޮފިސަރުންނާއި އެޗްޑީސީގެ މެނޭޖިންގ ޑިރެކްޓަރ ސުހެއިލް އަހުމަދާއި ހުޅުމާލެ ޕޮލިސްގެ ވެރިންނާއި ހުޅުމާލެ ޕޮލިސްގައި މަސައްކަތް ކުރާ މުވައްޒަފުން ބައިވެރިވެލެއްވިއެވެ.
