މަސްތުވާތަކެތީގެ އޮޕަރޭޝަން: އަތޮޅުތެރޭގެ ދެރަށަކުން މީހުން ހައްޔަރުކޮށްފި
23 އޯގަސްޓު 2020 | އާދީއްތަ 09:58ތ.ގުރައިދޫއިން ހައްޔަރުކުރީ 30 އަހަރުގެ ފިރިހެނެއް
މަސްތުވާތަކެތި ހޯދުމަށް ފުލުހުން ހިންގި ޚާއްސަ އޮޕްރޭޝަނެއްގެ ތެރެއިން
ތ.ގުރައިދޫ ގެއެއް ބަލައި ފާސްކޮށް މަސްތުވާތަކެތި ކަމަށް ޝައްކުކުރެވޭ ތަކެއްޗާއެކު 30 އަހަރުގެ މީހެއް ހައްޔަރު ކޮށްފިއެވެ.
ފުލުހުން ބުނީ މަސްތުވާތަކެއްޗާ ދެކޮޅަށް ފުލުހުން ކުރަމުން އަންނަ މަސައްކަތުގެ ތެރެއިން، ގުރައިދޫ ޕޮލިސް ސްޓޭޝަނާއި ފުލުހުންގެ އިންޓެލިޖެންސާ ގުޅިގެން، ގުރައިދޫގެ ގެއެއް ބަލައި ފާސްކޮށް މަސްތުވާތަކެއްޗަށް ޝައްކުކުރެވޭ ތަކެއްޗާއެކު މީހަކު ހައްޔަރުކޮށްފައިވާ ކަމަށެވެ.
މި މައްސަލައާ ގުޅިގެން ހައްޔަރު ކޮށްފައިވަނީ 30 އަހަރުގެ ދިވެހި ފިރިހެނެއް ކަމަށާއި، އޭނާ ހައްޔަރުކޮށްފައިވަނީ މަސްތުވާތަކެތި ބޭނުންކޮށް އެތަކެތީގެ ވިޔަފާރިކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން އާދިއްތަ ދުވަހުގެ ހެނދުނު 07:15 ހާއިރު ކަމަށް ފުލުހުން ބުނެއެވެ.
ފުލުހުން ބުނީ އޭނާ ދިރިއުޅޭ ގެ ކޯޓު އަމުރުގެ ދަށުން ބަލައި ފާސްކުރިއިރު މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ފިލްމު ހުސްކުރި ދަޅެއް ފެނިފައިވާ ކަމަށެވެ.
މި މައްސަލަ ގުރައިދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ. މީގެއިތުރުން ފުލުހުން ވަނީ މ.މުއްޔަށް އެތެރެކުރި މަސްތުވާތަކެތި ހޯދައި 27 އަހަރުގެ ފިރިހެނެއް ހައްޔަރު ކޮށްފައިވާ ކަމަށެވެ.
ފުލުހުން ބުނީ އިންޓަލިޖެންސަށް ލިބުނު މައުލޫމާތަކާ ގުޅިގެން އޯގަސްޓް 22 ވަނަ ދުވަހު އެމީހާ ހައްޔަރުކޮށްފައިވަނީ މާލެއިން މުއްޔަށް އައި ބޯޓަކުން ބޭލި ކޮތަޅެއް ހިފައިގެން ދަނިކޮށް އެރަށު ބަނދަރު ސަރަހައްދުން ކަމަށެވެ.
ފުލުހުން ބުނީ އެމީހާ ހުއްޓުވައި ބަލައިފާސްކުރަން އުޅުމުން އޭނާގެ އަތުގައި އޮތް ކޮތަޅު އެއްލާލި ކަމަށާއި، އެކޮތަޅު ނަގައި ބަލައިފާސްކުރިއިރު އެކޮތަޅު ތެރޭގައި އޮތް ޖިންސެއްގެ ތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައިވާ ކަމަށެވެ.
މިމައްސަލަ މުލީ ޕޮލިސް ސްޓޭޝަނުން ދަނީ އިތުރަށް ތަހުގީގު ކުރަމުންނެވެ.
