އޮސްޓްރޭލިއާއިން ކޮވިޑަށް ވެކްސިނެއް އުފައްދަނީ، ރައްޔިތުންނަށް ހިލޭ ވެކްސިން ލިބޭނެ: ބޮޑު ވަޒީރު

އޮސްޓްރޭލިއާއިން އޮސްފާޑް ޔުނިވަރސިޓީއާއިއެކު ކޮވިޑް-19 އަށް ވެކްސިނެއް އުފެއްދުމަށް މަސައްކަތް ކުރަމުން އަންނަ ކަމަށާއި، އޮސްޓްރޭލިއާ ރައްޔިތުންނަށް ވެކްސިން ހިލޭ ލިބޭނެ ކަމަށް އެ ގައުމުގެ ބޮޑު ވަޒީރު ސްކޮޓް މޮރޯސަން ވިދާޅުވެއްޖެ އެވެ.

މޮރޯސަން މިހެން ވިދާޅުވިއިރު އޮސްފޯޑް ޔުނިވަރސިޓީއިން އަންނަނީ ކޮވިޑަށް ވެކްސިނެއް އުފެއްދުމުގެ މަސައްކަތުގެ އެންމެ ފަހުގެ މަރުހަލާގައެވެ.

މޮރޯސަން އަންގާރަ ދުވަހު ވިދާޅުވީ އޮކްސްފޯޑްގެ ވެކްސިން އޮސްޓްރޭލިއާގައި އުފެއްދުމުގެ މަސައްކަތް ކުރާނެ ކަމަށާއި، ވެކްސިން އޮސްޓްރޭލިއާ ރައްޔިތުންނަށް ހިލޭ ލިބޭނެ ކަމަށެވެ.

މޮރޯސަން ވިދާޅުވީ އޮސްޓްރޭލިއާއިން ވެކްސިން ހެދުމަށްޓަކައި، ސްވިޑިޝް – ބްރިތިޝް ފާމަސީޓިކަލް ކޮމްޕެނީއެއް ކަމަށްވާ އަސްތްރަޒެނިކާ އާއި އެކު އެއްބަސްވުމަކަށް އާދެވިފައިވާ ކަމަށާއި، މި އެއްބަސްވުމުގެ ދަށުން އޮކްސްފޯޑް ޔުނިވަރސިޓީ އިން ތައްޔާރުކުރަމުން އަންނަ ކޮވިޑް ވެކްސިން އެ ގައުމުގައި ހެދުމުގެ ފުރުސަތު ލިބިގެންދާނެ ކަމަށެވެ.

އޮކްސްފޯޑްއިން ތައްޔާރު ކުރަމުން އަންނަ ވެކްސިންގެ ފަހު ޓްރައިލްތައް މިހާރު ފަށައިފައިވާއިރު ރިޕޯޓުތައް ބުނާ ގޮތުން މި ވެކްސިން ސެޕްޓެމްބަރު މަހު ރަޖިސްޓްރީ ކުރާނެއެވެ.

އޮކްސްފޯޑުގެ ސައިންސްވެރިން މި ވެކްސިން އުފައްދާފައިވަނީ ރާމާމަކުނު ޢާއިލާގެ ވައްތަރެއް ކަމުގައިވާ ޗިމްޕަންޒީގެ ހަށިގަނޑުން ފެންނަ އިންސާނުންނަށް ގެއްލުމެއް ނުލިބޭ ވައިރަސް އަކަށް ކޮރޯނާވައިރަސް ގެ ބައެއް ލައިގެންނެވެ. މިގޮތަށް މޮޑިފައިކޮށްފައިވާ ވައިރަސް ތަކުން މީގެކުރިން ވެސް ވަނީ އިންސާނީ ދިފާޢީ ނިޒާމުގެ ބާރު ވައިރަހާ ދެކޮޅަށް ވަރުގަދަ ކުރުމަށް ބޭނުންކޮށްފައެވެ.