ކޮވިޑަށް ޕޮޒިޓިވްވި އާއިލީ ބޭފުޅަކާ ޑައިރެކްޓް ކޮންޓެކްޓްވެ، ދެ މެމްބަރަކާއި އަމީން އާންމު އައިސޮލޭޝަންގައި!
3 ބޭފުޅުންގެ ސާމްޕަލްވެސް ވަނީ ނަގާފައި
ރައްޔިތުންގެ މަޖިލީހުގެ ޖަލްސާއެއްގެ ތެރެއިން، އިދާރީ މޭޒު
ކޮވިޑް-19ށް ޕޮޒިޓިވްވެފައިވާ މީހަކާއި ޑައިރެކްޓް ކޮންޓެކްޓްވެ ރައްޔިތުންގެ މަޖިލީހުގެ 2 މެމްބަރަކާއި މަޖިލީހުގެ އަމީން އާންމު އައިސޮލޭޓްކޮށްފިއެވެ.
2020 ވަނަ އަހަރުގެ ދެވަނަ ދައުރުގެ 28 ވަނަ ޖަލްސާ ފައްޓަވައިދެއްވަމުން މަޖިލީހުގެ ރައީސް، މުހައްމަދު ނަޝީދު ވިދާޅުވީ މަޖިލީހުގެ އަމީން އާންމު ފާތިމަތު ނިއުޝާއާއި، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އަދި ފޭދޫ ދާއިރާގެ މެމްބަރު މުހައްމަދު ނިހާދު އައިސޮލޭޓްކޮށްފައިވާކަމަށެވެ.
މިކަމާއި ބެހޭ މައުލޫމާތު ދެއްވަމުން މަޖިލީހުގެ މީޑިއާ ޑިރެކްޓަރ ހަސަން ޒިޔާއު ވިދާޅުވީ 3 ބޭފުޅުންވެސް އައިސޮލޭޓް ކޮށްފައިވަނީ ކޮވިޑް-19ށް ޕޮޒިޓިވްވެފައިވާ އާއިލީ ފަރާތަކާއި ކޮންޓެކްޓްވުމުން ކަމަށެވެ. އޭނާ ވިދާޅުވީ 3 ބޭފުޅުންގެވެސް ސާމްޕަލް ނަގާފައިވާކަމަށާއި އަދި މިހާތަނަށް ނަތީޖާ ލިބިފައި ނުވާކަމަށެވެ.
މަޖިލީހުގެ ޖަލްސާތައް، ގަވާއިދުން މަޖިލީހުގެ އިދާރާގައި ބާއްވަމުންދާއިރު، ޖަލްސާތައް އިންތިޒާމް ކުރެވިފައިވަނީ އެޗްޕީއޭއީން އަންގާފައިވާ އުސޫލުތަކާއި އެއްގޮތަށެވެ. އެގޮތުން، މެމްބަރުންގެ ސަލާމަތާއި ރައްކާތެރިކަމަށް ހާއްސަ ފިޔަވަޅުތަކާއި އެކު ތަޅުމުގައިވެސް އިޖްތިމާއި ގައިދުރުކަން ބެހެއްޓޭނެގޮތަށް އިންތިޒާމް ވަނީ ހަމަޖައްސާފައެވެ.
މީގެކުރީން، ރައްޔިތުންގެ މަޖިލީހުގެ އިދާރާގައި މަސައްކަތްކުރާ 3 މުވައްޒަފެއް ވަނީ ކޮވިޑް-19ށް ޕޮޒިޓިވްވެފައެވެ. ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކުރުމުން، މަޖިލީހުގެ ޖަލްސާތައް ވެބް ކޮންފަރެންސިންގ މެދުވެރިކޮށްވެސް މީގެ ކުރިން ކުރިއަށް ގެންގޮސްފައިވެއެވެ. އެކަމަކު ލޮކްޑައުނަށް ލުއިތައް ދޭން ފެށުމާއެކު، މަޖިލީހުގެ ޖަލްސާތައް ބާއްވަމުން ދަނީ މަޖިލީހުގެ އިދާރާގައެވެ.
