ފެސިލިޓީތަކަށް ނުގެންދެވި މިވަގުތު 359 މީހުން އެބަތިބި: ޑރ. އަފްޒަލް
20 އޯގަސްޓު 2020 | ބުރާސްފަތި 02:44ފެސިލިޓީތަކަށް މީހުން ގެންދިއުމުގައި ލަސްތައް ކުރިމަތިވާ ތަފާތު ސަބަބުތައް އެބަހުރި
ކޮވިޑް-19 މީހުންނަށް ފަރުވާ ދިނުމަށް ހަދާފައިވާ އައިސޮލޭޝަން ފެސިލިޓީއެއް
ކޮވިޑް-19ށް ޕޮޒިޓިވްވާ މީހުންގެ ތެރެއިން ފެސިލިޓީތަކަށް ނުގެންދެވި މިވަގުތު 359 މީހުން އެބަތިބި ކަމަށް އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވެއްޖެއެވެ.
ބުދަ ދުވަހުގެރޭ ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ފެސިލިޓީތަކަށް މީހުން ގެންދިއުމުގައި ލަސްތައް ކުރިމަތިވާ ތަފާތު ސަބަބުތައް އެބަހުރި ކަމަށެވެ.
އެގޮތުން އެމީހުން އަމިއްލައަށް ފެސިލިޓީތަކަށް ދިއުމަށް ދެކޮޅު ހަދާތީ ލަސްތައް ކުރިމަތިވާކަމަށް ޑރ. އަފްޒަލް ވިދާޅުވިއެވެ.
ޑރ. އަފްޒަލް ވިދާޅުވީ މިވަގުތު ކޮވިޑް-19ށް ޕޮޒިޓިވް ވެފައިވާ މީހުންގެ ތެރެއިން ފެސިލިޓީތަކަށް ނުގެންދެވި 359 މީހުން އެބަތިބި ކަމަށެވެ. އޭގެ ތެރެއިން 85 މީހުންނަކީ ފެސިލިޓީތަކަށް ދިއުމަށް ދެކޮޅު ހަދާތީ ނުގެންދެވިފައިވާ މީހުން ކަމަށް ޑރ.އަފްޒަލް ވިދާޅުވިއެވެ.
ކޮވިޑް-19ށް ޕޮޒިޓިވްވާ މީހުންގެ ތެރެއިން ފެސިލިޓީތަކަށް ނުގެންދެވި މިވަގުތު 359 މީހުން ތިބިކަން އެޗްއީއޯސީން ފާހަގަކޮށްފައިވާއިރު، އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އައިސޮލޭޓް ކުރުމުގައި ހައިރިސްކް މީހުންނަށް އިސްކަންދޭ ކަމަށެވެ.
އެގޮތުން އެންމެ ފުރަތަމަ ބަލަނީ ސީދާ ޕޮޒިޓިވްވާ މީހާ އެއީ ހައިރިސްކު މީހެއްތޯ ކަމަށާއި، އެހެން ކަމަށްވާނަމަ އެމީހަކު އައިސޮލޭޓްކުރަން އިސްކަންދޭ ކަމަށް ޑރ. ނަޒްލާ ވިދާޅުވި އެވެ. އިސްކަންދޭ ގޮތް ކަނޑައަޅަނީ ޕޮޒިޓިވްވާ މީހުންގެ ގޭގެއަށް ގޮސް އެސެސްމެންޓެއް ހެދުމަށް ފަހުގައި ކަމަށް ޑރ. ނަޒްލާ ވިދާޅުވިއެވެ.
