ބާސެލޯނާއަށް ކުޅެމުން އަންނަ ފްރާންސްގެ ޑިފެންޑަރު ސަމުއެލް އުމްޓިޓީ ކޮވިޑް-19 އަށް ޕޮޒިޓިވް ވެއްޖެއެވެ.

ހުކުރު ދުވަހުގެރޭ ބާސާއިން ނެރުނު ބަޔާނެއްގައި ބުނީ ބުރާސްފަތި ދުވަހު ކުރިއަށް ގެންދިޔަ ޓެސްޓުތަކުން އުމްޓިޓީ ކޮވިޑް-19 އަށް ޕޮޒިޓިވް ވެފައިވާ ކަމަށެވެ. އަކަމަކު އުމްޓިޓީގެ ހަށިގަނޑުން އެއްވެސް އަލާމާތެއް ފެނިފައި ނުވާ ކަމަށާއި، އޭނާގެ ހާލު ރަނގަޅު ކަމަށްވެސް ބާސާއިން ވަނީ ބުނެފައެވެ. އަދި ވަނީ ވައިރަހަށް ޕޮޒިޓިވް ވުމާއެކު އުމްޓިޓީ ހޯމް-އައިސޮލޭޝަނަށް ބަދަލުކޮށްފައިވާ ކަމަށް ބުނެފައެވެ.

އުމްޓިޓީ ކޮވިޑް-19 އަށް ޕޮޒިޓިވް ވިއިރު، ކަކުލަށް ލިބުނު އަނިޔާއަކާ ގުޅިގެން އޭނާ ހުރީ ކުޅުމާ ދުރުގައެވެ. ޖޫން މަހުގެ 27 ވަނަ ސެލްޓަ ވީގޯ އާއި ބާސާ އެއްވަރުވި މެޗުގައި އުމްޓިޓީ ކުޅުނު ނަމަވެސް، އެ މެޗަށްފަހު ހެދި ޓެސްޓުތަކުން އުމްޓިޓީގެ ކަކުލަށް އަނިޔާވެފައިވާކަން ވަނީ ހާމަވެފައެވެ.

އެހެންކަމުން އަނިޔާއާ ގުޅިގެން ޔުއެފާ ޗެމްޕިއަންސް ލީގުގައި ވާދަކުރުމަށް ޕޯޗުގަލްގެ ވެރިރަށް ލިޒްބަންއަށް ދިޔަ ބާސާގެ ސްކޮޑުގައި އުމްޓިޓީ ހިމަނާފައެއް ނުވެއެވެ.

އުމްޓިޓީގެ އިތުރުން ދާދި ފަހުން ބާސާއަށް ކުޅެމުން އަންނަ ފްރާންސްގެ ޑިފެންޑަރު ޖީން-ކްލެއާ ޓޮޑީބޯ ވެސް ވަނީ ކޮވިޑް-19 އަށް ޕޮޒިޓިވް ވެފައެވެ. މިދިޔަ ބުދަ ދުވަހުގެ ޓޮޑީބޯ ކޮވިޑް-19 އަށް ޕޮޒިޓިވް ވިކަން ހާމަކުރިއިރު، އޭނާގެ ހަށިގަނޑުންވެސް އެއްވެސް އަލާމާތެއް ފެނިފައި ނުވާ ކަމަށާއި، އޭނާގެ ހާލު ރަނގަޅު ކަމަށްވެސް ވަނީ ބުނެފައެވެ.