ކުރީ ސަރުކާރުގެ ޓެންޑަރ ބޯޑުން އެވޯޑް ކުރި ޕްރޮޖެކްޓްތަކަށްވުރެ ގިނަ ޕްރޮޖެކްޓް މިސަރުކާރުން އެވޯޑް ކޮށްފި
31 އޯގަސްޓު 2020 | ހޯމަ 08:11މިހާރު ވެސް ގާތްގަނޑަކަށް 65 ޕްރޮޖެކްޓްގެ މަސައްކަތް ކުރިއަށްދޭ
ކޮވިޑް-19ގެ ހާލަތުގައި ވެސް އަތޮޅުތެރޭގެ ތަރައްގީއަށް ހިންގާ މަޝްރޫއުތައް ނުހުއްޓި ކުރިއަށްދާ ކަަމަށް ސަރުކާރުން ބުނޭ
ކުރީގެ ރައީސް އަބްދުﷲ ޔާމިންގެ ވެރިކަމުގައި ނޭޝަނަލް ޓެންޑަރ ބޯޑުން އެވޯޑް ކުރި ޕްރޮޖެކްޓްތަކުގެ ޖުމްލަ އަދަދަށްވުރެ ގިނަ ޕްރޮޖެކްޓްތައް މިސަރުކާރުގައި މިހާރު އެވޯޑް ކުރެވިފައިވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި މިނިސްޓަރު އަމީރު ވިދާޅުވީ ކޮވިޑް-19ގެ ހާލަތުގައި ވެސް ތަރައްގީއަށް ހިންގާ މަޝްރޫއުތައް ނުހުއްޓި ކުރިއަށްދާ ކަމަށެވެ. އެގޮތުން މިހާރު ވެސް ގާތްގަނޑަކަށް 65 ޕްރޮޖެކްޓް މަސައްކަތް ކުރިއަށްދާ ކަމަށް މިނިސްޓަރު ވިދާޅުވިއެވެ.
އޭގެ ތެރޭގައި ކޯސްޓަލް ޕްރޮޓެކްޝަންގެ 2 ޕްރޮޖެކްޓް، ހަރބާގެ 9 ޕްރޮޖެކްޓު، ތައުލީމީ ދާއިރާގެ 2 ޕްރޮޖެކްޓު، ފެނާ ނަރުދަމާގެ ގާތްގަނޑަކަށް 31 ޕްރޮޖެކްޓު، ވޭސްޓް މެނޭޖްމެންޓްގެ ގާތްގަނޑަކަށް ހަތަރު ޕްރޮޖެކްޓް އެބަ ކުރިއަށްދާ ކަަމަށް މިނިސްޓަރު ވިދާޅުވިއެވެ.
ރާއްޖޭގެ 88 ރަށުގައި ޕްރޮޖެކްޓްތަކުގެ ތެރެއިން ގާތްގަނޑަކަށް 67 ޕްރޮޖެކްޓް ނިމިފައިވާކަން ފާހަގަކުރައްވައި މިނިސްޓަރު އަމީރު ވިދާޅުވީ މިހާތަނަށް 233 ޕްރޮޖެކްޓް ވަނީ އެވޯޑްކޮށްފައިވާ ކަމަށެވެ.
ކުރީގެ ރައީސް އަބްދުﷲ ޔާމީންގެ ސަރުކާރަށް އަލިއަޅުއްވާލައްވާ މިނިސްޓަރު އަމީރު ވިދާޅުވީ 2018 ވަނަ އަހަރު 39 ޕްރޮޖެކްޓެއް 254 މިލިއަން ރުފިޔާ، 2017 ވަނަ އަހަރު 53 ޕްރޮޖެކްޓް 851 މިލިއަން ރުފިޔާ، 2016 ވަނަ އަހަރު 85 ޕްރޮޖެކްޓް 1.7 ބިިލިއަން ރުފިޔާ، 2015 ވަނަ އަހަރު 115 މިލިއަން ރުފިޔާ، އަދި 2014 ވަނަ އަހަރު 1.6 ބިލިއަން ރުފިޔާ ހަރަދު ކޮށްފައިވާ ކަަމަށެވެ.
މިނިސްޓަރު އަމީރު ވިދާޅުވީ ކުރީގެ ސަރުކާރުން ނޭޝަނަލް ޓެންޑަރ ބޯޑުން އެވޯޑް ކުރި ޕްރޮޖެކްޓްތަކުގެ ޖުމްލަ އަދަދަށްވުރެ ގިނަ ޕްރޮޖެކްޓްތައް މިފާއިތުވެދިޔަ ދެއަހަރު ދުވަހުގެ ތެރޭގައި އެވޯޑް ކުރެވިފައިވާ ކަމަށެވެ.
