ފައްޔާޒާ ދެކޮޅަށް ވޯޓެއް ނުދޭނަން: ޤާސިމް

އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ވެއްދިޔަސް ފައްޔާޒާ ދެކޮޅަށް ވޯޓު ނުދެއްވާނެ ކަމަށް މާމިގިލި ދާއިރާގެ މެމްބަރު ގާސިމް އިބްރާހިމް ވިދާޅުވެއްޖެ އެވެ.

ފައްޔާޒު އިސްމާއިލްގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހަށް ވައްދަން އެމްޑީޕީ މެމްބަރުން މަސައްކަތް ފަށާފައިވާ ކަމުގެ އަޑުތައް ވަނީ ފެތުރިފައެވެ. މިހާތަނަށް 20ށް ވުރެ ގިނަ މެމްބަރުންގެ ސޮއި ހޯދާފައިވާ ކަމުގެ މައުލޫމާތު ވެސް ވަނީ ލިބިފައެވެ.

އެކަމާއި ގުޅޭ ގޮތުން އޮންލައިން ނޫހަކަށް ދެއްވި އިންޓަވިއުއެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވީ، ފައްޔާޒަށް ފުރިހަމަ އިތުބާރު އެބައޮތް ކަމަށާއި، އޭނާ ދިފާއު ކުރައްވާނެ ކަމަށެވެ.

ރާއްޖެއެމްވީއާ ވާހަކަ ދައްކަވަމުން ޖުމްހޫރީ ޕާޓީގެ ލީޑަރު ގާސިމް ވިދާޅުވީ، އިތުބާރު ނެތްކަމުގެ ވޯޓު ނަގަން ޖެހޭކަމުގެ އެއްވެސް ކަމެއް ފައްޔާޒު ކުރައްވާފައިވާ ކަމަށް ގަބޫލު ނުކުރައްވާ ކަމަށެވެ.

ރައީސް ސޯލިހުއާއެކު ސާބިތުކަމާއި އެކު ހުންނަވާނެ ކަމަށް ވިދާޅުވާ ވިދާޅުވުން ގާސިމް ވަނީ ތަކުރާރު ކުރެއްވާފައެވެ.

ނޯ ކޮންފިޑެންސް ވޯޓާއި ގުޅޭ ގޮތުން ރާއްޖެ ޓީވީގެ ފަލަ ސުރުހީ ޕްރޮގްރާމްގައި ފައްޔާޒު ވިދާޅުވެފައިވަނީ، އިތުބާރު ގެއްލޭފަދަ އެއްވެސް ކަމެއް ކުރައްވާފައިނުވާނެ ކަމަށެެވެ. ފައްޔާޒް ވިދާޅުވީ، ''މިއީ އޭނާގެ ފައިޓެއް'' ނޫން ކަމަށެވެ.

ވަޒީރެއްގެ އިތުބާރު ނެތްކަމުގެ މައްސަލައެއް މަޖިލިހަށް ވައްދަން ބޭނުންވަނީ 10 މެމްބަރުންގެ ސޮޔެވެ. އަދި ސަރުކާރުގެ ވަޒީރެއްގެ އިތުބާރު ނެތްކަމަށް ފާސް ކުރަން ބޭނުން ވަނީ މަޖިލިހުގައި ތިއްބަވާ މެމްބަރުންގެ ތެރެއިން ދެބައިކުޅައެއްބައި މެމްބަރުންގެ (43 މެމްބަރުންގެ) ވޯޓެވެ. އެހެންކަމުން މިނިސްޓަރ ފައްޔާޒުގެ އިތުބާރު ނެތް ކަމަށް ފާސް ކުރެވޭނީ އެމްޑީޕީގެ ގިނަ އަދަދެއްގެ މެމްބަރުންގެ ވޯޓާ އެކުއެވެ.