އިންޑިއާގެ އެހީ ނުލިބިގެން މެމްބަރު އާދަމް ޝަރީފް ކަންބޮޑުވެއްޖެ
30 އޯގަސްޓު 2020 | އާދީއްތަ 17:23މަޑުއްވަރީގައި ގާއިމްކުރާ އައިސްޕްލާންޓުގެ މައްސަލައިގައި އާދަމް ޝަރީފް މަޖިލީހަށް ސުވާލު ހުށަހެޅި މިއީ 2 ވަނަ ފަހަރު
މަޑުއްވަރީ ދާއިރާގެ މެންބަރު އާދަމް ޝަރީފް އުމަރު؛ އިންޑިއާ ސަރުކާރުގެ އެހީގައި ހަދާ އައިސްޕްލާންޓުގެ މަސައްކަތާއި ގުޅިގެން އޭނާ ވަނީ ސުވާލު ހުށަހަޅުއްވާފައި
އިންޑިއާއިން ރ. މަޑުއްވަރީގައި ގާއިމްކުރާ އައިސްޕްލާންޓު ބެހެއްޓުން ލަސްވާތީ އެ ދާއިރާގެ މެންބަރު އާދަމް ޝަރީފް ކަންބޮޑުވެވަޑައިގެންފިއެވެ.
އިންޑިއާއިން ރާއްޖެ ހިފަން އުޅޭ ކަމަށާއި، ރާއްޖޭގެ ހާރިޖީ އަދި ދާހިލީ ކަންކަމަށް އިންޑިއާއިން އަތްބާނަނަށް އުޅޭ ކަމަށް ބުނެ ހަގީގަތެއް ނެތް ވާހަކަތައް ފަތުރާ ރައްޔިތުންގެ މެދުގައި އަވަށްޓެރި އިންޑިއާއާއި މެދު ނަފްރަތު އުފައްދަވަމުން ގެންދަވާ އާދަމް ޝަރީފް ވަނީ ހޯމަ ދުވަހު އޮންނަ ރައްޔިތުންގެ މަޖިލީހުގެ 2020 ވަނަ އަހަރުގެ 33 ވަނަ ޖަލްސާއަށް އިންޑިއާއިން ރ. މަޑުއްވަރީއަށް ދިނުމަށް ކަނޑައެޅި އެހީ ލިބުން ލަސްވެގެން ސުވާލު ކުރައްވަން ހުށަހަޅުއްވާފައެވެ.
މެމްބަރު އާދަމް ޝަރީފް، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަލްފާޟިލާ ޒަހާ ވަޙީދުއާ ކުރައްވާ ސުވާލެއްގެ ގޮތުގައި މަޖިލީހަށް ހުށަހަޅުއްވާފައިވަނީ ރ.މަޑުއްވަރީގައި އިންޑިޔާ ސަރުކާރުގެ އެހީގައި ޤާއިމުކުރުމަށް ހަމަޖެހިފައިވާ އައިސް ޕްލާންޓް ޤާއިމުކުރުމުގެ މަސައްކަތް ލަސްވަނީ ކީއްވެތޯ އަދި އައިސް ޕްލާންޓުގެ މަސައްކަތް ނިމި، ޚިދުމަތް ލިބެން ފަށާނީ ކޮން ތާރީޚެއްގައިތޯއެވެ.
މިއީ އާދަމް ޝަރީފް އިންޑިއާގެ އެހީ ނުލިބިގެން މިކަމާއި ސުވާލު ކުރައްވާ ދެވަނަ ފަހަރެވެ. މީގެ ކުރިން އިންޑިއާގެ ސަރުކާރުގެ ހިލޭ އެހީގެ ދަށުން ރ. މަޑުއްވަރީގައި ބަހައްޓާ އައިސްޕްލާންޓާ ގުޅޭގޮތުން ފިޝަރީޒް މިނިސްޓަރު ޒަހާ ވަހީދުއާ ސުވާލުކުރަން ހުށަހެޅުއްވިއެވެ.
ކޮވިޑް-19 އާ ގުޅިގެން ރާއްޖޭގެ ރައްޔިތުންނަށް ގިނަ އެހީތަކެއް އިންޑިއާ އިން ދެމެން ގެންދާ މި ދަނޑިވަޅުގައި، ރައްޔިތުންގެ ހިތުގައި ނަފްރަތު އުފެއްދުމަށް ޕީޕީއެމް އާއި ޕީއެންސީ ގުޅިގެން ހިންގާ ދަށުދަރަޖައިގެ ކަންކަމުގައި ނަގާ ކިޔާ ބޭފުޅެއްގެ ގޮތުގައި ޔާމީން ސަރުކާރުގައި ޑިފެންސް މިނިސްޓަރުކަން ވެސް ކުރެއްވި އާދަމް ޝަރީފް އުޅުއްވާކަން އަންނަނީ ފާހަގަ ކުރެވެމުންނެވެ.
