ކެޓަލޯނިއާއަށް މިނިވަންކަން ލިބިއްޖެނަމަ ސްޕެނިޝް ލަލީގާ ދޫކޮށްލުމަށް މަޝްވަރާ ކުރަން ޖެހޭނެ ކަމަށް ބާސެލޯނާގެ ރައީސް ބުނެފިއެވެ.
ނޫސްވެރިންނާ ވާހަކަ ދައްކަމުން ބާސާގެ ރައީސް ޖޯސެފް މާރިއާ ބާޓޮމޯ ބުނެފައިވަނީ މުސްތަގުބަލުގައި ވާނެ ގޮތެއް ނޭނގޭ ކަމަށާއި އެފަދަ ހާލަތެއް މެދުވެރިވެއްޖެ ނަމަ ބާސާގެ ބޯޑުން އެ މައްސަލައިގެ ހައްލެއް ހޯދާނެ ކަމަށެވެ. އޭނާ ބުނެފައިވަނީ ބޯޑުން ލަލީގާއިން ވަކިވާން ނިންމައިފިނަމަ އެ ކްލަބުން އެހެން ލީގަކަށް ބަދަލުވާނެ ކަމަށާއި އޭރުން ލަލީގާގައި ބާސާއިން ވާދަނުކުރާނެ ކަމަށެވެ.
ބާޓޮމޯ ބުނެފައިވަނީ އާދިއްތަ ދުވަހު ބާސާއިން ލަސް ޕަލްމާސްއާ ދެކޮޅަށް ކުޅުނު މެޗު ލަސް ކުރަން އެދުނު ކަމަށާއި އެހެނަސް ލަލީގާއިން އެކަމަށް ހުއްދަ ނުދިނުމާ ވިދިގެން ސަޕޯޓަރުން ދަނޑަށް ނުވައްދާ މެޗު ކުރިޔަށް ގެންދަން ނިންމީ މެޗު ނުކުޅެފިނަމަ ކްލަބަށް ލިބޭ ގެއްލުން މާ ބޮޑުވެދާނެތީ ކަމަށެވެ. އޭނާވަނީ ސަޕޯޓަރުން ދަނޑަށް ނުވައްދާ މެޗު ކުޅެން ނިންމި ނިންމުމަށް ސަޕޯޓަރުންގެ ކިބައިން މާފަށް އެދިފައެވެ.
އޭނާވަނީ ބާސެލޯނާގައި މިހާރު ހިނގަމުންދާ ހަމަނުޖެހުންތަކުގައި އާންމު ރައްޔިތުންނަށް ލިބެމުންދާ އަނިޔާތަށް ކުއްވެރިކޮށްފައެވެ. އަދި އަބަދުވެސް ބާސެލޯނާ ދެމިއޮންނާނީ ކެޓަލޯނިއާގެ މިނިވަންކަމުގެ ނިޝާނެއްގެ ގޮތުގައި ކަމަށާއި އަދި ދުނިޔޭގެ ކުޅިވަރު ޖަމިއްޔާތަކުގައި ކެޓަލޯނިއާގެ އަޑު އިއްވައި ދިނުމަށް މަސައްކަތް ކުރާނެ ކަމަށްވެސް ބާޓޮމޯ ބުނެފައިވެއެވެ.
ބާސެލޯނާގެ ބޯޑުން ވަނީ އަންގާރަ ދުވަހު އެ ކްލަބްގެ އެއްވެސް ހަރަކާތެއް ކުރިޔަށް ނުގެންދިޔުމަށް ނިންމައި އެ ކްލަބްގެ ހުރިހާ އޮފީސްތަކެއް ވެސް ބަންދުކޮށްފައެވެ. ބާޓޮމޯވެސް ބާސާ އެހެން ލީގަކަށް ބަދަލުވެދާނޭ ކަމުގެ އިޝާރާތެއް ދީފައިވާއިރު ކެޓަލޯނިއާގެ ކުޅިވަރާ ބެހޭ ވަޒީރުވެސް ވަނީ މިފަދަ އިޝާރާތެއް ކޮށްފައެވެ.
ކެޓަލޯނިއާގެ ސަރުކާރުން ވަނީ މިނިވަން ސަރަހައްދަކަށް ވުމަށް ރައްޔިތުންގެ ފެންނަ ނުފެންނަ ވޯޓެއް އޮކްޓޯބަރު މަހުގެ އެއްވަނަ ދުވަހު ނަގާފައެވެ. މި ވޯޓުގެ ވަގުތީ ނަތީޖާ ދައްކާ ގޮތުން ކެޓަލޯނިއާގެ 90 އިންސައްތަ މީހުން ބޭނުންވަނީ ކެޓަލޯނިއާގައި ވަކި މިނިވަން ދައުލަތެއް ގާއިމު ކުރާށެވެ. ސްޕެއިންގެ ސަރުކާރުން މި ވޯޓު ބަލައިގެންފައެއް ނުވެއެވެ.
ބާސެއިން ލަލީގާ ދޫކޮށްލުމުގެ އިޝާރާތެއް ކޮށްފައިވާއިރު އެ ޓީމުން ވަނީ 24 ފަހަރު އެ މުބާރާތް ކާމިޔާބުކޮށްފައެވެ.
