ވެންޓިލޭޓަރުތައް ގަތުމަށް ދުބާއީގެ އެގްޒެކިއުޓަރސް ޖެނެރަލް ޓްރޭޑިންގއަށް އެޑްވާންސް ފައިސާ ދެއްކިއިރު، ޕޭމަންޓް ގަރެންޓީ ނުނަގާ އޮތުމަކީ މާލިއްޔަތު ގަވާއިދާ ހިލާފަށް ހެލްތް މިނިސްޓްރީން ކޮށްފައިވާކަމެއްކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.

ހެލްތް މިނިސްޓްރީން ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާކަމަށް، ހެލްތް މިނިސްޓްރީގެ ކޮވިޑް-19ގެ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓްގައި ބުނެފައިވާތީ، ރައްޔިތުންގެ މަޖިލީހުގެ މާލިއްޔަތު ކޮމެޓީން ބުރާސްފަތި ދުވަހު ބޭއްވި ބައްދަލުވުމަށް މައުލޫމާތު ދެއްވަމުން ފިނޭންސް މިނިސްޓްރު އިބްރާހީމް އަމީރު ވިދާޅުވީ، އެގްޒެކިއުޓަރސް ޖެނެރަލް ޓްރޭޑިންގ ކުންފުންޏަކީ ޑަބްލިޔުއެޗްއޯގެ ލަފާގެ މަތިން ވެންޓިލޭޓަރުތައް ގަތުމަށް ހޯދާފައިވާ ކުންފުންޏެއް ކަމަށާއި، ވެންޓިލޭޓަރުތައް އަވަހަށް ބޭނުންވާތީ، އެޑްވާންސް ޕޭމަންޓްގެ ގޮތުގައި ދެ ފަހަރެއްގެ މަތިން 90 ޕަސެންޓް ފައިސާ ދެއްކުމަށް ހެލްތް މިނިސްޓްރީން އެދިފައިވާ ކަމަށެވެ. އަދި ކަމުގެ މުހިއްމުކަން ބޮޑުކަމުން، ޚަރަދުގެ ހުއްދައާއި ފައިސާގެ ކަންކަމަށް ހުއްދަ ދިންނަމަވެސް މާލިއްޔަތު ގަވާއިދުގެ އެހެނިހެން ކަންކަމަށް ބޯލަނބަން ޖެހޭނެ ކަމަށްވެސް މިނިސްޓަރު އަމީރު ވިދާޅުވި އެވެ.

މިނިސްޓަރު އަމީރު ވިދާޅުވީ، އެކެއް އޭޕްރީލް 2020 ގައި އެޑްވާންސް ޕޭމަންޓްގެ ގޮތުގައި 75 ޕަސެންޓްގެ ފައިސާ ދޫކުރުމުގެ ހުއްދައަށް ހެލްތް މިނިސްޓްރީން އެދުނު ކަމަށެވެ. އަދި 19 އޭޕްރީލް 2020 ގައި ދެވަނަ ފަހަރަށް 15 ޕަސެންޓްގެ އެޑްވާންސް ޕޭމަންޓް ދޫކުރުމުގެ ހުއްދައަށް ހެލްތް މިނިސްޓްރީން އެދުނުއިރު، އެއެއްބަސްވުމުގައިވާ ގޮތުން އެޒެކިއުޓރަސް ޖެނެރަލް ޓްރޭޑިންގއަށް އެޑްވާންސް ޕޭމަންޓްގެ ގޮތުގައި ދައްކަންޖެހޭ 15 ޕަސެންޓް ދައްކަންޖެހެނީ، ވެންޓިލޭޓަރުތަކުގެ ޝިޕްމަންޓް ތައްޔާރުވުމުން ކަމަށް އެނގޭކަމަށެވެ.

