މޮޑާނާ ވެކްސިން: ހުރިހާ އުމުރުފުރައެއްގެ މީހުން ވެސް ދިފާއު ކޮށްދޭ!
26 އޯގަސްޓު 2020 | ބުދަ 22:08ކޮންމެ ބައިވެރިއަކަށް ވެސް 100 މިލިގްރާމްގެ ދެވެކްސިން ޝޮޓް ދީފައިވޭ
18 އަހަރާއި 71 އަހަރާ ދެމެދުގެ މީހުން ފުރަތަމަ ފޭސްގައި ބައިވެރިކޮށްފައިވޭ
ކޮވިޑް-19ށް މޮޑާނާއިން އުފައްވާ ވެކްސިނުން ހުރިހާ އުމުރުފުރައެއްގެ މީހުން ވެސް ދިފާއު ކޮށްދޭ ކަމަށް އެކުންފުނިން ބުނެފިއެވެ.
މޮޑާނާގެ އިންފެކްޝިއަސް ޑިޒީސަސްގެ ހެޑް ޑރ. ޖެކްލީން މިލާ ވިދާޅުވީ ވެކްސިން ފޭސް އެކެއްގެ ޓްރިއަލްގެ ޑޭޓާ ދައްކާ ގޮތުން ޓެސްޓު ކުރެވުނު ހުރިހާ އުމުރުފުރައެއްގެ މީހުންގެ ދިފާއީ ނިޒާމު ވައިރަސްއާ ދެކޮޅަށް މަސައްކަތް ކުރާކަން ޔަގީން ވެފައިވާ ކަމަށެވެ.
އެގޮތުން ފޭސް އެކެއްގައި މޮޑާނާއިން ވަނީ 18 އަހަރާއި 71 އަހަރާ ދެމެދުގެ މީހުން މިޓްރިއަލްގައި ބައިވެރިކޮށްފައެވެ. ކޮންމެ ބައިވެރިއަކަށް ވެސް 100 މިލިގްރާމްގެ ދެވެކްސިން ޝޮޓް ދީފައިވާއިރު، ފުރަތަމަ ޝޮޓަށްފަހު ދެވަނަ ޝޮޓް ދީފައިވަނީ 28 ދުވަސް ފަހުންނެވެ.
ޑރ. ޖެކްލީން ވިދާޅުވީ ވެކްސިންގެ ސަބަބުން ހުރިހާ އުމުރުފުރައެއްގެ މީހުންގެ ގައިން ވެސް ވައިރަސް ހުއްޓުވުމަށް ބޭނުންވާ އެންޓި ބޮޑީސް އުފައްދާދީފައިވާ ކަމަށެވެ. އަދި އުމުރުން ދުވަސްވީ މީހުންގެ ގައިގައި ވެސް ޒުވާން އުމުރުފުރާގެ މީހުންނާ އެއްވަރަށް ދިފާއީ ނިޒާމު މަސައްކަތް ކޮށްފައިވާ ކަމަށް ޑރ.ޖެކްލީން ވިދާޅުވިއެވެ.
ކޮވިޑް-19ށް މޮޑާނާއިން އުފައްވާ ވެކްސިން ދިނުމުން ބައެއް މީހުން ބޮލުގައި ރިއްސުމާއި، ވަރުބަލިވުން ފަދަ އަލާމަތްތައް ފެނިފައިވެއެވެ. ނަމަވެސް ދެދުވަހެއްގެ ތެރޭގައި ރަނގަޅުވެފައިވާ ކަމަށާއި، މިއީ ކާމިޔާބު ވެކްސިންއެއްގެ ގޮތުގައި މީޑިއާތަކުގައި ރިޕޯޓު ކޮށްފައިވެއެވެ.
