ޝިޕިން އޭޖެންޓުން ރަޖިސްޓްރީވުމަށް މުއްދަތު އިތުރު ކޮށްދީފި
16 އޯގަސްޓު 2020 | އާދީއްތަ 11:35ގަވާއިދު ގެޒެޓްކުރީ ޖުލައި 16 ގައި
ރާއްޖޭގެ މައި ފިޔަފާރި ބަނދަރު، އެމްޕީއެލް: ރާއްޖޭގެ ވިޔަފާރިވެރިންއަތުން ބޮޑެތި ފީތަކެއް ޝިޕިންގ އެޖެންޓުން ނަގަމުންދާ ކަމުގެ ޝަކުވާ ބޮޑު
ޝިޕިން އެޖެންސީގެ ހިދުމަތް ދިނުމާއިބެހޭ ގޮތުން، ޓްރާންސްޕޯޓް އޮތޯރިޓީން އެކުލަވާލި ގަވާއިދުގެ ދަށުން ޝިޕިންގ އެޖެންސީ ރަޖިސްޓްރީ ކުރުމުގެ މުއްދަތު އިތުރު ކޮށްފިއެވެ.
މިދިޔަ ޖުލައި މަހު ވަނަ ދުވަހު ޓްރާންސްޕޯޓް އޮތޯރިޓީން ސަރުކާރުގެ ގެޒެޓް ޝާއިއުކޮށްފައިވާ ގަވާއިދުގައި ބުނާ ގޮތުން، ދިވެހިރާއްޖޭގައި ޝިޕިންގ އެޖެންސީގެ ޚިދުމަތްދޭ ކުންފުނިތަކުން 16 އޮގަސްޓް 2020 ވަނަ ދުވަހުގެ ކުރިން މޯލްޑިވްސް ޓްރާންސްޕޯޓް އޮތޯރިޓީގައި ޝިޕިންގ އެޖެންސީއެއްގެ ގޮތުގައި ރަޖިސްޓަރީ ކުރަން ޖެހެއެވެ. އަދި 16 އޮގަސްޓު 2020 ވަނަ ދުވަހުގެ ފަހުން އެ އޮތޯރިޓީގައި ރަޖިސްޓަރީ ނުކޮށް ޝިޕިންގ އެޖެންސީގެ ޚިދުމަތް ދިނުމަކީ މަނާ ކަމެއް ކަމަށް ވެސް 16 ގަވާއިދު ގެޒެޓް ކުރި ދުވަހު ޓްރާންސްޕޯޓް އޮތޯރިޓީން ކޮށްފައިވާ އިއުލާނެއްގައި ބުނެފައިވެއެވެ.
ނަމަވެސް ޓްރާންސްޕޯޓް އޮތޯރިޓީން މިވަނީ ޝިޕިންގ އެޖެންސީތައް ރެޖިސްޓްރީ ކުރުމުގެ މުއްދަތު ސެޕްޓެމްބަރު މަހުގެ 15 ވަނަ ދުވަހަށް އިތުރު ކޮށްދީފައެވެ.
އެ ގަވާއިދު ބުނާ ގޮތުން، ދިވެހިރާއްޖޭގައި ޝިޕިންގ އެޖެންޓު ނުވަތަ ފުރައިޓު ފޯވަޑަރެއް ޑެލިވަރީ އޯޑަރ ދޫކުރުމަށް ޝިޕިންގ އެޖެންޓު ނުވަތަ ފުރައިޓު ފޯވާޑަރ ސީދާ ގޮތުންނާއި ނުސީދާ ގޮތުންވިޔަސް ކޮންސައިނީގެ އަތުން ފުރައިޓުގެ އިތުރަށް ފީއެއްގެ ގޮތުގައި ނެގޭނީ ޑެލިވަރީ އޯޑަރަށް އެޑްމިނިސްޓްރޭޓިވް ފީއެއްގެ ގޮތުގައި ގިނަވެގެން -/500 (ފަސްސަތޭކަ) ރުފިޔާއެވެ.
ނަމަވެސް މިފަދަ ބައެއް އެޖެންޓުން ދިވެހި ވިޔަފާރިވެރިން އަތުން ބޮޑެތި އަދަދުތަކުން ފައިސާ ނަގަމުންދާ ކަމަށް ވެއެވެ. އަދި މިފަދަ އެޖެންޓުންގެ ގޮތުގައި ނުފޫޒު ގަދަ ދިވެހިންގެ ބަޔަކު އަޑީގައި ތިބެގެން، ހިންގަމުންދަނީ ސްރީލަންކާގެ ބައެއް ކަމަށް ވެއެވެ.
ރާއްޖެ އަށް މުދާ ގެނެސްދޭ ބޭރުގެ ކުންފުނިތަކުން ތަފާތު އެކި ނަން ނަމުގައި ފީތައް ނެގުމަކީ އާއްމު ކަމެކެވެ.
