ޓީޓީން ބޮޑުކޮށް ފީ ނެގި ނަމަވެސް، އިންތިޚާބު ބޭއްވުމަށް އެއްވެސް މައްސަލައެއް ނެތް: މަޙްލޫފް

ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބާ ގުޅޭ ގޮތުން ސްޕޯޓްސް ކޮމިޝަނާއި ސްޕޯޓްސް ކައުންސިލަށް މައްސަލަތަކެއް ހުށަހަޅާފައިވާ ކަމަށާއި، އެހެން ނަމަވެސް އަސާސީ ގަވާއިދުގައިވެސް އަދި ގެޒެޓްކޮށްފައިވާ އިންތިޚާބާ ބެހޭ އިއުލާންގައި އެއްވެސް މައްސަލައެއް ނެތް ކަމަށް ޝަކުވާ ހުށަހެޅި ފަރާތްތަކަށް މިހާރު ސްޕޯޓްސް ކޮމިޝަނުން އަންގާފައިވާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ވަޒީރު މިހެން ވިދާޅުވީ ހޯމަ ދުވަހު ރައްޔިތުންގެ މަޖިލީހުގައި ވަޒީރާ ސުވާލު ކުރުމުގެ ފުރުސަތުގައި މަތިވެރި ދާއިރާގެ މެންބަރު ހަސަން ޒަރީރު ކުރެއްވި ސުވާލަކަށް ޖަވާބު ދެއްވަމުންނެވެ.

މެންބަރު ހަސަން ޒަރީރު ކުރެއްވި ސުވާލުތަކަކީ ވޭތުވެދިޔަ ތިން އަހަރު ފުރިހަމަ މެންބަރެއްގެ އަތުން ނެގުމަށް އަސާސީ ގަވާއިދުގައި ބުނާ 100 ރުފިޔާގެ ބަދަލުގައި ކޮންމެ މެންބަރެއްގެ އަތުން މިހާރު ނަގަމުން ދަނީ 200 ރުފިޔާ ކަމަށާއި، ހިންގާ ގަވާއިދާ ޚިލާފަށް މެންބަރުންގެ އަތުން ފައިސާ ނަގަމުންދާކަން ވަޒީރަށް އެނގިލައްވާތޯ އާއި، އެކަން ހުއްޓުވުމަށް އެއްވެސް ކަމެއް ކުރެއްވިތޯ އާއި، ފިޔަވަޅެއް އެޅުއްވިތޯ އާއި، އެކަމުގައި ޒިންމާވާން ޖެހޭނެ ފަރާތަކީ ކޮބައިތޯއެވެ.

އެ ސުވާލުތަކަށް ޖަވާބުދެއްވަމުން ވަޒީރު ވިދާޅުވީ އިންތިޚާބަކާ ގާތްވުމުން ބޮޑެތި މައްސަލަތައް ހުށަހެޅުމުން އެއީ ވުޒާރާ އާއި، ސްޕޯޓްސް ކޮމިޝަން އަދި ސްޕޯޓްސް ކައުންސިލަށްވެސް އުނދަގޫ ކަންކަން ކަމަށެވެ.

ޓީޓީ އެސޯސިއޭޝަނުގެ އިންތިޚާބާ ގުޅިގެން ޝަކުވާތަކެއް ހުށަހެޅިފައިވާއިރު، އެ މައްސަލަތައް ހުށަހަޅާފައި ވަނީ ސްޕޯޓްސް ކޮމިޝަނާއި ސްޕޯޓްސް ކައުންސިލަށް ކަމަށާއި، މި މައްސަލަ ފުރަތަމަ ހުށަހަޅާފައިވަނީ ސްޕޯޓްސް ކައުންސިލަށް ނަމަވެސް، ސްޕޯޓްސް ކޮމިޝަނަށް މައްސަލަ ހުށަހަޅައިގެން ކުރިއަށް ގެންދިޔުމަށް އެ ފަރާތްތަކަށް އަންގާފައިވާ ކަމަށްވެސް ވަޒީރު ވިދާޅުވިއެވެ.

އާއްމު މެމްބަރުން އަތުން ފައިސާ ނެގުމާއި ގުޅޭ ގޮތުން ކުރިމަތިކުރިވި ސުވާލުތަކާއި ގުޅިގެން ވަޒީރު ވިދާޅުވީ މި މައްސަލަތައް ހުށަހަޅާފައި ވަނީ ޓީޓީ އެސޯސިއޭޝަނުގެ ހިންގާ ކޮމިޓީގެ ހިމެނޭ ތިން މެންބަރުން ކަމަށާއި، ބޮޑުކޮށް ފައިސާ ނަގަމުން ގޮސްފައިވަނީ އެ މެންބަރުންވެސް ހިންގާ ކޮމިޓީގައި ތިބެގެން ކަމަށްވާއިރު، މި ވޭތުވެދިޔަ ތިން އަހަރުވެސް އެއްވެސް ޝަކުވާއެއް މެންބަރަކުވެސް އަދި ކުލަބަކުންވެސް ހުށަހަޅާފައި ނުވާ ކަމަށެވެ.

