ހިލޭ ޓްރާންސްފާއެއްގެ ދަށުން ޖޯ ހާޓް ޓޮޓެންހަމަށް

އިނގިރޭސި ގޯލްކީޕަރު ޖޯ ހާޓް ޓޮޓެންހަމް ހޮޓްސްޕާއަށް ބަދަލުވެއްޖެއެވެ.

ބާންލީ އާއެކު އުމުރުން 33 އަހަރުގެ ޖޯ ހާޓް ހަދާފައި އޮތް އެއްބަސްވުން ހަމަވުމާ ގުޅިގެން، ޓޮޓެންހަމަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަދި ވަނީ ޓޮޓެންހަމާއެކު ދެ އަހަރުގެ އެއްބަސްވުމެއް ހަދާފައެވެ.

ޓޮޓެންހަމަށް ބަދަލުވުމަށްފަހު ޖޯ ހާޓް ބުނީ އޭނާ އަކީ އަދިވެސް ފެންވަރު ހުރި ރަނގަޅު ގޯލްކީޕަރެއް ކަމަށާއި، ދަނޑު މަތީގަ އާއި ދަނޑު ބޭރުންވެސް ޓޮޓެންހަމަށް ކާމިޔާބު ހޯދައިދިނުމަށް ތައްޔާރަށް ހުރި ކަމަށެވެ.

ޖޯ ހާޓް އެންމެ ފުރަތަމަ ވިދާލީ މެންޗެސްޓާ ސިޓީންނެވެ. އެގޮތުން އޭނާ ވަނީ ސިޓީ އާއެކު ހޭދަކުރި 10 ސީޒަނުގައި އެޓީމަށް 348 މެޗު ކުޅެދީފައެވެ.

އެކަމަކު ސިޓީގެ ކޯޗުގެ މަގާމާ ޕެޕް ގާޑިއޯލާ 2016 ވަނަ އަހަރު ހަވާލުވި ފަހުން ޖޯ ހާޓަށް ފުރުސަތު ދީފައެއް ނުވެއެވެ. އެއާއެކު 2019-2018 ށް އޭނާ ވަނީ ލޯނު އެއްބަސްވުމެއްގެ ދަށުން އިޓަލީގެ ޓޮރިނޯ އާއި އިންގްލެންޑްގެ ވެސްޓް ހޭމް ޔުނައިޓެޑަށް ކުޅެދީފައެވެ.

އެއަށްފަހު 2018 ވަނަ އަހަރު ސިޓީ ދޫކޮށް ޖޯ ހާޓް ވަނީ ބާންލީއަށް ބަދަލުވެފައެވެ. އަދި މިދިޔަ ދެ ސީޒަނުގައި ޖޯ ހާޓް ވަނީ އެޓީމަށް 24 މެޗު ކުޅެދީފައެވެ.

އިންގްލެންޑްގެ ގައުމީ ޓީމަށް 75 މެޗު ކުޅެދީފައިވާ ޖޯ ހާޓް ވަނީ ސިޓީ އާއެކު އިނގިރޭސި ޕްރިމިއާ ލީގު ދެ ފަހަރު އަދި އެފްއޭ ކަޕް އެއް ފަހަރު ކާމިޔާބުކޮށްފައެވެ.

ޓޮޓެންހަމަށް ޖޯ ހާޓް ބަދަލުވިއިރު، އެ ޓީމުގެ ގޯލު މިވަގުތު ބަލަހައްޓަމުން އަންނަނީ ފްރާންސްގެ ގޯލްކީޕަރު ހޫގޯ ލޮރިސްއެވެ.