ފުރަބަންދު އަމުރާއި ހިލާފަށް އަލިފުއްޓަށް ދިޔަ ދެ މީހަކު ހައްޔަރުކޮށް ބަންދަށް 15 ދުވަސް!
2 ފިރިހެނެއް ވަނީ ހައްޔަރުކޮށްފައި
ރ. އަލިފުށި
ފުރަބަންދު އަމުރާއި ހިލާފަށް ރ. އަލިފުއްޓަށް ދިޔަ ދެ މީހަކު ހައްޔަރުކޮށްފިއެވެ.
ފުލުހުން ބުނީ، ފުރަބަންދުތެރޭ މާލެއިން ރަށްރަށަށް ދަތުރުކުރުމާގުޅޭ ގޮތުން އެޗްޕީއޭއިން އާންމުކޮށްފައިވާ އުސޫލާއި ޚިލާފަށް ރަސްމީ އެއްވެސް ފަރާތެއްގެ ހުއްދަނެތި، މާލެއިން ފުރައިގެންގޮސް، ހަދަމުންދާ ރިސޯޓެއްގައި ތިބުމަށްފަހު އޯގަސްޓް މަހުގެ 15 ވަނަ ދުވަހުގެ ވަގުތެއްގައި ރ. އަލިފުއްޓަށްދިޔަ، 47އ، އަދި 36 އަހަރުގެ ދިވެހި 2 ފިރިހެނަކު ކޯޓު އަމުރެއްގެ ދަށުން ރޭ ރ. އަލިފުށީ ޕޮލިސް ސްޓޭޝަންގެ ބެލުމުގެ ދަށަށް ގެންގޮސްފައިވާކަމަށެވެ.
މި މައްސަލައާއި ގުޅިގެން އެ ދެމީހުންގެ ބަންދުގެ މުއްދަތާއިމެދު ގޮތެއް ނިންމުމަށް ރ. އުނގޫފާރު މެޖިސްޓްރޭޓް ކޯޓުގައި ވީޑިއޯ ކޮންފަރެންސް މެދުވެރިކޮށް ކުރިއަށް ގެންދިޔަ މުއްދަތު މަޖުލީހުގައި އެދެމީހުންގެ ބަންދަށް 15 ދުވަހުގެ މުއްދަތުދީފައިވާކަމަށް ފުލުހުން ވަނީ ބުނެފައެވެ.
ކޮވިޑް-19ގެ ކޭސްތަކެއް އަތޮޅުތެރޭގެ ގިނަ ރަށްތަކުން ފެނުމާއި އެކު އެޗްޕީއޭއިން ވަނީ ދަތުރުފަތުރުކުރާއިރު އަމަލުކުރަންޖެހޭ އުސޫލެއް އެކުލަވާލާފައެވެ. އެގޮތުން، ކައުންސިލްގެ ހުއްދައާއި އެކު މީހުން ދިރިއުޅޭ ރަށަށް ދަތުރުކުރާއިރު 14 ދުވަސް ކަރަންޓީން ވާންޖެހެއެވެ.
