އާސެނަލްގެ އެއްބަސްވުން އޮބާމަޔަން އިތުރު ތިން އަހަރަށް އާކުރަނީ

އާސެނަލްގެ ކެޕްޓަން ޕިއޭ-އެމެރިކް އޮބާމަޔަން އިތުރު ތިން އަހަރު އާސެނަލްގައި މަޑުކުރާނެ ކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު މިކޭލް އާޓެޓާ ބުނެފިއެވެ.

އަންނަ އަހަރުގެ ހޫނު މޫސުމުގައި އޮބާމަޔަން އާސެނަލާއެކު ހަދާފައިވާ އެއްބަސްވުން ހަމަވާއިރު، އާސެނަލުން އަންނަނީ އޮބާމަޔަން އެޓީމުގައި މަޑުކުރުމަށް ހުށަހެޅުންތައް ހުށަހަޅަމުންނެވެ. އެގޮތުން އޮބާމަޔަންއަށް ހަފުތާއަކު 250،000 (ދެ ލައްކަ ފަންސާސް ހާސް) ޕައުންޑްގެ މުސާރާއެއް ލިބޭ އެއްބަސްވުމެއް ހުށަހެޅުމަށް އާސެނަލުން ތައްޔާރުވަމުން އަންނަ ކަމަށް ރިޕޯޓުތައް ބުނެއެވެ.

ދާދި ފަހުން އާސެނަލްގެ ކޯޗު އާޓެޓާ ބުނީ އާސެނަލާއެކު އޮބާމަޔަން ކުރިއަށްގެންދާ ބައްދަލުވުންތަކުން ރަނގަޅު ނަތީޖާއެއް ނުކުންނާނެކަމުގެ ޔަގީންކަން އޮތް ކަމަށެވެ. އަދި ޔަގީންކަމާއެކު އޮބާމަޔަން އާސެނަލްގައި މަޑުކުރާނެކަން ބުނަން ކެރޭ ކަމަށާއި، އޮބާމަޔަން އައު އެއްބަސްވުމެއްގައި ވަރަށް އަވަހަށް ސޮއިކުރާނެ ކަމަށްވެސް ވަނީ ބުނެފައެވެ.

އޮބާމަޔަން އާސެނަލްގައި މަޑުކުރާއިރު، މީގެ ކުރިން އޮބާމަޔަން ވަނީ އާސެނަލްގައި މަޑުކުރުމާ މެދު ގޮތެއް ނިންމުން ވެގެންދާނީ އޭނާގެ ކެރިއަރުގެ އެންމެ މުހިންމު ނިންމުމަށް ކަމަށް ބުންޏެވެ.

އޮބާމަޔަން ހޯދަން ޗެލްސީ އާއި، ބާސެލޯނާއިންވެސް މަސައްކަތް ކުރަމުން އަންނައިރު، މިއަހަރުގެ ފިނި މޫސުމުގެ ޓްރާންސްފާ ބާޒާރުގައި އޮބާމަޔަން ހޯދަން ބާސާއިން ކުރި މަސައްކަތް ވަނީ ނާކާމިޔާބުވެފައެވެ.

މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 109 މެޗުގައި 70 ލަނޑު ޖަހާފައެވެ. އަދި ވަނީ އާސެނަލާއެކު މި ނިމުނު ސީޒަނުގެ އެފްއޭ ކަޕް ކާމިޔާބުކޮށްފައެވެ.