ފިނޭންސް މިނިސްޓަރު އަމީރު ވިދާޅުވީ ކޮވިޑް-19 އާގުޅިގެން ވެންޓިލޭޓަރު ހޯދުމުގައި ދުނިޔޭގެ ހުރިހާ ގައުމަކަށްވެސް ދަތިތަކާ ކުރިމަތިލާން ޖެހުނުކަމަށެވެ. ރާއްޖެއަށްވެސް މިކަން މިހެން އޮތްނަމަވެސް، މާލިއްޔަތު ގަވާއިދު ދިޔައީ ހިނގަމުން ކަމަށާއި ކޮވިޑް-19 ޕެންޑަމިކްއާ ގުޅިގެން ރާއްޖޭގައި އިއުލާން ކޮށްފައިވަނީ އާންމު ސިއްހަތުގެ ކުއްލި ނުރައްކަލުގެ ހާލަތެއް ކަމަށާއި އެއީ ސްޓޭޓް އޮފް އެމަރޖެންސީއެއް ނޫން ކަމަށެވެ. އެހެންކަމުން މާލިއްޔަތު ގަވާއިދުން ފިނޭންސް މިނިސްޓަރު ލުއި ނުދޭ ހުރިހާ ކަމެއް ވެސް ދިޔައީ ހިނގަމުން ކަމަށް އަމީރު ވިދާޅުވި އެވެ.

ފިނޭންސް މިނިސްޓަރ އަމީރު ވިދާޅުވީ، ވެންޓިލޭޓަރުތައް ގަތުމަމަށް ދުބާއީގެ އެގްޒެކިއުޓަރސް ޖެނެރަލް ޓްރޭޑިންގއަކީ މާލީ އަދި ފަންނީ ގާބިލު ކުންފުންޏެއްތޯ ބެލުމަކީ ހެލްތް މިނިސްޓްރީގެ ބިޑް ކޮމެޓީއާއި ފައިނޭންސް އެގްޒެކެޓިވް ކުރަންޖެހޭ އަދި ކަށަވަރު ކުރަންޖެހޭ ކަމެއް ކަމަށެވެ.

ހެލްތު މިނިސްޓްރީގެ އޮޑިޓު ރިޕޯޓުން ކޮވިޑާ ގުޅިގެން ރާއްޖެ އަށް ބޭނުންވާ 75 ވެންޓިލޭޓަރެއް ގެންނަން ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކުރުމުގައި ބޮޑެތި އޮޅުވައިލުންތަކާއި ޖަރީމާތަކެއް ހިންގާފައިވާ ކަމަށް ތުހުމަތު ކުރެވޭ މައްސަލަ ވަނީ ފެންމަތިވެފައެވެ. އެ ކުންފުންޏާ އެކަން ހަވާލުކުރީ ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ މެދުވެރިކޮށް ކަމަށް ހެލްތު މިނިސްޓްރީން އެންމެ ކުރިއްސުރެ ބުނަމުން އައި ވާހަކަތައް ވެސް އޮޑިޓަ ޖެނެރަލް ހަސަން ޒިޔަތު ނެރުއްވި ރިޕޯޓުގައި ވަނީ ދޮގުކޮށްފަ އެވެ. ނަމަވެސް ހެލްތް މިނިސްޓަރު އަބްދުﷲ އަމީން އާއި ހެލްތް މިނިސްޓްރީގެ ބިޑް ކޮމެޓީގެ ޗެއަރ އަދޮ އެމިނިސްޓްރީގެ ޑެޕިއުޓީ މިނިސްޓަރު ނިޝާމާ މުހައްމަދު ވިދާޅުވެފައިވަނީ، އެބޭފުޅުން ވެންޓިލޭޓަރުތައް ގަތުމުގައި އެއްވެސް އޮޅުވާލުމެއް ހިންގާފައި ނުވާނެ ކަމަށާއި އަމަލުކުރީ "ހެޔޮ ނިޔަތުގައި" ކަމަށެވެ.

ދުބާއީގެ އެގްޒެކިއުޓާސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުނި ވެސް މެ އެވެ. އެގްޒެކިއުޓަރސް ކުންފުނިން ވެންޓިލޭޓަރެއްގެ އަގެއް ކަމަށް ބުނެފައިވަނީ 32،500 ޑޮލަރަށެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށް ވާއިރު އަގުގެ 90 ޕަސެންޓަށްވާ 30.9 މިލިއަން ރުފިޔާ ސަރުކާރުން ވަނީ ދައްކާފައެވެ.

މިއަހަރުގެ އޭޕްރީލް މަހުގެ ދެވަނަ ދުވަހު އެއްބަސްވުމުގައި ސޮއިކޮށް، 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް އެއްބަސްވުމުގައި ބުނެފައިވާއިރު، މިހާތަނަށް އެ ވެންޓިލޭޓަރުތައް ރާއްޖެއަށް ގެނެސްފައެއް ނުވެއެވެ.