މިއަހަރުގެ ބަލޮންޑޯ އެވޯޑް އޭނާއަށް ހައްގު ކަމަށް ބަޔާން މިއުނިކަށް ކުޅެމުން އަންނަ ޕޮލެންޑްގެ ފޯވާޑް ރޮބަޓް ލެވަންޑޯސްކީ ބުނެފިއެވެ.

ދުނިޔޭގެ ފުޓްބޯޅައިގެ އެންމެ މޮޅު ކުޅުންތެރިޔާއަށް ދޭ ބަލޮންޑޯ އެވޯޑަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ. ފްރާންސް ފުޓްބޯލް މަޖައްލާއިން ބަލޮންޑޯ އެވޯޑް ދޭއިރު، މީގެ ކުރިން މި އެވޯޑު ދެމުން އައީ ފީފާއާ ގުޅިގެންނެވެ. މި އެވޯޑާ ފީފާއާ ވަކިވި ނަމަވެސް، 2016 ވަނަ އަހަރުން ފެށިގެން ފްރާންސް ފުޓްބޯލް މަޖައްލާއިން އަންނަނީ ގަވާއިދަށް ބަދަލުގެނެސް އެވޯޑް ދެމުންނެވެ. އެކަމަކު މި އަހަރު ކޮވިޑް-19 އާ ގުޅިގެން އެވޯޑް ކެންސަލް ކުރަން ފްރާންސް ފުޓްބޯލް މަޖައްލާއިން ވަނީ ނިންމާފައެވެ.

މި ސީޒަނުގައި ތަފާތު މޮޅު ކުޅުމެއް ދެއްކި ލެވަންޑޯސްކީ ބުނީ މި ސީޒަނުގައި ބަޔާނުން ހުރިހާ މުބާރާތެއް ކާމިޔާބުކޮށްފައިވާ ކަމަށާއި، ބަޔާނުން ސީޒަނުގެ ތިން ތަށި ކާމިޔާބުކުރިއިރު، ތިން މުބާރާތުގައިވެސް އެންމެ ގިނަ ލަނޑު ޖެހި ކުޅުންތެރިއަކީ އޭނާ ކަމަށެވެ. އެހެންކަމުން އޭނާއަށް ބަލޮންޑޯ ހައްގުވާ ކަމަށް ވަނީ ބުނެފައެވެ.

ބަޔާނުން މި ސީޒަނުގެ ޔުއެފާ ޗެމްޕިއަންސް ލީގު ސައްތައިން ސައްތަ ރިކޯޑަކާއެކު ކާމިޔާބުކުރިއިރު، ލެވަންޑޯސްކީ ވަނީ އެ މުބާރާތުގައި 15 ލަނޑު ކާމިޔާބުކޮށްފައެވެ. އަދި މި ސީޒަނުގެ ޖަރުމަން ލީގުގައި ލެވަންޑޯސްކީ ވަނީ ލެވަންޑޯސްކީ ވަނީ 34 ލަނޑު ޖަހާފައެވެ.

ބަލޮންޑޯ އެވޯޑް ކެންސަލް ކުރުމާ ގުޅިގެން މީގެ ކުރިން ބަޔާންގެ ޗެއާމަން ކާލް-ހެއިންޒް ރުމެނިގާ ވިދާޅުވީ ބަލޮންޑޯ އެވޯޑް މިއަހަރު ނުދޭ ގޮތަށް ނިންމި ނިންމުމަކީ ލެވަންޑޯސްކީއަށް އިންސާފުވެރިކޮށް ނިންމި ނިންމުމެއް ނޫން ކަމަށެވެ. އަދި މި ސީޒަނަކީ ލެވަންޑޯސްކީއަށް ބަލޮންޑޯ އެވޯޑް ހައްގު ސީޒަނެއް ކަމަށްވެސް އޭނާ ވަނީ ބުނެފައެވެ.

ކޮވިޑް-19 އާ ގުޅިގެން ބަލޮންޑޯ އެވޯޑް މިއަހަރު ނުދޭން ނިންމިއިރު، އަންނަ ސެޕްޓެމްބަރު މަހު ބާއްވަން ނިންމާފައިވާ ފީފާގެ "ދަ ބެސްޓް ފީފާ ފުޓްބޯލް އެވޯޑްސް" ވަނީ ފަސްކޮށްފައެވެ. އެކަމަކު އެވޯޑް ހަފުލާ ދެން ބާއްވާނެ ތާރީޚެއް އަދި ކަނޑައަޅާފައެއް ނުވެއެވެ.