ބޯޑަރު ހުޅުވާލުން: ރާއްޖެ އައީ 5177 ފަތުރުވެރިން
16 އޯގަސްޓު 2020 | އާދީއްތަ 18:34މި މަހު ރާއްޖެއަށް މިހާތަނަށް 3،476 ފަތުރުވެރިން އައިސްފައިވޭ
ގަތަރު އެއަރލައިނުން ރާއްޖެއަށް ފަތުރުވެރިން އަންނަނީ
ކޮވިޑާއި ގުޅިގެން ރާއްޖޭގެ ބޯޑަރުތައް ބަންދުކުރުމަށްފަހު އަލުން ހުޅުވާލިއިރު ފާއިތުވި މަސްދުވަހުގެ ތެރޭގައި ރާއްޖެ އައި ފަތުރުވެރިންގެ އަދަދަކީ 5،177 ކަމަށް މޯލްޑިވްސް އިމިގްރޭޝަނުން ބުނެފިއެވެ.
އާދީއްތަ ދުވަހު އިމިގްރޭޝަނުން ކުރި ޓްވީޓެއްގައި ބުނީ މި މަހު ރާއްޖެއަށް މިހާތަނަށް 3،476 ފަތުރުވެރިން އައިސްފައިވާ ކަމަށާއި، މި މަހު ރާއްޖެއަށް އެންމެ ގިނައިން އައިސްފައިވަނީ ޔުނައިޓެޑް އަރަބް އެމިރޭޓްސް (ޔޫއޭއީ)ގެ ފަތުރުވެރިން ކަމަށެވެ. އެގޮތުން ޔޫއޭއީއިން މި މަހު މިހާތަނަށް 504 ފަތުރުވެރިން ވަނީ އައިސްފަ އެވެ. ޔޫއޭއީއަށް ފަހު މި މަހު ރާއްޖެއަށް އެންމެ ގިނައިން އައިސްފައިވަނީ އިނގިރޭސިވިލާތުގެ ފަތުރުވެރިންނެވެ. އެގޮތުން އިނގިރޭސިވިލާތުން މިހާތަނަށް 421 ފަތުރުވެރިޔަކު ވަނީ އައިސްފައެވެ.
ތިން ވަނައަށް އެންމެ ގިނައިން ފަތުރުވެރިން އައިސްފައިވަނީ އެމެރިކާއިންނެވެ. އެގޮތުން އެމެރިކާއިން މިހާތަނަށް 336 ފަތުރުވެރިޔަކު ވަނީ އައިސްފައެވެ.
ކޮވިޑް-19 ރާއްޖެއިން ފެނުމާއި ގުޅިގެން މާރޗު މަހުގެ 27 ވަނަ ދުވަހު ބޯޑަރުތައް ބަންދުކޮށްފައި އޮތުމަށް ފަހު އަލުން ހުޅުވާލީ ޖުލައި މަހުގެ 15 ވަނަ ދުވަހުއެވެ.
މިއަހަރު ނިންމެން ވާއިރަށް 8 ލައްކަ ފަތުރުވެރިން ރާއްޖެ ގެނައުމަށް ސަރުކާރުން އަމާޒު ހިފާފައިވާއިރު ރާއްޖޭގެ ފަތުރުވެރިކަމުގެ ސިނާއަތާއި އިޤްތިސާދު އަނބުރާ ކޮޅަށް ޖެހުމަށް ގިނަ ދުވަސްތަކެއް ހޭދަވާނެ ކަަމަށް ކަމާއިބެހޭ މާހިރުން ވަނީ ލަފާކޮށްފައެވެ.
