ޑިޕާއީގެ ހެޓްރިކާއެކު ފުރަތަމަ މެޗުން ލިޔޯނަށް މޮޅެއް
29 އޯގަސްޓު 2020 | ހޮނިހިރު 08:46ޑިޖޯން އަތުން ފަހަތުން އަރައި ލިޔޯން މޮޅުވީ 4-1 ން
ލިޔޯން އާއި ޑިޖޯން ބައްދަލުކުރި މެޗުގެ ތެރެއިން: މި މެޗުން ލިޔޯން މޮޅުވީ 4-1 ން
އައު ސީޒަނުގެ ފްރެންޗް ލީގުގައި ލިޔޯން ކުޅުނު ފުރަތަމަ މެޗުން ޑިޖޯން އަތުން ފަހަތުން އަރައި މޮޅުވެއްޖެއެވެ.
ކޮވިޑް-19 ގެ ބްރޭކަށްފަހު 167 ދުވަސް ފަހުން 2020-2021 ވަނަ އަހަރުގެ ސީޒަނުގެ ފްރެންޗް ލީގުގެ ކުޅުން ފެށީ މި މަހުގެ 21 ވަނަ ދުވަހުއެވެ.
ލީގުގައި ލިޔޯން ކުޅުނު ފުރަތަމަ މެޗުން މޮޅުވީ ޑިޖޯން އަތުން 4-1 ގެ ނަތީޖާއަކުންނެވެ. މި މެޗުގައި ކޮވިޑް-19 އަށް ޕޮޒިޓިވް ވުމުން ލިޔޯންގެ މިޑްފީލްޑަރު ހުސާމް އޮއާރް ކުޅެފައެއް ނުވެއެވެ.
ހުކުރު ދުވަހުގެރޭ ލިޔޯންގެ ދަނޑުގައި ކުޅުނު މެޗު ފަށައިގެން 14 ވަނަ މިނެޓުގައި ޑިޖޯނުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ އޯރެލިއެން ޝީލްޑާއެވެ.
އެކަމަކު ފުރަތަމަ ހާފުގެ ފަހު ހަ މިނެޓު ތެރޭ ލިޔޯނުން ވަނީ ތިން ލަނޑު ކާމިޔާބުކޮށް އެޓީމު ކޮޅަށް ނަތީޖާ އަނބުރާލާފައެވެ. މެޗުގެ 39 ވަނަ މިނެޓުގައި ޕެނަލްޓީ އަކުން މެމްފިސް ޑިޕާއީ ނަތީޖާ އެއްވަރުކޮށްދިންއިރު، ފުރަތަމަ ހާފުގެ ފަހު މިނެޓުގައި ޑިޖޯނުގެ ވެސްލީ ލައުޓޯ އަތުން ބައިކޮޅަށް ވަން ލަނޑާއެކު ލިޔޯނުން ވަނީ ލީޑު ނަގާފައެވެ. އަދި އިތުރު ވަގުތުގައި ޑިޕާއީ ވަނީ ލިޔޯންގެ ތިންވަނަ ލަނޑު ކާމިޔާބުކޮށްފައެވެ.
މި މެޗުގައި ޑިޕާއީ ހެޓްރިކް ފުރިހަމަ ކުރީ މެޗުގެ ދެވަނަ ހާފުގައެވެ. ލީގުގައި ކުޅުނު ފުރަތަމަ މެޗުގައި ޑިޕާއީ ހެޓްރިކް ހެދިއިރު، މިއީ މިދިޔަ ޑިސެމްބަރު މަހަށް ފަހު ޑިޕާއި ލީގުގައި ލަނޑު ޖެހި ފުރަތަމަ ފަހަރެވެ. ޑިސެމްބަރު މަހު ޑިޕާއީގެ ކަކުލު ހުޅަށް ލިބުނު އަނިޔާއަކުން ފަރުވާ ހޯދަމުން ދަނިކޮށް ކޮވިޑް-19 ފެތުރޭތީ ލީގު މެދުކަނޑާލިއެވެ. އަދި އޭޕްރީލް މަހު ވަނީ މިދިޔަ ސީޒަނުގެ ލީގު ކެންސަލްކޮށް ޕީއެސްޖީއަށް ޗެމްޕިއަންސް ދީފައެވެ.
އައު ސީޒަނުގެ ފްރެންޗް ލީގުގެ ކުޅުން ފެށިގެން ކުރިއަށްދާއިރު، މިހާތަނަށް ވަނީ ދެ މެޗެއް ފަސްކޮށްފައެވެ. އެއީ ލީގު ހުޅުވުމުގެ ގޮތުން ކުޅެން ތާވަލުކޮށްފައި އޮތް މާސޭ އާއި ސެއިންޓް އެޓިއެން ބައްދަލުކުރާ މެޗާއި، މިދިޔަ ބުރާސްފަތި ދުވަހު ލެންސްއާ ދެކޮޅަށް ޕީއެސްޖީ ކުޅެން އޮތް މެޗެވެ.
މާސޭ އާއި ސެއިންޓް އެޓިއެން ބައްދަލުކުރަން އޮތް މެޗު ފަސްކުރީ މާސޭގެ ކުޅުންތެރިންތަކެއް ކޮވިޑް-19 އަށް ޕޮޒިޓިވްވުމާ ގުޅިގެންނެވެ. އަދި ޕީއެސްޖީ މެޗު ފަސްކުރީ މިދިޔަ ހަފުތާގެ އާދީއްތަ ދުވަހުގެރޭ ޔުއެފާ ޗެމްޕިއަންސް ލީގުގެ ފައިނަލްގައި ޕީއެސްޖީ ވާދަކުރުމުން، އެޓީމަށް ވަގުތު ދިނުމުގެ ގޮތުންނެވެ.
