މަޝްހޫރު ޕްރިންސިޕަލް ތޯހާ ޓީޓީ އެސޯސިއޭޝަނުގެ ރައީސް ކަމަށް

ޣިޔާސުއްދީން އިންޓަނޭޝަނަލް ސްކޫލްގެ ޕްރިންސިޕަލްގެ މަގާމު 10 އަހަރު އަދާކުރި ތޯހާ ސަލީމް ޓޭބަލް ޓެނިސް އެސޯސިއޭޝަނުގެ ރައީސް ކަމަށް ކުރިމަތި ލައްވައިފިއެވެ.

ތައުލީމީ ދާއިރާގައި 20 އަހަރަށް ވުރެ ގިނަ ދުވަހު ޚިދުމަތް ކުރައްވައި، ކާމިޔާބު އެތައް ދަރިވަރެއް ނެރެދީފައިވާ ތޯހާ "ރާއްޖެ.އެމްވީ" އަށް ދެއްވި އިންޓަވިއުއެއްގައި ވިދާޅުވީ ޓީޓީ އެސޯސިއޭޝަނުގެ ރައީސް ކަމަށް ކުރިމަތިލެއްވުމަށް ނިންމެވީ ޓީޓީގެ ވަރަށް ގިނަ ކުޅުންތެރިންނާއި، ޓީޓީގައި ހަރަކާތްތެރިވާ އެކި ފަރާތްތަކުގެ އެދުމުގެ މަތިން ކަމަށެވެ.

ސްކޫލް ދައުރުގައި ތޯހާ އަކީ ގިނަ ކުޅިވަރުތަކެއް ކުޅުއްވި އެތުލީޓެކެވެ. އޭގެ ތެރޭގައި ފުޓްބޯޅަ އާއި އެހެންވެސް ބައެއް ކުޅިވަރުތައް ކުޅުއްވިއެވެ. މަޝްހޫރު ޓީޓީ ކުޅުންތެރިޔާ އަލްމަރްޙޫމް ދުންތަރި އިބްރާހިމް މަނިކުގެ ހަނދާނުގައި ދުންތަރި އާއިލާ އާއި ޓީޓީ އެސޯސިއޭޝަނުން ކޮންމެ ރަމަޟާން މަހަކު ކުރިއަށްގެންދާ ޓީޓީ މުބާރާތުގައި ތޯހާ ވަނީ ވާދަކޮށްފައެވެ.

ހަ އަހަރު ދުވަހު އަތޮޅުތެރޭގެ އެކި ސްކޫލްތަކުގައި ޕްރިންސިޕަލްގެ މަގާމު އަދާކުރެއްވި ތޯހާ، އީޕީއެސްއެސްއިން ޖީސީއީ އޯ ލެވެލް ހެއްދެވުމަށްފަހު، ތައުލީމީ ދާއިރާއަށް އެންމެ ފުރަތަމަ ވަދެވަޑައިގަތީ، އުފަން ރަށް، ހއ. ހޯރަފުށީގައި ހުންނަ އަތޮޅު މަދަރުސާގެ ޓީޗަރެއްގެ ގޮތުގައެވެ. އެ ސްކޫލުގައި ތިން އަހަރު މަސައްކަތްކުރެއްވުމަށް ފަހު އިންޑިއާއަށް ވަޑައިގެން ސްކޫލް މެނޭޖްމަންޓުން ޑިޕްލޮމާ ހާސިލްކުރެއްވިއެވެ. ޓީޗިންގެ ދާއިރާއިން ފުރަތަމަ ޑިގްރީ އަދި މެލޭޝިއާއިން އެޑިއުކޭޝަނަލް މެނޭޖްމަންޓުން މާސްޓާސްގެ އިތުރުން ސިންގަޕޫރުން ޑިޕާޓްމެންޓަލް މަނޭޖްމަންޓުގެ ދާއިރާއިން ޑިޕްލޮމާވެސް ހާސިލް ކުރައްވައިފައިވާ ތޯހާ ވިދާޅުވީ ތައުލީމީ ދާއިރާގެ މީހަކަށް ނުވިނަމަ އޭނާ ހުންނާނީ ކުޅިވަރުގެ ދާއިރާގެ ތެރޭގައި ކަމަށެވެ.

ރާޒުވާގެ ގައުމީ އިންސްޓަކްޓަރެއްގެ ގޮތުގައިވެސް ހިމެނޭ ތޯހާ އަކީ ޗެސް ފެޑަރޭޝަން އޮފް މޯލްޑިވްސްގެ ހިންގާ ކޮމިޓީގައިވެސް ހިމެނޭ ބޭފުޅެކެވެ. ރާއްޖޭގައި ރާޒުވާ ކުރިއެރުވުމަށް ޣިޔާސުއްދީން އިންޓަނޭޝަނަލް ސްކޫލްގެ ކަރިކިއުލަމްގެ ތެރޭގައި އެ ކުޅިވަރު ހިމެނިގެން ކިޔަަވައިދެއްވާފައިވެއެވެ.

ތޯހާ ވިދާޅުވީ ޓީޓީ އެސޯސިއޭޝަނަށް އޭނާއެކު ނުކުންނަ ޓީމަކީ ގާބިލް، ކުޅަދާނަ ޓީމެއް ކަމަށާއި، ޓީޓީގެ ކުރިމަގަށް ވިސްނާ ކޮންމެ ކުލަބެއް އަދި ކުޅުންތެރިއަކުވެސް އެޓީމަށް ތާއީދު ކުރާނެ ކަމަށެވެ.

ތޯހާއާއެކު ޓީޓީގެ ވަރުގަދަ ޓީމެއް އޮތްއިރު، އޭގެ ތެރޭގައި ގައުމީ ޗެމްޕިއަންކަން ހޯދާފައިވާ ތިން ބޭފުޅާކާއި، ގައުމީ ޓީމަށް ކުޅެފައިވާ ދެ ކުޅުންތެރިން އަދި މިހާރުވެސް ޓީޓީގެ ހިންގުމުގައި ހަރަކާތްތެރިވާ ބޭފުޅުން ހިމެނެއެވެ.

ޓީޓީ އެސޯސިއޭޝަންގެ މަގާމުތަކަށް ކުރިމަތިލުމުގެ ފުރުސަތު ބުރާސްފަތި ދުވަހު ހަމަވެފައިވާއިރު، އެ އެސޯސިއޭޝަނުގެ އިންތިޚާބުގައި ރައީސްގެ މަގާމަށް ތިން ބޭފުޅަކު ވާދަކުރެއެވެ. އަދި ނައިބު ރައީސް ކަމަށް ދެ ބޭފުޅަކު ވަނީ ކުރިމަތިލާފައެވެ.

ޓީޓީ އެސޯސިއޭޝަނުގެ އިންތިޚާބު އަންނަ ސެޕްޓެމްބަރު މަހުގެ އަށްވަނަ ދުވަހު ބޭއްވުމަށް ނިންމާފައިވާއިރު، އިންތިޚާބު ބާއްވާނެ ގަޑި އާއި ބާއްވާނެ ތަނެއް ނިންމާނީ ހެލތު ޕްރޮޓެކްޝަން އޭޖެންސީ (އެޗްޕީއޭ) ގެ ލަފާގެ މަތިން ކަމަށް ޓީޓީ އެސޯސިއޭޝަނުން ބުނެއެވެ.