އިޓަލީ އިން ކޮވިޑް-19 ގެ ކޭސްތައް ފެނުން އިތުރުވެފައިވީ ނަމަވެސް އަލުން ލޮކްޑައުނަކަށް ދިއުމުގެ ވިސްނުން ނެތް ކަމަށް އެ ގައުމުގެ ހެލްތު މިނިސްޓަރު ރޮބާޓޯ ސްޕެރަންޒާ ވިދާޅުވެއްޖެއެވެ.
މިނިސްޓަރު ވިދާޅުވީ މިހާރުގެ ހާލަތު، ފެބްރުއަރީ އަދި މާރޗު މަހުގެ ހާލަތާއި ވަރަށް ތަފާތު ކަމަށެވެ. އޭރު ބައްޔަށް ޕޮޒިޓީވްވާ މީހުން ދެނެގަންނަން ވެސް ދަތިވި ކަމަށާއި އެހެން ނަމަވެސް މިހާރު އިޓަލީގެ ސިއްހީ ނިޒާމު އޮތީ ހަރުދަނާކޮށް ބައްޔާ ކުރިމަތިލާން ތައްޔާރަށް ކަމަށެވެ. އެ ގައުމުގެ އައިސީޔޫ ގައި މިހާރު ދެގުނަ އަށް އެނދު އެބަހުރި ކަމަށް ވެސް މިނިސްޓަރި ވިދާޅުވިއެވެ.
އާދިއްތަ ދުވަހު، އިޓަލީގެ ހެލްތު މިނިސްޓަރު މިހެން ވިދާޅުވި އިރު، ހޮނިހިރު ދުވަހު އެކަނިވެސް އެ ގައުމުން ވަނީ 1071 އައު ކޭސް ފެނިފައެވެ. މިއީ މޭ މަހު އެ ގައުމުގައި އިއުލާނު ކޮށްފައި އޮތް ލޮކްޑައުން އުވާލިފަހުން އިޓަލީ އިން 1000 އަށް ވުރެ ގިނަ މީހުން ކޮވިޑް-19 އަށް ޕޮޒިޓިވްވި ފުރަތަމަ ދުވަހެވެ.
އިޓަލީ އިން މިހާރު 259,345 މީހުން ބައްޔަށް ޕޮޒިޓިވްވެފައިވާ އިރު، އެ ގައުމުން ކޮވިޑް-19 ޖެހިގެން މަރުވި މީހުންގެ އަދަދު ވަނީ 35,437 އަރާފައެވެ. އިޓަލީ އިން ކޭސްތައް އިތުރުވާން ފަށާފައިވީނަމަވެސް، ސްޕެއިން އަދި ފްރާންސް އިން ޕޮޒިޓިވްވަމުން އަންނަ މީހުންނަށް ވުރެ އިޓަލީ އިން ދުވާލެއްގެ މައްޗަށް ޕޮޒިޓިވްވަމުން އަންނަ މީހުންގެ އަދަދު ދަށް ކަމަށް ތަފާސް ހިސާބުތައް ދައްކައެވެ.
