ރޯމާގެ ހަތަރު ކުޅުންތެރިއަކު ކޮވިޑް-19 އަށް ޕޮޒިޓިވްވެ، ފަރިތަކުރުންތައް ފެށުން ލަސްކޮށްފި

އިޓާލިއަން ލީގުގައި ވާދަކުރަމުން އަންނަ ރޯމާގެ ހަތަރު ކުޅުންތެރިއަކު ކޮވިޑް-19 އަށް ޕޮޒިޓިވް ވެއްޖެއެވެ.

ރިޕޯޓުތައް ބުނާ ގޮތުން އައު ސީޒަނަށް ތައްޔާރުވުމަށް ހުކުރު ދުވަހު ފަރިތަކުރުންތައް ފަށަން ރޯމާއިން ތާވަލުކުރި ނަމަވެސް، ހަތަރު ކުޅުންތެރިން ޕޮޒިޓިވް ވުމާއެކު ފަރިތަކުރުންތައް ފެށުން ވަނީ ލަސްކޮށްފައެވެ.

މިދިޔަ ހަފުތާގައި ރޯމާގެ ގޯލްކީޕަރު އެންޓީނިއޯ މިރާންޓޭ ވަނީ ކޮވިޑް-19 އަށް ޕޮޒިޓިވްވިކަން ހާމަކޮށްފައެވެ. އަދި ބުރާސްފަތި ދުވަހު ސްޕެއިންގެ ފޯވާޑް ކާލެސް ޕެރޭޒް، އޭނާ ކޮވިޑް-19 އަށް ޕޮޒިޓިވްވިކަން ހާމަކުރިއިރު، ހުކުރު ދުވަހު ބްރެޒިލްގެ ޑިފެންޑަރު ބްރޫނޯ ޕެރޭސް ވަނީ އޭނާގެ އަމިއްލަ އިންސްޓާގްރާމްގައި ވައިރަހަށް ޕޮޒިޓިވްވިކަން ހާމަކޮށްފައެވެ.

ކޮވިޑް-19 އަށް ޕޮޒިޓިވްވިކަން ހާމަކުރަމުން ބްރޫނޯ ޕެރޭސް ބުނީ އޭނާ ވައިރަހަށް ޕޮޒިޓިވްވި ނަމަވެސް، ހާލު ރަނގަޅު ކަމަށެވެ. އަދި ވައިރަހުގެ އެއްވެސް އަލާމާތެއް އޭނާގެ ހަށިގަނޑުން ފެނިފައިނުވާ ކަމަށްވެސް ވަނީ ބުނެފައެވެ.

ރޯމާއިން ކޮވިޑް-19 އަށް ޕޮޒިޓިވްވި ހަތަރުވަނަ ކުޅުންތެރިއަކީ ނެދަލެންޑްސްގެ ފޯވާޑް ޖަސްޓިން ކްލައިވަޓް ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފައެވެ.

ރިޕޯޓުތައް ބުނާ ގޮތުން މި ހަތަރު ކުޅުންތެރިން ޕޮޒިޓިވްވުމާއެކު، ރޯމާއިން އަންނަނީ ހޮނިހިރު ދުވަހު އެޓީމުގެ ހުރިހާ ކުޅުންތެރިންނާއި އޮފިޝަލުން ކޮވިޑް-19 އަށް ޓެސްޓް ކުރުމަށް ތައްޔާރުވަމުންނެވެ. އަދި ފަރިތަކުރުންތައް ފަށާނީ ޓެސްޓްތަކުގެ ނަތީޖާ ލިބުމުން ކަމަށްވެސް ރިޕޯޓުތައް ބުނެއެވެ.

އިޓާލިއަން ލީގުގެ ކުލަބުތަކުން އައު ސީޒަނަށް ފަރިތަކުރުންތައް ފެށުމަށް ތައްޔާރުވަމުންދާއިރު، އަންނަ ސެޕްޓެމްބަރު މަހުގެ 19 ވަނަ ދުވަހު އިޓާލިއަން ލީގު ފެށުމަށް ތާވަލުކޮށްފައިވާ ކަމަށް ރިޕޯޓުތައް ބުނެއެވެ.