ސަރުކާރުން ރާއްޖޭގެ ފަސް ސަރަހައްދެއްގައި ތަރައްގީ ކުރަމުން އަންނަ ޓާޝިއަރީ ހޮސްޕިޓަލްތަކުގެ ތެރެއިން އެސްޓީއޯ އިން މެޝިނަރީސް ގެންނަން ހަވާލު ކުރި ހަތަރު ހޮސްޕިޓަލަށް ބޭނުންވާ ސާމާނާއި އާލާތްތައް ގެނެވިއްޖެ ކަމަށާއި، ދީފައިވާ މުއްދަތުގެ ތެރޭގައި މަސައްކަތް އެއްކޮށް ނިންމާލެވޭނެ ކަމަށް އެސްޓީއޯއިން ބުނެފިއެވެ.
ރާއްޖެ ޓީވީގެ "ގައުމީ ތަރައްގީ" ޕްރޮގްރާމުގައި ވާހަކަ ދައްކަވަމުން އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު ވިދާޅުވީ އެސްޓީއޯގެ މެޑިކަލްސް އިން ކުރަމުންދާ މަސައްކަތުގެ އިތުރުން އެންމެ ބޮޑު އެއް ޕްރޮޖެކްޓަކަށް ކުރިއަށް ގެންދަނީ މާލޭގެ އައިޖީއެމްއެޗް ފެންވަރަށް ރާއްޖޭގެ ހަތަރު ހޮސްޕިޓަލެއް ތަރައްގީ ކުރުން ކަމަށެވެ. މި ހަތަރު ހޮސްޕިޓަލަކީ ހދ. ކުޅުދުއްފުށި ރީޖަނަލް ހޮސްޕިޓަލް، ރ. އުނގޫފާރު ރީޖަނަލް ހޮސްޕިޓަލް، ލ. ގަން ރީޖަނަލް ހޮސްޕިޓަލް އަދި ޑރ. އަބްދުއްސަމަދު މެމޯރިއަލް ހޮސްޕިޓަލެވެ.
އަމްރު ވިދާޅުވީ ހޮސްޕިޓަލްތަކަށް ބޭނުންވާ އިކުވިޕްމަންޓްތައް އެސްޓީއޯ އިން ގެނެސް އިންސްޓޯލް ކުރުމުގެ މަސައްކަތް ފަށާފައިވާ ކަމަށާއި، ގާތްގަނޑަކަށް ހުރިހާ އައިޓަމެއް ރާއްޖެ ގެނެވި އިންސްޓޯލް ކުރުމުގެ މަސައްކަތް ކުރަމުންދާ ކަމަށެވެ. އަދި މީގެ ތެރޭގައި ހިމެނޭ މައިގަނޑު ބައިތަކަކީ އައިސީޔޫ ކެޕޭސިޓީ އިތުރު ކުރުމާއި، ވެންޓިލޭޓަރ އިތުރު ކުރުމާއި ޕޭޝަންޓް މޮނިޓަރ އިތުރު ކުރުމާއި، ކުޑަކުދިންގެ އައިސީޔޫ އެކްސްޕެންޑް ކުރުމުގެ މަސައްކަތުގެ އިތުރުން ބައެއް އެހެނިހެން މަސައްކަތްތައް ކަމަށެވެ.
އޮޕަރޭޝަންސް ތިއޭޓަރުތައް މިހާރަށްވުރެ ރަނގަޅުކޮށް ހިދުމަތް ދެވޭނެގޮތް ހެދުން. އަދި ދަތުގެ ފަރުވާއަށް މި ހުރިހާ ހޮސްޕިޓަލެއްގައި ވެސް އޯޕީޖީ މެޝިން ބެހެއްޓުން. އަދި ޓިޝޫ ސާމްޕަލް ނަގައިގެން ކެންސަރ ދެނެގަތުން ކުޅުދުއްފުށީގައި ފެށިގެންދާނެ. މީގެ އިތުރުން ލޭބަރ ރޫމް ވެސް އެކްސްޕެންޑް ކުރެވިގެންދާނެ. ނަރސިންގެ ކެއަރ އާއި ބަލިމީހުން ބައިތިއްބާނެ ބެޑް ކެޕޭސިޓީ އިތުރުވެގެންދާނެ. ކުޅުދުއްފުށީގައި 30 އެނދު އިތުރުވެގެންދާނެ. ތިނަދޫގައި 12 އެނދު، ލ. ގަމުގައި 10 އެނދު އަދި އުނގޫފާރުގައި 11 އެނދު އިތުރު ކުރެވިގެންދާނެ. އަދި ކުޅުދުއްފުށީގައި އެމްއާރުއައިގެ ހިދުމަތް ފެށިގެންދާނެ. ލ. ގަމާއި ރ. އުނގޫފާރި އަދި އަބްދުއްސަމަދު މެމޯރިއަލް ހޮސްޕިޓަލުގައި ސީޓީ ސްކޭންގެ ހިދުމަތް ފެށިގެންދާނެ. މީގެ އިތުރުން ހުރިހާ ހޮސްޕިޓަލެއްގައި 2 އެކްސްރޭ މެޝިން ބަހައްޓާ އެއިން ހިދުމަތްދޭން ފަށާނެ،އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު
އަމްރު ވިދާޅުވީ އައިޖީއެމްއެޗްގެ ފެންވަރަށް 4 ހޮސްޕިޓަލުގައި ފިޒިއޯތެރަޕީގެ ހިދުމަތް ފުޅާ ކުރުމަށްޓަކައި އާ އާލާތްތަކެއް ގެނެވި ބޭނުން ކުރަން ފެށުމުން ރަނގަޅު ހިދުމަތްތަކެއް ދެވިގެންދާނެ ކަމަށެވެ. އަދި ހޮސްޕިޓަލުގައި މެޝިނަރީޒް ބެހެއްޓި މަސައްކަތްތައް ނިމުމުން 4 ހޮސްޕިޓަލުގައި ވެސް މާލޭގެ އައިޖީއެމްއެޗާއި އެއް ފެންވަރެއްގައި ހިދުމަތްތައް ފޯރުކޮށްދެވިގެންދާނެ ކަމަށް އަމްރު ވިދާޅުވިއެވެ.
