ހުއިފިލަނޑާގެ ދެ ބާވަތެއް ކަމަށްވާ ހުދު ބަޓާއި ކަޅު ބަޓު ރާއްޖެއިން ބޭރު ކުރުމުގެ ހުއްދަ ދިނުން ހުއްޓާލަން ނިންމާފައިވާ ކަމަށް އެންވަޔަރަމެންޓް މިނިސްޓްރީން ބުނެފިއެވެ.

އެންވަޔަރަމެންޓް މިނިސްޓްރީން ބުރާސްފަތި ދުވަހު ނެރެފައިވާ އާންމު އިއުލާނެއްގައި ބުނެފައިވަނީ ދިވެހިރާއްޖެއިން ބައިވެރިވެފައިވާ ބައިނަލްއަޤްވާމީ މުޢާހަދާއެއް ކަމަށްވާ، "ކޮންވެންޝަން އޮން އިންޓަރނޭޝަނަލް ޓްރޭޑް އިން އެންޑޭންޖަރޑް ސްޕީޝީޒް އޮފް ވައިލްޑް ފޯނާ އެންޑް ފްލޮރާ" (ސައިޓީސް) މުޢާހަދާއިން އޮގަސްޓް 2019 ގައި ބޭއްވުނު 18 ވަނަ "ކޮންފަރެންސް އޮފް ދަ ޕާރޓީސް" (ކޮޕް 18) ގައި، ދިވެހިރާއްޖޭގައި ކުރާ ހުއިފިލަނޑާ މަސްވެރިކަމުގައި ނަގާ ދެބާވަތެއް ކަމަށްވާ ހުދު ބަޓު އަދިކަޅު ބަޓު ވަނީ އެ މުޢާހަދާގެ ޖަދުވަލު 2 ގައި ހިމެނުމަށް ފާސްކޮށް، އެކަމަށް ތައްޔާރުވުމަށް އެއް އަހަރު ދުވަހުގެ މުއްދަތެއް ދީފައިވާ ކަމަށެވެ.

އެހެންކަމުން މިހިނގާ އޮގަސްޓް މަހުގެ 28 ވަނަ ދުވަހުން ފެށިގެން މި ދެބާވަތުގެ ހުއިފިލަނޑާ އަކީ ސައިޓީސް މުޢާހަދާގެ ޖަދުވަލު 2 ގައިވާ ގޮތުގެ މަތިން ކަމަށެވެ. އެ މުއާހަދާގެ ޖަދުވަލު 2 ގައި އެއްވެސް ބާވަތެއްގެ ދިރޭ އެއްޗެއް ހިމަނައިފިނަމަ، އެ ބާވަތެއް ވިޔަފާރި އުޞޫލުން އެއް ގައުމުން އަނެއް ގައުމަށް ގެންދެވޭނީ، އެކްސްޕޯޓު ކުރާ ޤައުމުގެ ސައިޓީސް މެނޭޖްމަންޓް އޮތޯރިޓީއިން ދޭ ސައިޓީސް ޕާމިޓަކާއެކުގައި ކަމަށް ވެސް މިނިސްޓްރީން ނެރުނު އިއުލާނުގައި ބުނެފައިވެއެވެ.

