މާސްކު ނާޅައިގެންނާއި، ކާފިއު ގަޑީ ބޭރުގައި އުޅެގެން ހާހަކަށްވުރެ ގިނަ މީހުން ޖޫރިމަނާކޮށްފި

ބޭރުގައި އުޅޭއިރު މާސްކް ނާޅައިގެންނާއި، ކާފިއު ގަޑީގައި ބޭރުގައި އުޅެގެން ޖޫރިމަނާކުރި މީހުންގެ އަދަދު ހާހަކަށްވުރެ އިތުރުވެއްޖެއެވެ.

ހޮނިހިރު ދުވަހުގެރޭ ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް އިންސްޕެކްޓާ އޮފް ޕޮލިސް އަބްދުލް މަތީން އަބްދުލް ކަރީމް ވިދާޅުވީ، ކޮވިޑް-19 އާ ގުޅިގެން މި މަހުގެ 1ން ފެށިގެން އަޅާފައިވާ ފިޔަވަޅުތަކަށް ބޯނުލަނބައިގެން މިހާތަނަށް 1،118 މީހަކު ޖޫރިމަނާ ކޮށްފައިވާ ކަމަށެވެ.

Advertisement

އޭގެ ތެރޭގައި ހިމެނެނީ ބޭރު ތެރޭގައި އުޅޭއިރު މާސްކް ނާޅައިގެން ޖޫރިމަނާ ކުރި 591 މީހަކާއި، ކާފިއު ގަޑީގައި ބޭރުގައި އުޅުމުގެ ސަބަބުން ޖޫރިމަނާ ކޮށްފައިވާ 527 މީހެކެވެ. އަދި މިހާތަނަށް ނަސޭހަތް ދެވިފައިވާ މީހުންގެ އަދަދު 3415ށް އަރާކަމަށް މަތީން ވިދާޅުވިއެވެ.

ކޮވިޑް-19 ޖެހޭ މީހުންގެ އަދަދުތައް މައްޗަށްދާން ފެށުމުން އެކަން ކޮންޓްރޯލްކުރުމަށް އެޗްޕީއޭއިން ވަނީ ބޭރުގައި އުޅޭއިރު މާސްކު އެޅުމަށް މަޖުބޫރު ކޮށްފައެވެ. އަދި މާސްކު ނާޅާ އުޅޭ މީހުން 1000 ރުފިޔާއިން ޖޫރިމަނާކުރާ ގޮތަށް ވަނީ ހަމަޖައްސާފަ އެވެ. މިގޮތަށް އަމަލުކުރަން ފަށާފައިވަނީ އޮގަސްޓް މަހުގެ 1 ވަނަ ދުވަހުން ފެށިގެންނެވެ. އެއާއެކު މިހާތަނަށް ކުރި ޖޫރިމަނާގެ އަދަދު މިވަނީ 1.1 މިލިއަނަށް އަރާފައެވެ.

މާސްކުއެޅުން މަޖުބޫރު ކޮށްފައިވާއިރު އެކަމުން އިސްތިސްނާ ވަނީ ދެ އަހަރުން ދަށުގެ ކުޑަކުދިންނާއި، ކަސްރަތުކުރަން ނުކުންނަ މީހުން ކަސްރަތުކުރާ ވަގުތުގައެވެ. މީގެ އިތުރުން އެހެން މީހެއްގެ އެހީގައި މާސްކު އަޅާ މީހުންނާއި ރެސްޓޯރެންޓްތަކުން ޚިދުމަތް ހޯދަން މީހުން މާސްކު އެޅުމުން އިސްތިސްނާވެއެވެ.

މީގެއިތުރުން ރޭގަނޑު 10ން ފެށިގެން ފަތިހު 5 ޖެހުމާ ހަމައަށް ބޭރުގައި އުޅުންވެސް ވަނީ މަނާކޮށްފައެވެ.