އަންނަ އޮކްޓޯބަރު މަހު ފަށާ އޭއެފްސީ ކަޕްގެ މެޗުތަކަށް ތައްޔާރުވުމުގެ ގޮތުން ވީ އެންމެ އަވަހަށް ފަރިތަކުރުންތައް ފެށޭނެ ގޮތެއް މަގުފަހިކޮށްދިނުމަށް މާޒިޔާ ސްޕޯޓްސް އެންޑް ރެކްރިއޭޝަނުން އެދިއްޖެއެވެ.

މާލެ ސަރަހައްދުގައި ކޮވިޑް-19 ފެތުރުން އިތުރުވަމުން ދާތީ، މި މަހުގެ ކުރީކޮޅު ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ވަނީ ރައްކާތެރިކަމުގެ ފިޔަވަޅެއްގެ ގޮތުން މި ދުވަސްވަރު ކުޅިވަރު ހަރަކާތްތަކާއި ޓީމުތަކުގެ ފަރިތަކުރުންތައް ކުރިއަށް ނުގެންދަން ލަފާ ދީފައެވެ. އެއާއެކު ގައުމީ ފުޓްބޯޅަ ޓީމުގެ ފަރިތަކުރުންތައްވެސް މެދުކަނޑާލިއިރު، އަދި މިހާތަނަށް ކުލަބުތަކަށްވެސް ފަރިތަކުރުންތައް ފެށޭ ގޮތެއް ނުވެއެވެ.

މީގެ ކުރިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ އެޗްޕީއޭގެ އެންގުންތަކާ އެއްގޮތަށް ފަރިތަކުރުންތައް ފަށަން އުސޫލުތަކެއް ހަދައި، އެޗްޕީއޭއަށް ފޮނުވާފައިވާ ކަމަށާއި، އެ އުސޫލުތަކުގައި ގައުމީ ފުޓްބޯޅަ ޓީމުގެ އިތުރުން އޭއެފްސީ ކަޕްގައި ވާދަކުރާ ރާއްޖޭގެ ދެ ޓީމު ކަމަށްވާ ޓީސީ ސްޕޯޓްސް ކުލަބާއި މާޒިޔާއަށްވެސް ފަރިތަކުރުންތައް ފެށުމުގެ ހުއްދައަށް އެދިފައިވާނެ ކަމަށް ބުނެފައެވެ. އަދި ކުރިއަށް އޮތް ހަފުތާއެއްހާ ދުވަސްތެރޭ ފަރިތަކުރުންތައް ފެށޭނެ ކަމުގެ އުންމީދު އެބައޮތް ކަމަށްވެސް ވަނީ ބުނެފައެވެ.

ބުދަ ދުވަހު މާޒިޔާއިން ކުރި ޓްވީޓެއްގައި ބުނީ އޭއެފްސީ ކަޕްގެ ގުރޫޕް ސްޓޭޖްގެ ބާކީ އޮތް މެޗުތައް ރާއްޖޭގައި ބާއްވާއިރު، އެ ކުލަބުގެ ފަރިތަކުރުންތައް ވީ އެންމެ އަވަހަކަށް ފެށުމަށް ބޭނުންވާ ކަމަށާއި، ރައްކާތެރިކަމަށް އަޅަންޖެހޭ ފިޔަވަޅުތަކާއެކު ފަރިތަކުރުންތައް ފެށުމަށް އެ ކުލަބު ތައްޔާރަށް އޮތް ކަމަށެވެ. އަދި އޭއެފްސީ ކަޕަށް އެންމެ ރަނގަޅަށް ތައްޔާރުވެވޭނީ އެކަށީގެންވާ ވަގުތު ލިބިގެން ކަމަށްވާތީ، ފަރިތަކުރުންތައް ފެށުމަށް ކޮންމެވެސް ގޮތެއް ކަމާ ބެހޭ އިދާރާތަކުން ހޯދައިދިނުމަށް ވަނީ އެދެފައެވެ.

އޭއެފްސީ ކަޕްގެ ދެކުނު އޭޝިއާއަށް ހާއްސަ ގްރޫޕްގެ ހުރިހާ މެޗެއް މާލޭގައި ކުރިއަށްދާއިރު، މެޗުތައް ކުޅޭނީ އޮކްޓޯބަރު މަހުގެ 23ން ނޮވެމްބަރު ހަތަރަކާ ދެމެދުއެވެ. މީގެ ކުރިން މެޗުތައް ބޭއްވުމުގައި އަމަލު ކުރަންވީ ގޮތުގެ ލަފާ ހޯދުމަށް އެފްއޭއެމް އާއި ކުޅިވަރާ ބެހޭ ވުޒާރާއިން ވަނީ އެޗްޕީއޭއާ ބައްދަލުކޮށް މަޝްވަރާ ކޮށްފައެވެ.

އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގައި ރާއްޖޭގެ މާޒިޔާ އާއި ޓީސީ ވާދަކުރަމުން އަންނައިރު، މީގެ ކުރިން ގްރޫޕް ސްޓޭޖުގެ ފުރަތަމަ މެޗުގައި މި ދެ ޓީމު ވަނީ މާޗު މަހު 12 ވަނަ ދުވަހު ވާދަކޮށްފައެވެ. އެ ދުވަހު ބަންގްލަދޭޝްގައި އެ ގައުމުގެ ބަޝުންދުރާ ކިންގްސްއާ ދެކޮޅަށް ޓީސީ ކުޅުނު މެޗުން އެޓީމު ވަނީ 5-1 ން ބަލިވެފައެވެ. އަދި އިންޑިއާގައި މާޒިޔާ ވަނީ އެ ގައުމުގެ ޗެންނާއީ ސިޓީ އެފްސީއާ 2-2 ން އެއްވަރުކޮށްފައެވެ.