ޔާމީންގެ ސަރުކާރުން ކަންކުރި ގޮތަށް ވަކި މީހަކަށް ތާއިދުކުރިތޯ ބަލާފައި ނޯންނާނެ
މިނިސްޓަރ އަސްލަމް ނޫސްވެރިންގެ ބައްދަލުވުމުގައި ވާހަކަ ދައްކަވަނީ
ކުރީގެ ސަރުކާރުން އަމަލުކުރި ގޮތަށް ފްލެޓްތައް ދިނުމުގައި ވަކި ޕާޓީއެއްގެ މީހެއްތޯ ބަލާފައިނުވާނެ ކަމަށާއި، ފްލެޓްތައް ދިނުމުގައި އަމަލުކުރީ ވަރަށް އިންސާފުވެރިކޮށް ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
ހަތަރު ކެޓެގެރީއެއްގެ ފްލެޓްތަކުގެ ލިސްޓު އާންމުކުރުމަށް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު އަސްލަމް ވިދާޅުވީ، މިފަހަރު ހައްގުވެރިން ކަނޑައެޅުމުގައި ރައީސް ޔާމީންގެ ސަރުކާރުން ކަންކުރި ގޮތަށް ވަކި މީހަކަށް ތާއިދުކުރިތޯ ބަލާފައި ނޯންނާނެ ކަމަށެވެ. އަދި ވަކި މީހަކަށް ވޯޓުލިތޯވެސް ބަލާފައި ނޯންނާނެ ކަމަށާއި، ފްލެޓްތަކުގެ ލިސްޓުގައި ހިމެނޭނީ ހައްގުވެރިން ކަމަށް މިނިސްޓަރު ވިދާޅުވިއެވެ.
ހޯމަ ދުވަހު އާންމުކުރި ހަތަރު ކެޓަގަރީއަށް ފޯމު ހުށަހަޅާފައިވާ މީހުންގެ ތެރެއިން ކޮމިޓީން ބެލިބެލުމުގައި އެ ކެޓަގަރީއަކަށް ފޯމު ހުށަހެޅުމަށް ޝަރުތު ހަމަވާ މީހުންނާއި، ޝަރުތު ހަމަނުވާ މީހުން، ޝަރުތު ހަމަނުވާ ކަމަށް ކޮމިޓީއަށް ފެންނަ ސަބަބާއެކު ވަގުތީ ލިސްޓުގައި އާންމުކޮށްފައިވެއެވެ.
އަދި ކެޓަގަރީތަކަށް ކުރިމަތިލުމަށް ޝަރުތު ހަމަވާ މީހުންގެ ތެރެއިން، ދިރިއުޅުމުގެ ހާލަތު ބެލުމުގެ ކަންކަން ކުރިއަށްގެންދެވިފައިނުވާ މީހުންނަށް ސަބަބާއެކު ވަގުތީ ލިސްޓުގައި ފާހަގަކޮށްފައިވެއެވެ. ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވަނީ ހިޔާ މަޝްރޫއުގެ އެހެން ކެޓަގަރީތަކުގެ މަސައްކަތް ނިމުނުހާ އަވަހަކަށް ވަގުތީ ލިސްޓު އިއުލާން ކުރާނެ ކަމަށް ބުނެފައެވެ.