އަމްރު ވިދާޅުވީ އިމްޕޯޓް ކުރަން ޖެހޭ ހުރިހާ ސަމާނެއް އިމްޕޯޓް ކުރެވިއްޖެ ކަމަށާއި، ހޮސްޕިޓަލް ބޮޑުކުރަމުންދާ ވަރަކަށް މެޝިނަރީޒްތައް ބަހައްޓަމުންދާ ކަމަށެވެ.
މަސައްކަތް ނިމިގައިވާ ބައެއް ތަންތަނުގައި މެޝިނަރީޒް ވާނީ އިންސްޓޯލް ކުރުމުގެ މަސައްކަތް ފަށާފައި. އަޅުގަނޑުމެންގެ ޓީމްތައް ރަށްރަށުގައި ހަރަކާތްތެރިވަމުން އެބަދޭ. އިރާދަ ކުރެއްވިއްޔާ ހުރިހާ އިކްވިޕްމަންޓެއް ގެނެވިފައި ހުރީ. ދެން މިކޮޅުގައި އަޅުގަނޑުމެންގެ ބައޯމެޑިކަލް އިންޖިނިއަރުން އެބަތިބި. އެހެންވީމާ އިންސްޓޮލޭޝަން މަސައްކަތުގައި އަޅުގަނޑުމެން ނުޖެހޭ ބަޔަކަށް ޑިޕެންޑްވާކަށް. އަޅުގަނޑުމެންނަށް ދީފައިވާ މުއްދަތުގެ ތެރޭގައި މަސައްކަތް އެއްކޮށް ނިންމާލެވޭނެ. އަޅުގަނޑުމެންނަށް ހަގީގަތުގައި މާބޮޑު ދައްޗެއް ދިމާނުވޭ. އެއީ އަޅުގަނޑުމެން މި ފަހަރުވެސް ކޮވިޑް-19ށް ޓެސްޓުކުރަން ބޭނުންވާ މެޝިނުގެ އޮޓަމޭޝަން ބައި ގެނެސް އިންސްޓޯލް މިކުރީ. ދެން ދަތުރުފަތުރު ކުރަން ހުރި ދަތިތަކާއި ގުޅިގެން އަޅުގަނޑުމެންގެ އިންޖިނިއަރުން ވީޑިއޯ ކޮންފަރެންސް މެދުވެރިކޮށް މަސައްކަތް ކުރަމުން މިދަނީ. އެހެންވީމަ ބޭރުން އިންޖިނިއަރަކު ނައިސްގެން މެޝިނެއް އިންސްޓޯލް ނުކުރެވި ހުންނަންޖެހޭ ހާލަތެއް ނާދޭ،އެސްޓީއޯގެ މެނޭޖިންގ ޑިރެކްޓަރ ހުސައިން އަމްރު
އަމްރު ވިދާޅުވި އެސްޓީއޯ މެޑިކަލްސް އިން ގެނެސް އިންސްޓޯލް ކުރާ މެޝިންތަކަކީ ދުނިޔޭގެ ވަރުގަދަ ބްރޭންޑްތައް ކަމަށެވެ. އޭގެ ތެރޭގައި ޖެނެރަލް އިލެކްޓްރިކް، ފިލިޕްސް އަދި ސީމެން ހިމެނޭ ކަމަށާއި، އެ ފަރާތްތަކާއިއެކު ހެދިފައިވާ އެއްބަސްވުމެއްގައި ސޮއި ވެސް ކޮށްފައި ވާނެ ކަމަށެވެ. އަދި އެއީ އެ ފަރާތްތަކުގެ އެހީތެރިކަން އެސްޓީއޯ މެޑިކަލްސް އަށް ލިބޭ ގޮތަށް ކަމަށެވެ. އަމްރު ވިދާޅުވީ އެސްޓީއޯ އިން ގެންނަ މެޝިން ޑައުންވެގެން ސްޕެއަރ ނުލިބިގެން އަދި ހަދާނެ ބަޔަކު ނުތިބެގެން ތިބޭކަން ނުޖެހޭނެ ކަމަށާއި، އެސްޓީއޯ މެޑިކަލްސްގައި އެކަން ކުރެވޭނެ އިންޖިނިއަރުން އެބަތިބި ކަމަށެވެ.
އެސްޓީއޯ އިން އަންނަނީ ރާއްޖޭގެ ހުރިހާ ހޮސްޕިޓަލްތަކަށާއި ސިއްހީ ހިދުމަތްދޭ ތަންތަނަށް ބޭނުންވާ މެޑިކަލް އިކްވިޕްމަންޓްސް އަދި ކޮންސިއުމަބަލްސް ފޯރުކޮށްދެމުންނެވެ. އޭގެ އިތުރުން ބޭސް ފޯރުކޮށްދެމުން އަންނަ އިރު، ރާއްޖޭގެ 187 ފާމަސީއެއް އެސްޓީއޯ އިން އަންނަނީ ހިންގަމުންނެވެ.
