މެކްސިކޯއިން އެއްދުވަހާ 5500 މީހުން ޕޮޒިޓިވްވެއްޖެ
19 އޯގަސްޓު 2020 | ބުދަ 04:51މެކްސިކޯއިން ފެނުނު ކޭސްތައް ޖޫންގެ ފަހުން އެންމެ މަދުވެފައިވަނީ މިދިޔަ ހޯމަ ދުވަހު
މެކްސިކޯގައި ދިން ލުއިތަކާއެކު މަގުމަތީގައި މީހުން ނުކެމެ އުޅެނީ
ކޮވިޑްގެ ކޭސްތައް މަދުވާން ފަށާފައިވާކަމަށް ކަމާބެހޭ އިދާރާތަކުން ހާމަކޮށްފައިވަނިކޮށް މެކްސިކޯއިން އެއްދުވަހާ 5500 މީހުން ޕޮޒިޓިވްވެއްޖެއެވެ.
މެކްސިކޯގެ ސިއްހަތާ ބެހޭ އިދާރާތަކުން ހާމަކޮށްފައިވާ ގޮތުން އަންގާރަ ދުވަހު 5500 މީހުން ޕޮޒިޓިވްވެފައިވާ އިރު، އެ ދުވަހު އެކަނި 751 މީހަކު ވަނީ މަރުވެފައެވެ. މިއާއެކު އެގައުމުގައި ޖުމްލަ ޕޮޒިޓިވްވި މީހުންގެ އަދަދު ވަނީ 531،239 (ފަސްލައްކަ އެއްތިރީސް ހާސް ދުއިސައްތަ ތިރީސް ނުވައެއް) އަށް އަރާފައެވެ. އަދި މަރުވި މީހުންގެ އަދަދު ވަނި 57،774ށް އަރާފައެވެ.
5500 މީހުން އެއްފަހަރާ ޕޮޒިޓިވްވި ކަމުގެ ހަބަރުތައް އާންމުކޮށްފައިވަނީ މެކްސިކޯގެ ހެލްތް މިނިސްޓްރީން ކޮވިޑާއި ގުޅޭ އުފާވެރި ހަބަރުތަކެއް އާންމު ކުރިތާ ކުޑަ އިރުކޮޅެއްގެ ތެރޭގައެވެ. އެގައުމުގެ ހެލްތް މިނިސްޓްރީން ބުނެފައިވަނީ ކޮވިޑްގެ ކޭސްތައް ފެންނަ މިންވަރު ދަށްވެފައިވާ ކަމަށެވެ. އަދި އާ ކޭސްތައް ފެންނަ މިންވަރު މަދުވެފައިވާ އިރު މަރުވާ މީހުންގެ އަދަދު ވެސް ދަށްވެފައިވާ ކަމަށް ހެލްތް މިނިސްޓްރީން ބުނެފައިވެއެވެ.
މިއީ ވޭތުވެދިޔަ 6 ހަފްތާގެ ތަފާސް ހިސާބުތަކަށް ބެލުމަށްފަހު މެކްސިކޯގެ ހެލްތް މިނިސްޓްރީން އާންމުކޮށްފައިވާ މައުލޫމާތުތަކެވެ. ހެލްތް މިނިސްޓްރީން ބުނެފައިވަނީ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ މީހުންގެ އަދަދުވެސް މަދުވެފައިވާ ކަމަށެވެ.
ހޯމަ ދުވަހު މެކްސިކޯއިން ވަނީ ޖޫން މަހުގެ ފަހުން މިހާތަނަށް އެންމެ މަދުން ކޮވިޑްގެ ކޭސްތައް ފެނިފައިވަނީ އެ ދުވަހު ކަމަށް ހާމަކޮށްފައެވެ. އެއީ 3571 ކޭހެވެ. މެކްސިކޯއަކީ މުޅި ދުނިޔޭގައި ތިންވަނައަށް އެންމެ ގިނައިން މީހުން މަރުވެގެން ރިޕޯޓްކޮށްފައިވާ ގައުމެވެ. ލެޓިން އެމެރިކާގެ ގައުމުތަކަށް ބަލާ އިރު މެކްސިކޯ ހިމެނެނީ ކޮވިޑް ކޭސްތައް އެންމެ ގިނަ 3 ވަނަ ގައުމުގެ ގޮތުގައެވެ.
