2020-2021 ވަނަ އަހަރުގެ ސީޒަނުގެ ފްރެންޗް ލީގުގެ ކުޅުން ހުކުރު ދުވަހު ފަށައިފިއެވެ.

ކޮވިޑް-19 އާ ގުޅިގެން މިދިޔަ ސީޒަނުގެ ފްރެންޗް ލީގު އޭޕްރީލް މަހުގެ 30 ވަނަ ދުވަހު ކެންސަލް ކޮށް ޕީއެސްޖީއަށް ޗެމްޕިއަންކަން ދިންއިރު، ފްރެންޗް ލީގަކީ ކޮވިޑް-19 އާ ގުޅިގެން ޔޫރަޕްގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ. އެއާއެކު 167 ދުވަސް ފަހުން ފްރެންޗް ލީގުގެ ކުޅުން ހުކުރު ދުވަހު ފެށިއިރު، ފްރެންޗް ލީގަކީ 2020-2021 ވަނަ އަހަރުގެ ސީޒަން އެންމެ ފުރަތަމަ ފެށި ލީގެވެ.

ފްރެންޗް ލީގުގެ ފުރަތަމަ މެޗުގައި ހުކުރު ދުވަހު ބައްދަލުކުރީ ބޯޑޯ އާއި ނޯންޓްސްއެވެ. މި މެޗު ނިމުނީ ދެ ޓީމުންކުރެ ޓީމަކަށް ލަނޑެއް ކާމިޔާބުނުކުރެވި އެއްވަރުވެގެންނެވެ.

މީގެ ކުރިން ފްރެންޗް ލީގު ހުޅުވާ މެޗުގައި ހުކުރު ދުވަހު ބައްދަލުކުރަން އޮތީ މާސޭ އާއި ސެއިންޓް އެޓިއެންއެވެ. އެކަމަކު މާސޭއިން ކޮވިޑް-19 ގެ ކޭސްތަކެއް ފެނުމާއެކު އެލްއެފްޕީން ވަނީ އެ މެޗު ފަސްކޮށްފައެވެ.

މީގެ ކުރިން އެލްއެފްޕީން ނެރުނު ބަޔާނެއްގައި ބުނީ މާސޭއިން ކޮވިޑް-19 ގެ އިތުރު ކޭސްތަކެއް ފެނުމާ ގުޅިގެން، މާސޭ އާއި ސެއިންޓް އެޓިއެން ބައްދަލުކުރާ މެޗު އަންނަ ސެޕްޓެމްބަރު މަހުގެ 16 ނުވަތަ 17 ވަނަ ދުވަހަށް ފަސްކުރަން ނިންމާފައިވާ ކަމަށެވެ. މީގެ އިތުރުން އެލްއެފްޕީގެ ބަޔާނުގައި ވަނީ އެ އިދާރާއިން ކޮވިޑް-19 ކޮމެޓީއެއް އެކުލަވާލާފައިވާ ކަމަށާއި، ކޮވިޑް-19 ގެ އިތުރު ކޭސްތައް ފެންނަމުންދާ ވަރަކުން ލީގުގެ ތާވަލަށް ބަދަލުތަކެއް ގެންނަން ޖެހިދާނެ ކަމަށް ބުނެފައެވެ.

2020-2021 ވަނަ އަހަރުގެ ސީޒަނުގެ ފްރެންޗް ލީގުގެ ކުޅުން ފެށިއިރު، ޕީއެސްޖީން އަންނަނީ 2019-2020 ވަނަ އަހަރުގެ ސީޒަނުގެ ޔުއެފާ ޗެމްޕިއަންސް ލީގުގައި ވާދަކުރަމުންނެވެ. އެގޮތުން އެ މުބާރާތުގެ ފައިނަލަށް ޕީއެސްޖީ ދަތުރުކޮށްފައިވާއިރު، ފްރެންޗް ލީގުގައި ޕީއެސްޖީން މެޗެއް ކުޅޭނީ މި މަހުގެ 29 ވަނަ ދުވަހުއެވެ.