ފްލެޓު ޙިޔާނާތުގެ މައްސަލަ ތަހުޤީޤުކޮށް ދައުވާކުރަން ޖެހޭ: މެމްބަރު އަހުމަދު އަބްދުﷲ

ހިޔާ މަޝްރޫއުގެ ފްލެޓުތައް އެވާރޑް ކޮށްފައިވާ ގޮތާމެދު ފެންމަތިވެފައިވާ ޙިޔާނާތުގެ ތުހުމަތުތައް ތަޙުޤީޤުކޮށް، އެ ކަންކަމުގައި ހިމެނޭ ފަރާތްތަކަށް ދައުވާ ކުރުމަށް ބާރަށު ދާއިރާގެ މެމްބަރު އަހުމަދު އަބްދުﷲ ގޮވާލައްވައިފިއެވެ.

ހޯމަ ދުވަހުގެރޭ ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަ ދައްކަވަމުން ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ، ބޯހިޔާވަހިކަމަށް އެދި 23,000 ފޯމެއް ހުށައަޅާފައިވާއިރު، ކުރީ ސަރުކާރުން އެ ފޯމުތައް އިވެލުއޭޓް ކުރުމުގައި ވަކިވަކި ކެޓެގަރީތަކަށް ބަހައި، މައުލޫމާތު ފުރިހަމަ ކޮށްފައި ނުވާ ކަމަށެވެ. އަދި ޕޮއިންޓް ދީފައިހުރީވެސް ވަރަށް "ދޯދިޔާކޮށް" ކަމަށް މެމްބަރު ވިދާޅުވިއެވެ.

ކަން މިހެން ހުރުމާއެކު، މިހާރު ފްލެޓް ކޮމިޓީގެ މަސައްކަތްތައްވެސް ލަސްވުމަށް މެދުވެރި ވެފައިވާކަމަށް އޭނާ ވިދާޅުވިއެވެ.

ފްލެޓް ލިބިފައިވަނީ "ނޭނގި" ކަމަށް އޭރު ފްލެޓު ލިބިފައިވާ ސިޔާސީ ފަރާތްތަކާއި މަޖިލިސް މެމްބަރުން ދައްކަވާ ވާހަކައަށް ރައްދު ދެއްވައި މެމްބަރު އަހުމަދު އަބްދުﷲ އިތުރަށް ވިދާޅުވީ، އޭރުގެ ސަރުކާރުން ހިންގާފައިވަނީ ބޮޑު ޖަރީމާއެއް ކަމަށެވެ. އަދި އެކަމުގެ ފަހަތުގައި ތިބި ފަރާތްތަކުގެ މައްސަލަތައް ތަހުޤީޤުކޮށް، ދައުވާކުރަން ޖެހޭކަމަށް މެމްބަރު ވިދާޅުވިއެވެ.

މެމްބަރު އިތުރަށް ވިދާޅުވީ، ގިނަ ވަގުތުތަކެއް ނެގި ނަމަވެސް، މި ސަރުކާރުން ބޭނުންވީ ރައްޔިތުންނަށް އެންމެ އިންސާފުވެރި ކަމާއެކު މި މައްސަލައަށް ޙައްލެއް ހޯދައިދިނުމަށް ކަމަށެވެ. އަދި ވީހާވެސް އިންސާފުވެރިކަމާއެކު މި މަސައްކަތް ކުރިއަށް ގެންދަވާނެ ކަަމުގެ ޔަޤީންކަން އޮތް ކަމަށް މެމްބަރު ވިދާޅުވިއެވެ.