މި ސަރުކާރުން ސްޓޫޑަންޓް ލޯނު ދޫކުރަން އިއުލާން ކުރަނީ ބަޖެޓް ހޯދާފައި: ހަޔަރ އެޑިއުކޭޝަން
26 އޯގަސްޓު 2020 | ބުދަ 09:16ކުރީ ސަރުކާރުން ލޯނު ސްކީމް އިއުލާން ކުރިއިރު، އެކަމަށް ފައިސާ ކަނޑައަޅާފައެއް ނުވޭ
މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީން މިއަދު ބޭއްވި ބައްދަލުވުުގައި ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން މައުލޫމާތު ދެއްވަނީ
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަރުކާރުން ދަރިވަރުންނަށް ދޫކުރާ ސްޓޫޑަންޓް ލޯނު ދޫކުރުމަށް އިއުލާން ކުރަނީ ބަޖެޓްގައި އެ ފައިސާ ކަނޑައެޅުމަށް ފަހު ކަމަށް ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވެއްޖެއެވެ.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމެޓީއަށް ވަޑައިގެން މައުލޫމާތު ދެއްވަމުން ހަޔަރ އެޑިއުކޭޝަން މިނިސްޓަރ އިބްރާހީމް ހަސަން ވިދާޅުވީ، ކުރީގެ ސަރުކާރުން ދަރިވަރުންނަށް ލޯނު ދިނުމަށް އިއުލާން ކުރިއިރު، ބަޖެޓްގައި އެ ފައިސާ ކަނޑައަޅުއްވާފައިނުވާ ކަމަށެވެ. ނަމަވެސް މި ސަރުކާރުން ވެރިކަމާ ހަވާލުވެ، ކުރީ ސަރުކާރުން އިއުލާނު ކުރި ލޯނަށް ފައިސާ ހޯދުމަށްފަހު، ދައުލަތުގެ ބަޖެޓްގައި އެ ފައިސާ ކަނޑައަޅުމަށްފަހު، ދަރިވަރުންނަށް ލޯނު ދޫކޮށް ނިންމާފައިވާ ކަމަށެވެ. އަދި މި ސަރުކާރުން ދަރިވަރުންނަށް ލޯނު ދޫކުރަން އިއުލާން ކުރުމުގެ ކުރިން، ބަޖެޓްގައި އެ ފައިސާ ކަނޑައެޅިގެން ލޯނު ދޫކުރަމުންދާއިރު، ކޮންމެ އަހަރަކު ވެސް ވަކި އަދަދުތަކެއް ދަރިވަރުންގެ މަތީ ތައުލީމަށް ބަޖެޓް ކުރެވެމުންދާ ކަމަށެވެ.
ހަޔަރ އެޑިއުކޭޝަން މިނިސްޓަރ ވިދާޅުވީ، ތިން ކެޓަގަރީއަކަށް ލޯނު ދޫކުރަމުންދާ ކަމަށެވެ. އެގޮތުން އަލަށް މަތީ ތައުލީމު ހާސިލު ކުރަން އެދޭ ދަރިވަރުންނާއި ތައުލީމު ހާސިލު ކުރަމުންދާ ދަރިވަރުންނަށް ލޯނު ދޫކުރަމުންދާއިރު، ރައްޔިތުންގެ މަޖިލީހުގެ ގޮނޑިތައް ބެހިފައިވާ ގޮތަށް، ކޮންމެ ދާއިރާއަކަށް އެއް ޖާގައަށް ހާއްސަ ކޮށްގެން ލޯނު ދޫކުރަމުންދާ ކަމަށެވެ.
މިނިސްޓަރ ވިދާޅުވީ އިދާރީ ދާއިރާތަކަށް ހާއްސަ ކޮށްގެން އެއް ޖާގައަށް ލޯނު ދޭން ނިންމި މައިގަނޑު ސަބަބަކީ ލާމަރުކަޒީ ނިޒާމު އިތުރަށް ހަރުދަނާކޮށް، ތައުލީމީ ބޭފުޅުން ބިނާކުރުމާއި، ރަށްތަކުގައި ތައުލީމީ ބޭފުޅުންގެ ހިދުމަތް ލިބުމަށް ކަމަށެވެ. އަދި ލޯނު ދޫކުރުމުގައި ރަށްތަކަށް ކޮންމެހެން ބޭނުންވާ ދާއިރާތަކުން މީހުން ބިނާ ކުރަން އިސްކަން ދެއްވާ ކަމަށެވެ. ރާއްޖެއަށް މިވަގުތަށް ބޭނުން ނުހިފޭފަދަ، ރޮކެޓް ސައިންސް ފަދަ، ދާއިރާތަކަށް ލޯނު ދޫ ކުރަމުން ނުދާނެ ކަމަށެވެ.
ނަމަވެސް މިނިސްޓަރު އިބްރާހީމް ހުސައިން ވިދާޅުވީ، ކިޔަވައިގެން އައިސް ދާއިރާއަށް ހިދުމަތް ކުރަން ދާނެ ފަރާތަކީ ކޮބައިކަން ކަނޑައެޅުމުގައި ބޮޑެތި ގޮންޖެހުންތަކެއް އެބަހުރި ކަމަށެވެ. އެހެންކަމުން ރަށުގައި ހުރެގެން މަތީ ސާނަވީ ނިންމާ ދަރިވަރުންނަށް މަތީ ތައުލީމު އުނގެނުމުގެ ފުރުސަތު ދޭނަމަ، އެ ދަރިވަރު ކިޔަވާ ނިންމައިގެން ރަށަށް ހިދުމަތް ކުރަން ދިޔުމުގެ ފުރުސަތު ބޮޑުކަމަށް ގަބޫލު ކުރެވޭ ކަމަށް މިނިސްޓަރު ވިދާޅުވިއެވެ.
