ކޮވިޑް-19 ޓެސްޓު ހަދަން މެސީ ހާޒިރެއް ނުވި

ޕްރީ-ސީޒަން ފެށުމުގެ ގޮތުން ބާސެލޯނާގެ ކުޅުންތެރިން ކޮވިޑް-19 އަށް އާދީއްތަ ދުވަހު ޓެސްޓު ކުރިއިރު، ކޮވިޑް-19 ޓެސްޓު ހެދުމަށް އެ ޓީމުގެ ކެޕްޓަން ލިއޮނެލް މެސީ ހާޒިރެއް ނުވާ ކަމަށް ރިޕޯޓުތައް ބުނެފިއެވެ.

އައު ސީޒަނަށް ތައްޔާރުވުމުގެ ގޮތުން ބާސާއިން ޕްރީ-ސީޒަން ފެށުމަށް ތާވަލުކޮށްފައިވަނީ ހޯމަ ދުވަހުއެވެ. އެހެންކަމުން އާދިއްތަ ދުވަހު ވަނީ ޓީމުގެ ކުޅުންތެރިންނާއި އޮފިޝަލުން ކޮވިޑް-19 އަށް ޓެސްޓު ކޮށްފައެވެ. އެކަމަކު އާދީއްތަ ދުވަހު ކުރިއަށް ގެންދިޔަ ޓެސްޓުތައް ހަދަން މެސީ ހާޒިރުވެފައިނުވާއިރު، އޭނާ އަކީ ބާސާގެ ކުޅުންތެރިއެއް ނޫން ކަމަށް މެސީ ގަބޫލުކުރާ ކަމަށް ރިޕޯޓުތައް ބުނެއެވެ.

ދާދި ފަހުން މެސީ ވަނީ ބާސާ ދޫކޮށްލަން ނިންމައި، އެކަން އެ ކުލަބުގެ މެނޭޖުމަންޓަށް އަންގާފައެވެ. ބާސާއާއެކު މެސީ ހަދާފައިވާ އެއްބަސްވުން އަންނަ އަހަރުގެ ހޫނު މޫސުމުގައި ހަމަވަން އޮތްއިރު، މިހާރު އޮތް ގޮތުންނަމަ މި ޓްރާންސްފާ ބާޒާރުގައި މެސީ ގެންދަން ބޭނުންވާ ކުލަބަކުން، އެއްބަސްވުން އުވާލަން 700 މިލިޔަން ޔޫރޯ ދައްކަން ޖެހޭނެއެވެ. އެހެންކަމުން މެސީ ވަނީ އެއްބަސްވުން ބަދަލުކޮށް، މި ޓްރާންސްފާ ބާޒާރުގައި ހިލޭ އެ ކުލަބު ދޫކޮށް ދިޔުމުގެ ފުރުސަތު ތަނަވަސްކޮށްދިނުމަށް އެދެފައެވެ.

އެކަމަކު ރިޕޯޓުތައް ބުނާ ގޮތުން މެސީގެ އެއްބަސްވުމާ ގުޅޭގޮތުން މަޝްވަރާ ނުކުރަން ބާސާގެ މެނޭޖުމަންޓުން ވަނީ ނިންމާފައެވެ. އަދި މީގެ ކުރިން މެސީގެ އެއްބަސްވުމަށް ލުއި ދިނުމަށް ބާސާގެ ލޯ ފާމުން ނަސޭހަތްތެރިވުމާއެކު، އެ ލޯ ފާމް ވަކިކޮށްފައިވާ ކަމަށްވެސް ރިޕޯޓުތައް ބުނެއެވެ. ރިޕޯޓުތައް ބުނާ ގޮތުން އެއްބަސްވުން ބަދަލުކުރުމަށް ބާސާގެ މެނޭޖުމަންޓުން އެއްބަސްނުވެއްޖެ ނަމަ، މެސީގެ ވިސްނުން ހުރީ ޤާނޫނީ ވަކީލުން މެދުވެރިކޮށް ކުރިއަށް ދިޔުމަށެވެ.

އެކަމަކު މީގެ ކުރިން މީޑިއާއަށް މައުލޫމާތު ދެމުން ބާސާގެ ސްޕޯޓިންގ ޑިރެކްޓަރު ރާމޮން ޕްލޭނެސް ބުނީ މެސީ އާއި ބާސާއާ ދެމެދު ގިނަ މަޝްވަރާތަކެއް ކުރިއަށްދާ ކަމަށާއި، އެ ވާހަކަތައް މީޑިއާގައި ތަފްސީލުކޮށް ދައްކަން ބޭނުންނުވަނީ އެ ދެ ފަރާތަށް އިހުތިރާމް ކުރުމުގެ ގޮތުން ކަމަށެވެ. އަދި މެސީ ދޫކޮށްލަން ބާސާގެ މެނޭޖުމަންޓުން ބޭނުންނުވާ ކަމަށްވެސް ވަނީ ބުނެފައެވެ.

މެސީ ބާސާ ދޫކޮށްލާނެ ކަމަށް ބެލެވޭއިރު، ރިޕޯޓުތައް ބުނާ ގޮތުން މެސީ ބަދަލުވުން އެންމެ ގާތީ ޕެޕް ގާޑިއޯ އިރުޝާދު ދެމުން އަންނަ މެންޗެސްޓާ ސިޓީއަށެވެ. އަދި ޕީއެސްޖީ އާއި، މެންޗެސްޓާ ޔުނައިޓެޑް އަދި އިންޓަ މިލާނުންވެސް މެސީއަށް ފާރަލަމުން އަންނަ ކަމަށް ރިޕޯޓުތައް ބުނެއެވެ.

ރިޕޯޓުތައް ބުނާ ގޮތުން މެސީ ބާސާ ދޫކޮށްލަން ބޭނުންވާ އެންމެ ބޮޑު އެއް ސަބަބަކީ އެ ކުލަބުގެ ރައީސް ޖޯސެފް މާރިއާ ބާޓޮމެއޫގެ ނިންމުންތަކާ މެދު ހިތްހަމަނުޖެހޭތީއެވެ. އަދި ބާސާގެ ރައީސްގެ މަގާމުގައި ބާޓޮމެއޫ ހުރިހާ ދުވަހަކު މެސީއަށް ބާސާގައި ކުރިމަގެއް ނެތް ކަމަށް އޭނާ ގަބޫލުކުރާ ކަމަށްވެސް ބުނެއެވެ.

ބާސާގެ ސީނިއާ ޓީމުން 2004 ވަނަ އަހަރު ކެރިއަރު ފެށި މެސީއަކީ ބާސާގެ ތާރީޚުގައި އެޓީމަށް އެންމެ ގިނަ ލަނޑު ޖަހާދީފައިވާ ކުޅުންތެރިޔާއެވެ. އެގޮތުން މިހާތަނަށް 634 ލަނޑު މެސީ ކާމިޔާބުކޮށްފައިވާއިރު، އޭނާ ވަނީ ބާސާއާއެކު ސްޕެނިޝް ލީގު 10 ފަހަރު ހޯދާފައެވެ. އަދި ޗެމްޕިއަންސް ލީގު ހަތަރު ފަހަރު ހޯދާފައި ވާއިރު، މެސީ ވަނީ މިހާތަނަށް ދުނިޔޭގެ އެންމެ މޮޅު ކުޅުންތެރިޔާއަށްދޭ ބަލޮންޑޯ އެވޯޑް ހަ ފަހަރު ހޯދާފައެވެ. މެސީ އަކީ މި އެވޯޑް އެންމެ ގިނައިން ހޯދި ކުޅުންތެރިޔާއެވެ.