އިއުލާނުގައި އިތުރަށް ބުނެފައިވަނީ މެނޭޖްމަންޓް އޮތޯރިޓީއަށް ސައިޓީސް ޕާމިޓް ދޫކުރެވޭނީ އެކްސްޕޯޓް ކުރާ ޤައުމުގެ "ސައިޓީސް ސައިންޓިފިކް އޮތޯރިޓީ"އިން ތައްޔާރު ކުރާ "ނޮން-ޑެޓްރިމަންޓަލް ފައިންޑިންގ" (އެންޑީއެފް) އަކުން އެބާވަތުގެ ދިރޭތަކެތި، އޭގެ މާހައުލުން ނަގާ އެކްސްޕޯޓު ކުރާ މިންވަރަކީ އެ ބާވަތުގެ އާބާދީއަށް ގެއްލުން ނުވާނެ އަދި ދެމެހެއްޓެނިވި ގޮތަކަށް ނެގޭ މިންވަރެއްކަން، މެނޭޖްމަންޓް އޮތޯރިޓީ އަށް އެންގުމުން ކަމަށެވެ. އަދި ސައިންޓިފިކް އޮތޯރިޓީ އިން ހަދާ އެން.ޑީ.އެފް. އަކުން އެ ބާވަތުގެ ދިރޭތަކެތީގެ ނަގާ މިންވަރުގެ ސަބަބުން އެ ބާވަތެއްގެ އާބާދީއަށް ގެއްލުންތަކެއް ވާކަމަށް ދައްކާނަމަ، އެ ބާވަތެއް އެކްސްޕޯޓް ކުރުމަށް ސައިޓީސް ޕާމިޓް ދޫކުރުމަކީ މެނޭޖްމަންޓް އޮތޯރިޓީއަށް ކުރެވޭނެކަމެއް ނޫން ކަމަށް ވެސް އެންވަޔަރަމެންޓް މިނިސްޓްރީގެ އިއުލާނުގައި ބުނެފައިވެއެވެ.

މީގެ އިތުރަށް އެންވަޔަރަމަންޓް މިނިސްޓްރީން ބުނެފައިވަނީ ހުދު ބަޓާއި ކަޅު ބަޓު ޖަދުވަލު 2 ގައި ހިމެނުމަށް ސައިޓީސް މުއާހަދާއިން ފާސްކުރުމާ ގުޅިގެން ދިވެހިރާއްޖޭގެ ސައިންޓިފިކް އޮތޯރިޓީއެއް ކަމަށްވާ މޯލްޑިވްސް މެރިން ރިސާޗް އިންސްޓިޓިއުޓު (އެމްއެމްއާރްއައި) އިން އެދެބާވަތުގެ މަސްވެރިކަމުގެ އެންޑީއެފް ތައްޔާރުކޮށް އެ މިނިސްޓްރީއަށް ހިއްސާ ކޮށްފައިވާ ކަމަށެވެ. އަދި އެފަރާތުން ނިންމާފައިވަނީ މި ދެ ބާވަތުގެ ހުއިފިލަނޑާގެ މަސްވެރިކަން ރާއްޖޭގައި މިހާރު ކުރާ މިންވަރުން އެ ދެ ބާވަތުގެ އާބާދީ އަށް ގެއްލުންވުމުގެ ފުރުޞަތު ބޮޑު ކަމަށެވެ.

އެންވަޔަރަމެންޓް މިނިސްޓްރީން ބުނީ މި ނިންމުމާއި ގުޅިގެން 28 އޮގްސްޓް 2020 ވަނަ ދުވަހުން ފެށިގެން ނަގާ ހުދު ބަޓު އަދި ކަޅު ބަޓު އެކްސްޕޯޓު ކުރުމަށް، ދޫކުރަން ޖެހޭ ސައިޓީސް ޕާމިޓް މިނިސްޓްރީ މެދުވެރިކޮށް ދޫ ނުކުރާނެ ކަމަށެވެ. އަދި އެ ދެ ބާވަތަށް ސައިޓީސް އެކްސްޕޯޓް ޕާމިޓް ދޫކުރަން ފަށާނީ އެ ދެ ބާވަތުގެ ހުއިފިލަނޑާ ނަގާ މިންވަރަކީ އޭގެ އާބާދީ ދެމެހެއްޓުމަށް ގެއްލުން ނުވާ މިންވަރެއް ކަމަށް ސައިންޓިފިކް އޮތޯރިޓީ އިން ތައްޔާރުކުރާ އެން.ޑީ.އެފް އަށް ރިޢާޔަތްކޮށް ކަމަށް ވެސް އެންވަޔަރަމެންޓް މިނިސްޓްރީން ބުނެއެވެ.