ނިމިދިޔަ 2019 ވަނަ އަހަރުވެސް މިފްކޯ އިން 116 މިލިއަން ޑޮލަރުގެ ގެއްލުމެއް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ލިބިފައިވާ ކަމަށް އެ ކުންފުނިން ބުނެފިއެވެ.

އެސްޓީއޯގެ 2019 ވަނަ އަހަރުގެ އަހަރީ އާންމު ޖަލްސާގައި ވާހަކަދައްކަވަމުން އެކުންފުނީގެ މެނޭޖިން ޑިރެކްޓަރު ހުސެއިން އަމްރު ވަނީ މިފްކޯ އަކީ ފައިދާ ހުރި ކުންފުންޏެއް ކަމަށް ހެދުމަށް މަސައްކަތް ކުރާނެ ކަމަށް މިދިޔަ އަހަރު ވިދާޅުވެފައި ވާނެ ކަމަށާއި އެހެން ނަމަވެސް މިދިޔަ އަހަރު ނިމުނު އިރުވެސް މިފްކޯ އިން އެސްޓީއޯ ގްރޫޕަށް 116 މިލިއަން ޑޮލަރުގެ ގެއްލުމެއް ލިބިފައިވާ ކަމަށް ވިދާޅުވެފައެވެ.

މިފްކޯ އަށް ގެއްލުންވާ މައިގަނޑު ސަބަބަކީ މިފްކޯގެ ބިޒްނަސް މޮޑެލްގެ ސަބަބުންވާ ގެއްލުން ކަމަށާއި މަސްވެރިންގެ އަތުން މަސް ގަންނަ އަގަށް ވުރެ ދަށް އަގުގައި ރާއްޖެ އިން ބޭރަށް މަސް ވިއްކަން ޖެހުމުން ކުންފުންޏަށް ގެއްލުންވާ ކަމަށް އަމްރު ވިދާޅުވިއެވެ. އެގޮތުން މިދިޔަ އަހަރު ކުރެވުނު މަސައްކަތުން ރާއްޖޭގެ މަސް ދުނިޔޭގެ މާރުކޭޓުގައި މަދުވެގެން ދިއުމުން ރާއްޖޭގެ މަހުގެ އަގު ބޮޑުތަނުން މައްޗަށް ދާކަން ފާހަގަކުރެވިފައިވާ ކަމަށް އަމްރު ވިދާޅުވިއެވެ. ރާއްޖޭގެ މަހުގެ އަގު ބޮޑުތަނުން މައްޗަށް ނުދަނީ ބޭރުގެ މާކެޓް ފްލަޑްވާ ވަރަށް ރާއްޖެއިން މަސް ބޭރުކުރަން ޖެހުމުން ކަމަށް އަމްރު ވިދާޅުވިއެވެ. އަދި އެގޮތަށް އެ ދިމާވަނީ ރާއްޖޭގައި ސްޓޯރޭޖް ކެޕޭސިޓީ ނެތުމުން ކަމަށް އަމްރު ފާހަގަކުރެއްވިއެވެ.

އަމްރު ވިދާޅުވީ މިފްކޯގެ 3،000 ޓަނުގެ ސްޓޯރޭޖް ކެޕޭސިޓީ އިތުރުކުރުމާއި މިފްކޯގެ ހިންގުން ހަރުދަނާ ކުރުމަށް އިންޓަނޭޝަނަލް މާކެޓުގައި ބްރޭންޑު ކުރިއެރުވުމުގެ މުހިންމުކަން ފާހަގަކުރެވި އެކަން ކުރުމަށް މިހާރު މަސައްކަތް ކުރަމުންދާ ކަމަށެވެ. އަދި މިފްކޯގެ ބިޒްނަސް މޮޑަލަށް ދާއިމީ ހައްލެއް ހޯދުމަށް ސަރުކާރާއެކު މަޝްވަރާތައް ކުރެވި އެދެވޭ ކުރިއެރުމެއް ލިބިފައިވާ ކަމަށް އަމްރު ވަނީ ވިދާޅުވެފައެވެ.