ހުޅުމާލޭގައި އަޅާފައިވާ ތިން ފުޓްސަލް ދަނޑެއްގެ ޓާފް ބަދަލުކުރުމަށް ކުޅިވަރާ ބެހޭ ވުޒާރާއިން ބަޔަކާ ހަވާލުކޮށްފިއެވެ.

މި މަސައްކަތް ވުޒާރާގެ ފަރާތުން ހަވާލުކޮށްފައިވަނީ މަމްނޫޒް ޝިޕިންގ އެންޑް ޓްރޭޑިންގ ޕްރައިވެޓް ލިމިޓެޑާއެވެ. ކުޅިވަރާ ބެހޭ ވުޒާރާގައި ހޯމަ ދުވަހު ބޭއްވި ސޮއިކުރުމުގެ ރަސްމިއްޔާތުގައި އެ ވުޒާރާގެ ފަރާތުން ކުޅިވަރާ ބެހޭ ވަޒީރު އަޙްމަދު މަޙްލޫފް ސޮއިކުރެއްވިއިރު، މަމްނޫޒް ޝިޕިންގ އެންޑް ޓްރޭޑިންގ ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު އަބްދުލް ނާފިޢު ތަޢުފީގެވެ.

ކުޅިވަރާ ބެހޭ ވުޒާރާއިން ބުނީ މި މަސައްކަތް މަމްނޫޒް ޝިޕިންގ އެންޑް ޓްރޭޑިންގ ޕްރައިވެޓް ލިމިޓެޑާ ހަވާލުކުރީ 1،500،204 (އެއް މިލިޔަން ފަސް ލައްކަ ދުއިސައްތަ ހަތަރު) ރުފިޔާއަށް ކަމަށެވެ. އަދި މި މަސައްކަތް ހަވާލުކުރާތާ 35 ދުވަހުގެ ތެރޭގައި މަސައްކަތް އެއްކޮށް ނިންމަން ޖެހޭނެ ކަމަށްވެސް ވަނީ ބުނެފައެވެ.

ތިން ދަނޑެއްގެ ޓާފް ބަދަލުކުރުމަށް ހަވާލުކުރިއިރު، މީގެ ތެރޭގައި ހުޅުމާލޭ ރެހެންދި ސްކޫލް ކުރިމަތީގައި އޮންނަ ދެ ދަނޑުވެސް ހިމެނެއެވެ. މި ދެ ދަނޑަކީ މާލެ ސިޓީގައި ބާއްވާ ބޮޑެތި މުބާރާތްތައް ބޭއްވުމަށް ބޭނުންކުރާ ދެ ދަނޑެވެ. ފަހަކަށް އައިސް މި ދަނޑުތަކުގެ ޓާފް ވަނީ ވަރަށް ބޮޑަށް ހަލާކުވެފައެވެ.

މީގެ އިތުރުން ހޯމަ ދުވަހު ކުޅިވަރާ ބެހޭ ވުޒާރާއިން ވަނީ ތ. ހިރިލަންދު އާއި އެ އަތޮޅު އޮމަދޫގައި ޓާފް ދަނޑު އެޅުމަށްވެސް ބަޔަކާ ހަވާލުކޮށްފައެވެ.

އެގޮތުން ހިރިލަންދޫގައި ފުޓްސަލް ދަނޑެއް އެޅުމުގެ މަސައްކަތް ހަވާލުކޮށްފައިވަނީ ޓްރިޕަލް އެއިޓް ކުންފުންޏާއެވެ. ކުޅިވަރާ ބެހޭ ވުޒާރާގައި ބޭއްވި ސޮއިކުރުމުގެ ރަސްމިއްޔާތުގައި ވުޒާރާގެ ފަރާތުން ވަޒީރު އަޙްމަދު މަޙްލޫފް ސޮއިކުރެއްވިއިރު، ޓްރިޕަލް އެއިޓް ކުންފުނީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ފައިސަލްއެވެ. މި މަސައްކަތް ހަވާލުކޮށްފައިވަނީ ވަނީ 1،458،297 (އެއް މިލިޔަން ހަތަރު ލައްކަ ފަންސާސް އަށްހާސް ދުއިސައްތަ ނުވަދިހަ ހަތެއް) ރުފިޔާ އަށެވެ.

އަދި އޮމަދޫގައި ފުޓްސަލް ދަނޑެއް އެޅުމުގެ މަސައްކަތް ހަވާލުކުރީ ޓްރިއޯ ލިންކް އިންވެސްޓްމެންޓްސްއާއެވެ. މި އެއްބަސްވުމުގައި ވުޒާރާގެ ފަރާތުން ވަޒީރު އަޙްމަދު މަޙްލޫފް ސޮއިކުރެއްވިއިރު، ޓްރިއޯ ލިންކް އިންވެސްޓްމެންޓްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ހުސައިން އަދުހަމް އަލީއެވެ. މި މަސައްކަތަށް 1،251،540 (އެއް މިލިޔަން ދެ ލައްކަ ފަންސާސް އެއްހާސް ފައްސަތޭކަ ސާޅީސް) ރުފިޔާ ޚަރަދުވާނެ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.

ހުޅުމާލޭގެ ތިން ދަނޑެއްގެ ޓާފް ބަދަލުކުރުމުގެ އިތުރަށް ހިރިލަންދު އާއި އޮމަދޫގައި ފުޓްސަލް ދަނޑު އަޅާއިރު، ކުރިއަށް އޮތް ދުވަސްތަކުގައި ރާއްޖޭގެ އެކި ކަންކޮޅުތަކުގައި އަޅާ ގިނަ ދަނޑުތަކެއް މަސައްކަތްތައް ނިމިގެންދާނެ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.