ކަރެކްޝަންސްގެ ހެޑްއޮފީސް މެދުވެރިކޮށް ގައިދީންނަށް އަންނައުނު ފޮނުވޭނެ: ކޮމިޝަނަރ އޮފް ޕްރިޒަންސް
30 އޯގަސްޓު 2020 | އާދީއްތަ 09:59މި ބަދަލަކީ ގައިދީންނަށް އާއިލާއިން އަންނައުނު ފޮނުވުން މެދު ކެނޑުމެއް ނެތި ކުރިއަށް ގެންދިއުމުގެ ގޮތުން ގެނައި ބަދަލެއް
ކަރެކްޝަންގެ ހެޑް އޮފީހަށް ގައިދީންނަށް އަންނައުނާއި ބޭނުންވާ ސާމާނު ފޮނުވޭ ގޮތަށް ހަމަޖެއްސުން
ގައިދީންނަށް އާއިލާއިން ފޮނުވާ ތަކެތި ކަރެކްޝަނަލް ސާރވިސްގެ ހެޑް އޮފީހުން ފޮނުވޭ ގޮތަށް ބަދަލުކޮށްފައިވާކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
މިކަމާއި ގުޅިގެން ކުރެއްވި ޓުވީޓެއްގައި އޭނާ ވިދާޅުވީ، މި ބަދަލަކީ ގައިދީންނަށް އާއިލާއިން އަންނައުނު ފޮނުވުން މެދު ކެނޑުމެއް ނެތި ކުރިއަށް ގެންދިއުމުގެ ގޮތުން ގެނައި ބަދަލެއްކަމަށެވެ. އަދި މި ބަދަލާއެކު މާލޭ ޖަލުން ކުރަމުންދިޔަ މަސައްކަތް އާދިއްތަ ދުވަހުން ފެށިގެން ހެޑުއޮފީހަށް ބަދަލުކުރެވިފައިވާކަމަށާއި ބަދަލުގެނައީ މިވަގުތައް ޖަލަށް ޒިޔާރަތްކުރުން މަދުކުރުމަށްކަމަށް ކޮމިޝަނަރ އޮފް ޕްރިޒަންސް ފާހަގަކުރެއްވިއެވެ. އަދި، މިބަދަލާއި އެކު، މެދު ކެނޑުމެން ނެތި އާއިލާއިން ގައިދީންނަށް އަންނައުނު ފޮނުވޭނެކަމަށްވެސް އޭނާ ވިދާޅުވިއެވެ.
ރާއްޖެއެމްވީއަށް މައުލޫމާތު ދެއްވަމުން ކޮމިޝަނަރ އޮފް ޕްރިޒަންސް ވަނީ، މި ނިންމުމަކީ ކަރެކްޝަންސްގެ ބައެއް އޮފިސަރުންތަކެއް ކޮވިޑަށް ޕޮޒިޓިވްވުމާއި އެކު ނިންމި ނިންމުމެއްކަމަށް ވިދާޅުވެފައެވެ. އަދި ގައިދީންގެ ސަލާމަތާއި ރައްކާތެރިކަން ކަށަވަރުކުރުމަށް ފިޔަވަޅުތައް އިތުރަށް ހަރުދަނާކުރާނެކަމަަށް ކޮމިޝަނަރ ވަނީ ވިދާޅުވެފައެވެ.
މާލެ ޖަލުން މިހާރުވެސް 8 އޮފިސަރަކު ވަނީ ޕޮޒިޓިވްވެފައެވެ. އަދި އެ ފަރާތްތައް ޖަލުގެ އެކޮމޮޑޭޝަނެއްގައި ކަރަންޓީންކޮށްފައިވާއިރު ކޮންޓެކްޓް ޓްރޭސިންގ ހެދުމަށް ފަހު 21 ގައިދީއެއްގެ ސާމްޕަލްނަގާފައިވާ ކަމަށާއި ހުރިހާ އެންމެވެސް ކޮވިޑަށް ނެގެޓިވްވެފައިވާކަމަށް ކޮމިޝަނަރ އޮފް ޕްރިޒަންސް ވިދާޅުވިއެވެ.