ވަޒީރު ވިދާޅުވީ ހުރިހާ ފަރާތްތަކަކަށްވެސް ދޭ ޔަގީންކަމަކީ މައްސަލައެއް އުޅޭނަމަ އެކަން ބަލާނެ ކަމަށާއި، ސްޕޯޓްސް ކޮމިޝަނާއި ސްޕޯޓްސް ކައުންސިލަށްވެސް އެއްވެސް ގޮތަކުން ނުފޫޒް ނުފޯރުވާނެ ކަމަށެވެ. މީގެ ކުރީގެ ސްޕޯޓްސް ކައުންސިލަކީ ވަޒީރު އައްޔަންކުރައްވާ ކައުންސިލެއް ނަމަވެސް، މި ސަރުކާރުން އައިސް މިހާރު އެކުލަވާލާފައިވާ ސްޕޯޓްސް ކައުންސިލް ނަގާފައިވަނީ ޤާނޫނުގައި ބުނާ ގޮތަށް އިންތިޚާބު ވެގެން ކަމަށާއި، ކައުންސިލްގައި މަސައްކަތް ކުރާ ނުކުރާ ގޮތެއް ބަލާ ނުފޫޒް ނުފޯރުވާނެ ކަމަށް ވަޒީރު ވިދާޅުވިއެވެ.

މި މައްސަލަ އާއި ގުޅިގެން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަމުން ޓީޓީ އެސޯސިއޭޝަނުގެ ޖެނަރަލް ސެކްރެޓްރީ އިސްމާއިލް ސުޖާއު (ސުޖާ) ވިދާޅުވީ 2016 ވަނަ އަހަރުގެ ހިންގާ ކޮމިޓީން ނިންމާފައިވަނީ އާންމު މެންބަރެއްގެ އަތުން 200 ރުފިޔާ ނެގުމަށާއި، އެހެން ނަމަވެސް އެކަން އަސާސީ ގަވާއިދުން ބަދަލުގެނެސްފައި ނެތް ކަމަށެވެ. މިހާރުގެ ހިންގާ ކޮމިޓީން ޓީޓއާ ހަވާލުވުމުގެ ކުރިން ފީ ބޮޑުކުރުމަށް ނިންމައި އެކަން ކުރަމުން އަންނައިރު، މިހާތަނަށް ހަތަރު ފަހަރު އަހަރީ އާންމު ޖަލްސާ ބާއްވާފައިވާއިރު، އެއްވެސް ޖަލްސާއެއްގައި ފީއާ ގުޅޭ ގޮތުން މެންބަރަކު ސުވާލެއްކޮށް، ކަންބޮޑުމެއް ފާޅުކޮށްފައި ނެތް ކަމަށް ސުޖާ ވިދާޅުވިއެވެ.

ޓީޓީ އެސޯސިއޭޝަންގެ އިންތިޚާބު އަންނަ މަހުގެ އަށްވަނަ ދުވަހު ބޭއްވުމަށް ނިންމާފައިވާއިރު، ރައީސްގެ މަގާމަށް ތިން ބޭފުޅަކު ވަނީ ކުރިމަތިލައްވާފައެވެ. އަދި ނައިބު ރައީސްގެ މަގާމަށް ދެ ބޭފުޅުން ވަނީ ކުރިމަތިލައްވާފައެވެ. ޓީޓީ އެސޯސިއޭޝަނުގެ އިންތިޚާބުގައި ރައީސް އާއި ނައިބު ރައީސްގެ އިތުރުން ހަޒާންދާރުގެ މަގާމާއި، ފިރިހެން އަދި އަންހެން މެންބަރުން ތަމްސީލްކުރާ ގޮނޑި އާއި، ކުލަބުތަކާއި ބެލެނިވެރިން ތަމްސީލުކުރާ ގޮނޑިއަށްވެސް މެންބަރުން އިންތިޚާބު ކުރާނެއެވެ.

އިންތިޚާބާ ގުޅިގެން މި މަހުގެ 26 ވަނަ ދުވަހާ ހަމައަށް ޝަކުވާ ހުށަހެޅުމުގެ ފުރުސަތު އޮތްއިރު، ފައިނަލް ލިސްޓު ނެރޭނީ 26 ވަނަ ދުވަހުގެ ފަހުން ކަމަށް ޓީޓީ އެސޯސިއޭޝަނުން ބުނެއެވެ. ކުރިއަށް އޮތް އިންތިޚާބުގައި 15 ކުލަބަކުން ވޯޓްލާއިރު، 270 މެންބަރުން ވޯޓްލާނެ ކަމަށާއި މިހާރުގެ ހާލަތާއެކު ވޯޓްލުމުގެ ކަންކަން ކުރިއަށްގެންދާނެ ގޮތެއް ނިންމާނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ލަފާގެ މަތިން ކަމަށް ޓީޓީ އެސޯސިއޭޝަނުން ބުނެއެވެ.