އެކަޑެމިކް ކަލަންޑަރަށް ދާއިމީ ބަދަލެއް ގެނައުމާއި މެދު ދަނީ މަޝްވަރާ ކުރެވެމުން: އެޑިޔުކޭޝަން
މިހާރު އޮތްގޮތުން އަހަރުގެ މެދުތެރެއިން އެކަޑެމިކް ކަލަންޑަރު ފެށޭގޮތަށް ހެދިދާނެ
ކޮވިޑް-19 އާއި ގުޅިގެން ސްކޫލްތައް ބަންދުކުރުމަށްފަހު އަލުން ސްކޫލްތައް ހުޅުވި އިރު އިޖްތިމާއީ ގައިދުރުގަމުގެ ތެރެއިން ދަރިވަރުންތަކެއް ސްކޫލަށް ވަންނަނީ
ކޮވިޑް-19 އާއި ގުޅިގެން މި އަހަރުގެ އެކަޑެމިކް ކަލަންޑަރަށް ގެނައި ބަދަލަށް ދާއިމީ ގޮތެއްގައި އަމަލުކުރުމާއި މެދު މަޝްވަރާ ކުރެވެމުންދާ ކަމަށާއި، ނަމަވެސް އެކަން ނިންމާނީ ކަމާބެހޭ ހުރިހާ ފަރާތްތަކާއެކު މަޝްވަރާ ކުރުމަށް ފަހުގައި ކަމަށް އެޑިޔުކޭޝަން މިނިސްޓްރީން ބުނެފިއެވެ.
ރާއްޖެ ޓީވީގެ "ތައުލީމާއި ގުޅޭ ހާއްސަ ޕްރޮގްރާމް" ގައި ވާހަކަ ދައްކަވަމުން އެޑިޔުކޭޝަން މިނިސްޓްރީގެ ސްޓޭޓް މިނިސްޓަރ ފާތިމަތު ނަސީރު ވިދާޅުވީ މި އަހަރު ފެށި އިރު ޓުއަރިޒަމް މިނިސްޓްރީ އާއި އެހެނިހެން ތަންތަނުން އެކަޑެމިކް ކަލަންޑަރަށް ބަދަލު ގެނައުމަށް އެދެމުން ދިޔަ ކަމަށެވެ. އެގޮތުން މި އަހަރުގެ މެދު ޗުއްޓީ ވަރަށް ބޮޑަށް އިތުރު ކޮށްފައިވާނެ ކަމަށާއި، ނަމަވެސް ކޮވިޑްގެ ހާލަތާއި ގުޅިގެން އެ ޗުއްޓީގެ ބޭނުން އެންމެ ރަނގަޅު ގޮތަކަށް ނުހިފޭ ކަމަށެވެ.
އަދި އެއީ ދާއިމީ ބަދަލެއްގެ ގޮތުގައި ނުހެދި ނަމަވެސް އެ ބޭފުޅުންގެ އެދިވަޑައިގަތުމުގެ މަތިން އަހަރީ ޗުއްޓީގެ ތެރެއިން 2 ހަފްތާ ނަގެމަށްފަހު މެދު ޗުއްޓީ އޮތީ ދިގުކޮށްފައި ކަމަށް ފާތިމަތު ނަސީރު ވިދާޅުވިއެވެ. ނަމަވެސް މިއީ ދާއިމި ނިންމުމެއް ނޫން ކަމަށާއި، މިކަމާއި މަޝްވަރާ ކުރެވެމުންދާ ކަމަށެވެ.
ފާތިމަތު ނަސީރު ވިދާޅުވީ މިވަގުތު ގެނެވެން އޮތް ބަދަލުތަކަކީ މިއީ ކަމަށާއި، ދަރިވަރުންގެ ކިޔެވުމަށް ގެއްލުން ލިބޭނެ އެއްވެސް ގޮތަކަށް މަސައްކަތެއް ނުކުރެވޭނެ ކަމަށެވެ. އެހެންކަމުން އަހަރުގެ ކަލަންޑަރު ރާވައިގެން ކުރިއަށް ގެންދާނީ އެގޮތަށް ބަލާފައި ކަމަށާއި، މިހާރު މިއޮތީ އެންމެ ރަނގަޅު ބަދަލެއް ގެނެވިފައި ކަމަށެވެ.
އަދި މިހާރު އެކަޑެމިކް ކަލަންޑަރަށް ގެނެސްފައިވާ ބަދަލަކީ ދާއިމީ ބަދަލެއް ނޫން ނަމަވެސް މަޝްވަރާތަކާއި ރޭވުންތަކުގެ ތެރެއިން ނިންމާނީ ކޮވިޑް ހާލަތު ދެމިގެން ދިޔަ ނަމަވެސް ސްކޫލް ނިޒާމް ހުއްޓުމެއް ނެތި ދަރިވަރުންނަށް ކިޔަވައިދެވި އިމްތިހާނުތަކަށް ކުދިންނަށް ދެވޭނެ ގޮތަކަށް ކަމަށެވެ.
ކޮވިޑާއި ގުޅިގެން އެކަޑެމިކް ކަލަންޑަރަށް ގެނައިން މައިގަނޑު ބަދަލުތަކުގެ ތެރޭގައި ފުރަތަމަ ޓާރމުގެ ކިޔެވުން ނިމޭނީ މި އަހަރުގެ ޑިސެމްބަރ މަހުގެ 3 ވަނަ ދުވަހުއެވެ. އަދި 2020 ވަނަ އަހަރުގެ ދެވަނަ ޓާރމުގެ ކިޔެވުން ފެށޭނީ 2021 ވަނަ އަހަރުގެ ޖެނުއަރީ މަހުގެ 10 ވަނަ ދުވަހުއެވެ. އޭގެ ފަހުން މިޑް ޓާރމް ހޮލިޑޭއަށް މާޗް މަހުގެ 7ން 11ށް ސްކޫލްތައް ބަންދު ވުމަށްފަހު ދެވަނަ ޓާރމުގެ ކިޔެވުން އެއްކޮށް ނިމޭނީ ޖޫން މަހުގެ 24 ވަނަ ދުވަހުއެވެ.
2021 ވަނަ އަހަރުގެ ފުރަތަމަ ޓާރމް ނުވަތަ އެކަޑެމިކް ކަލަންޑަރު ފެށޭ ތާރިހަކީ މިހާރު އޮތްގޮތުން އޮގަސްޓް 10 އެއްގައެވެ. ޓީޗަރުން ރިޕޯޓް ކުރަން ޖެހޭނީ އޮގަސްޓް 3 ވަނަ ދުވަހުއެވެ.
