ފިޓްޒޯނުން ގްރޫޕް ފިޓްނަސް ހިލޭ ކްލާސްތަކެއް މި ހަފްތާ އެއްކޮށް
ކްލާސްތައް ކުރިއަށްދާނީ 20 އޮގަސްޓްގެ ނިޔަލަށް
ފިޓްޒޯންގެ ކްލާސްތަކެއް - ކުރިން ނަގާފައިވާ ފޮޓޯއެއް
ފިޓްޒޯނުން ގްރޫޕް ފިޓްނަސް ހިލޭ ކްލާސްތަކެއް މި ހަފްތާ އެއްކޮށް ކުރިއަށް ގެންދިޔުމަށް ނިންމައިފިއެވެ.
ފިޓްޒޯނުން ބުނީ މި ކްލާސްތައް އޮގަސްޓް 15 ވަނަ ދުވަހު ފަށާފައިވާއިރު ކްލާސްތައް ކުރިއަށްދާނީ 20 އޮގަސްޓްގެ ނިޔަލަށެވެ.
ކްލާސްތައް ކުރިއަށްދާނެ ގޮތުގެ ޝެޑިއުލް:
ރާއްޖެއެމްވީއަށް މައުލޫމާތު ދެއްވަމުން ފިޓްޒޯންގެ މެނޭޖަރު ރިޔާޝް ރިޔާޒް ވިދާޅުވީ މި ކްލާސްތަކަކީ ލިމިޑެޓް ސްލޮޓްތަކެއް ކަމަށާއި ކުރީ ބައިގައި ކްލާސްތަކަށް ބުކިންގ ހަދަން ޖެހޭނެ ކަމަށެވެ. އަދި މި ހިލޭ ކްލާސްތަކުގެ މަޤްސަދަކީ އާންމުންނަށް ފިޓްޒޯނުން ކުރިއަށްގެންދާ ކްލާސްތަކުގެ އަޖުމަ ބާލަލުމުގެ ފުުރުސަތު ހުޅުވާލުން ކަމަށެވެ.
ކޮވިޑް-19އާ ގުޅިގެން އާންމު ޙާލަތަށް ރުޖޫޢަ ވުމަށް އަޅާ ފިޔަވަޅުތަކުގެ ތެރެއިން ޖިމް އަދި ފިޓްނަސް ސެންޓަރުތަކުގައި ރައްކާތެރިކަމާއެކު ޚިދުމަތްދޭނެ ގޮތުގެ އުސޫލެއް އެޗްޕީއޭ އިން ވަނީ ކަނޑައަޅާފައެވެ.
މި އުސޫލުގެ ދަށުން ކޮންމެ ދުވަހެއްގެ ސެޝަން ނިމުމަށްފަހު ތަނާއި ތަނުގައި ބޭނުންކުރާ ތަކެތި ރަނގަޅަށް ސާފުކޮށް ޑިސްއިންފެކްޓް ކުރަން ޖެހެއެވެ. އަދި ތަނުގައި ހުންނަ ޢާލާތްތައް ބޭނުންކުރާ ފަރާތްތަކުން އެތަކެތި ބޭނުންކުރުމުގެ ކުރިން ސާފުކުރުމާއި، ތަނުގެ ފަރާތުން ސާފުކުރުމަށް ބޭނުންވާތަކެތި ފޯރުކޮށްދިނުމަށް ވަނީ އަންގާފައެވެ.
ޖިމްގައި ބައެއް ހިދުމަތްތައް ނުދިނުމަށް ވެސް މި އުސޫލުގައި ބަޔަން ކުރެއެވެ. އެގޮތުން ސޯނާ އަދި ސްޓީމް ރޫމް ފަދަތަންތަން މިވަގުތު ބޭނުން ނުކުރުމާއި، ކާބޯތަކެތި ވިއްކާ ތަންތަން ޖިމްގައި ބަހައްޓައިގެން ނުވާނެކަމަށް ވަނީ ބުނެފައެވެ. އަދި ފެނުގެ ޚިދުމަތްދޭނަމަ، ހަމައެކަނި އެމީހަކު ގެންދާ ފެން ފުޅި ރީފިލް ކުރެވޭނެ ގޮތަށް މެޝިނެއް ބެހެއްޓުން ނުވަތަ ފެންބުއިމަށް ވަކިން ބޭނުންކޮށް އެއްލާލެވޭ ޑިސްޕޯސަބަލް ތަށި ބޭނުންކުރުމަށް ވަނީ އަންގާފައެވެ.
