ސިންގަލް ޔޫސް ޕްލާސްޓިކް މަދުކުރުމާއި ގުޅޭ ޕްލޭނަށް ޢާންމުންގެ ޚިޔާލު ހޯދުމަށް އޮންލައިން ވެބިނަރއެއް ބާއްވަން އެންވަޔަރަންމަންޓް މިނިސްޓްރީން ނިންމައިިފިއެވެ.

ސިންގަލް ޔޫސް ޕްލާސްޓިކުން ދިވެހިރާއްޖޭގެ ވެއްޓާއި އިޤްތިސާދު ހިމާޔަތް ކުރުމުގެ ގޮތުން، ސަރުކާރުން އިސްނަންގަވައިގެން ކުރަމުން ގެންދާ މަސައްކަތްތަކުގެ ތެރެއިން، ސިންގަލް ޔޫސް ޕްލާސްޓިކް 2023 ވަނަ އަހަރުގެ ނިޔަލަށް ފޭސްއައުޓް ކުރަން ވަނީ ނިންމާފައެވެ. މިކަން އިޢުލާން ކުރީ 23 ސެޕްޓެމްބަރ 2019 ގައި އ.ދ. ގެ 74 ވަނަ ޢާއްމު ބައްދަލުވުމުގެ ހަވާސާގެ ތެރެއިން ބޭއްވި ކްލައިމެޓް ސަމިޓުގައި ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ދެއްވި ތަގުރީރެއްގައެވެ.

މި ލަނޑުދަނޑި ހާސިލު ކުރުމަށްޓަކައި، ސިންގަލް ޔޫސް ޕްލާސްޓިކަށް ބަރޯސާވާ މިންވަރު މަދުކޮށް، ބޭނުން ކުރުން ހުއްޓާލުމަށްޓަކައި، ސިންގަލް ޔޫސް ޕްލާސްޓިކް ފޭސްއައުޓް ކުރުމުގެ ޑްރާފްޓް ޕްލޭނެއް އެކުލަވާލާފައިވާ ކަމަށް އެ މިނިސްޓްރީން ބުނެއެވެ. އަދި މި ޕްލޭން އެކުލަވާލާފައިވަނީ ސަރުކާރުގެ އެކި މުއައްސަސާތަކާއި، މަދަނީ ޖަމިއްޔާތަކާއި ވިޔަފާރިތައް އަދި ގުޅުން ހުރި އެހެނިހެން ފަރާތްތަކުގެ މަޝްވަރާއާއި ޚިޔާލު ހޯދައި އެއްކޮށްގެންކަން ފާހަގަކޮށް އެންވަޔަރަންމަންޓް މިނިސްޓްރީން ބުނީ ގުޅުން ހުރި ފަރާތްތަށް ޝާމިލު ވާގޮތަށް މި މަސައްކަތް ކުރިޔަށް ގެންދަނީ ރައީސުލް ޖުމްހޫރިއްޔާގެ އޮފީހުން ކަނޑައަޅާފައިވާ 11 ބޭފުޅުންގެ ކޮމިޓީއެއްގެ ލަފާގެ މަތިން ކަމަށެވެ.

މި ޕްލޭނަށް ޢާންމުންގެ ޚިޔާލު ހޯދުމަށް ބާއްވަން ހަމަޖެހިފައިވާ ބައްދަލުވުން، ކޮވިޑް 19 ގެ ރޯގާ އާއި ގުޅިގެން ބާއްވަން ހަމަޖެހިފައިވަނީ އާއްމުންނަށް ހުޅުވާލައިގެން އޮންލައިންކޮށް ވެބިނަރއެއްގެ ގޮތުގައި 19 އޯގަސްޓް 2020 ވާ ބުދަ ދުވަހުގެ 16:30 ގައެވެ. މި ވެބިނަރ ގައި ބައިވެރިވުމަށް ޝައުގުވެރިވާ ފަރާތްތަކުން www.tinyurl.com/y2j4wwrs ލިންކު މެދުވެރިކޮށް ރަޖިސްޓްރީ ކުރުމުގެ ފުރުސަތު ވަނީ ހުޅުވާލާފައެވެ.

ދިރާސާތަކުން ދައްކާ ގޮތުން ދިވެހިރާއްޖޭގައި އުފެދޭ ކުނީގެ 10 އިންސައްތަ އަކީ ޕްލާސްޓިކު ކުންޏެވެ. އަދި ޕްލާސްޓިކު ކުނީގެ ތެރެއިން، އެއްފަހަރު ބޭނުންކޮށްފައި އުކާލެވޭ ކުނި ނުވަތަ ސިންގަލް ޔޫޒް ޕްލާސްޓިކަކީ ރާއްޖޭގެ ނާޒުކު ދިރުންތަކާއި ގުދުރަތީ ރީތިކަމަށް ހުރި ނުރަކައްލެކެވެ.