ފަޅުވެރިއެއް ޕޮޒިޓިވްވެ، ގދ. ތިނަދޫ މޮނިޓަރިންނަށް!
29 އޯގަސްޓު 2020 | ހޮނިހިރު 12:18ތިނަދޫ ރައްޔިތުންގެ ސަމާލު ކަމަށް މިހާރު ވަނީ އެކަން ގެނެސްފައި
ގދ. ތިނަދޫގައި މަތިން ނަގާފައިވާ މަންޒަރެއް، އެޗްޕީއޭއިން ވަކި އެއްޗެއް އަންގަންދެން އެރަށަށް އަރާ ފޭބުން ވަނީ މަނާކޮށްފައި
ގދ. ތިނަދޫއިން މާލެ ސިޓީއަށް ދަތުރު ކުރާ ބޯޓެއް ފަޅުވެރިއެއް ކޮވިޑް-19 އަށް ޕޮޒިޓިވްވުމާ ގުޅިގެން އެ ރަށް މޮނިޓަރިންގެ ހާލަތަށް ގެނެސްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެކަން އަންގާފައިވާތީ ތިނަދޫ ކައުންސިލުން ވަނީ އެކަން ރައްޔިތުންގެ ސަމާލުކަމަށް ގެނެސްފައެވެ.
އެޗްޕީއޭއިން އެރަށު ކައުންސިލަށް ފޮނުވި އެންގުމެއްގައި ބުނެފައި ވަނީ، އެ ރަށް މޮނީޓަރިންގއަށް ލާފައި ވަނީ، ކޮވިޑް-19 އާ ގުޅިގެން ސިއްހީ ގޮތުން އިތުރަށް ބަލަން ޖެހޭ ކަންތައްތައް ބެލުމަށް ކަމަށެވެ. އެގޮތުން ރަށުގައި މިވަގުތު ތިބި އެއްވެސް މީހަކު އެޗްޕީއޭ ވަކިގޮތެއް އަންގަންދެން ރަށުން ފޭބުމާއި، އެ އެޖެންސީގެ ހުއްދަނެތި އެއްވެސް މީހަކު ރަށަށް އެރުން މަނާ ވަނީ މަނާކޮށްފައެވެ.
މި ފަޅުވެރިޔާ ކޮވިޑް-19 އަށް ޕޮޒިޓިވްވުމާއި ގުޅިގެން މިހާރު ކޮންޓެކްޓް ޓްރޭސިންގެ މަސައްކަތްތައް ކުރަމުންދާ ކަމަށް އެޗްޕީއޭ އިން މައުލޫމާތުދެއެވެ.
ތިނަދޫ އިން މީހަކު ކޮވިޑަށް ޕޮޒިޓިވްވެފައިވާއިރު ކޮވިޑްގެ ކޭސްތައް ފެންނަ ރަށްތަކުގައި މާސްކް އެޅުމަށް އެޗްޕީއޭ އިން ވަނީ މަޖުބޫރުކޮށްފައެވެ.
މިހާތަނަށް 32 ރަށަކުން ކޮވިޑުގެ ކޭސްތައް ވަނީ ފެނިފައެވެ. އެގޮތުން އެ ރަށްތަކުން ޖުމްލަ 53 ދިވެހިން ޕޮޒިޓިވްވެފައިވާއިރު 7 ބިދޭސީއަކު ވެސް ވަނީ މި ވައިރަސް އަށް ޕޮޒިޓިވްވެފައެވެ.
